AKP បន្ទាយមានជ័យ ថ្ងៃទី២៩ ខែសីហា ឆ្នាំ២០២៥--ដំណើរការនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៥ ថ្ងៃទី១ នៅខេត្តបន្ទាយមានជ័យ បានប្រព្រឹត្តទៅយ៉ាងរលូន និងប្រកបដោយសុវត្ថិភាពល្អប្រសើរ ក្រោមការសម្របសម្រួល និងការដាក់ពង្រាយកម្លាំងការពារសន្តិសុខយ៉ាងយកចិត្តទុកដាក់របស់កម្លាំងនគរបាលនិងកងរាជអាវុធហត្ថ។ ការប្ដេជ្ញាចិត្តនេះគឺដើម្បីធានាឱ្យបាននូវបរិយាកាសប្រឡងមួយដ៏ស្ងប់ស្ងាត់ និងយុត្តិធម៌សម្រាប់បេក្ខជនទាំងអស់។

អនុវត្តតាមបទបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានចាត់តាំង លោកឧត្តមសេនីយ៍ត្រី ង៉ាន់ ចិន្តា ស្នងការរង ផែនសណ្ដាប់ធ្នាប់ ឲ្យដឹកនាំកម្លាំងជាច្រើននាក់ចុះការពារសន្តិសុខ និងរៀបចំសណ្ដាប់ធ្នាប់នៅតាមមណ្ឌលប្រឡងទាំងអស់ក្នុងភូមិសាស្ត្រក្រុងសិរីសោភ័ណ។

យោងតាមរបាយការណ៍របស់មន្ទីរអប់រំ យុវជន និងកីឡាខេត្តបន្ទាយមានជ័យ សម្រាប់សម័យប្រឡងថ្ងៃទី២៨ ខែសីហា ឆ្នាំ២០២៥ មានបេក្ខជនចុះឈ្មោះប្រឡងសរុប៦.៥៥២នាក់ (ស្រី ៣.៧២៥ នាក់)។ ក្នុងចំណោមនោះ មានបេក្ខជនថ្នាក់វិទ្យាសាស្ត្រសរុប ១.៨២៥ នាក់ (ស្រី១.១០៧ នាក់) និងថ្នាក់វិទ្យាសាស្ត្រសង្គមចំនួន ៤.៧២៧ នាក់ (ស្រី២.៦១៨ នាក់) ដែលបានប្រឡងនៅតាមមណ្ឌលចំនួន ៨ ក្នុងខេត្ដដែលបានរៀបចំឡើងនៅក្នុងក្រុងសិរីសោភ័ណនេះ។

លោក ឧត្តមសេនីយ៍ទោ សិទ្ធិ ឡោះ បានលើកឡើងថា ការដាក់ពង្រាយកម្លាំងនគរបាលនេះ មិនត្រឹមតែការពារសន្តិសុខនៅក្នុងបរិវេណមណ្ឌលប្រឡងប៉ុណ្ណោះទេ ថែមទាំងរៀបចំសណ្ដាប់ធ្នាប់ចរាចរណ៍នៅជុំវិញមណ្ឌលផងដែរ ដើម្បីសម្រួលដល់ការធ្វើដំណើររបស់បេក្ខជននិងអាណាព្យាបាល។ គោលដៅសំខាន់គឺបង្ការ និងទប់ស្កាត់រាល់បទល្មើស ឬបញ្ហាផ្សេងៗដែលអាចរំខានដល់ដំណើរការប្រឡង ដូចជាការលួចចម្លង និងបទល្មើសផ្សេងៗ។

ជាលទ្ធផល ថ្ងៃទី១នៃការប្រឡងបាក់ឌុបនៅខេត្តបន្ទាយមានជ័យបានប្រព្រឹត្តទៅយ៉ាងរលូន ដោយពុំមានរបាយការណ៍នៃបទល្មើស ឬភាពមិនប្រក្រតីណាមួយកើតឡើងឡើយ។ ភាពតានតឹងមួយចំនួននៅតាមតំបន់ព្រំដែនក៏មិនបានបង្កផលប៉ះពាល់ដល់ដំណើរការប្រឡងដែរ។ ជោគជ័យនេះ គឺជាការបង្ហាញពីកិច្ចសហការដ៏ល្អរវាងអាជ្ញាធរគ្រប់លំដាប់ថ្នាក់ និងជាសក្ខីភាពនៃភាពចាស់ទុំក្នុងការគ្រប់គ្រងស្ថានការណ៍ ដើម្បីជាប្រយោជន៍ដល់យុវជនជំនាន់ក្រោយ៕

ដោយ ឈុន សារ៉ាត