AKP កំពង់ធំ ថ្ងៃទី២៩ ខែសីហា ឆ្នាំ២០២៥-- លោក កែវ សុឃឿន នាយសង្កាត់រដ្ឋបាលជលផលបារាយណ៍ (ប្រចាំស្រុកតាំងគោក) បានចូលរួមជាមួយទីបញ្ជាការស្រាលកោះរះ កាលពីថ្ងៃទី២៨ ខែសីហា ឆ្នាំ២០២៥ បានចុះបង្ក្រាបបទល្មើសជលផលនៅចំណុចរលំ បឹងវៀន ក្ដាមពង និងព្រែកទាល់ ក្នុងភូមិសាស្រ្តឃុំស្រឡៅ ស្រុកតាំងគោក ខេត្តកំពង់ធំ។ ជាលទ្ធផលអនុវត្តបាន០២ករណីដោយបានធ្វើការរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ ១. របាំងសាច់អួនក្រឡាញឹកចំនួន០១របាំង ប្រវែង២៥ម៉ែត្រ ឡុកចំនួន០១គ្រឿងលប/លូចំនួន០១មាត់ និង២. របាំងស្បៃមុងចំនួន០១របាំងប្រវែង៣២ម៉ែត្រ ឡុកចំនួន០១គ្រឿង លប/លូចំនួន០១មាត់ និងបង្គោលចំនួន២៤ដើម។

នៅថ្ងៃជាមួយគ្នានេះដែរ លោក លឹម សុថាត នាយសង្កាត់រដ្ឋបាលជលផលកំពង់ស្វាយក្រោម បានចូលរួមជាមួយក្រុមការងារចម្រុះដឹកនាំដោយលោកវរសេនីយ៍ទោ កែ ម៉ៃ នាយរងសេនាធិការតំបន់ប្រតិបត្តិការសឹករងកំពង់ធំយោធភូមិភាគទី៤ រួមសហការជាមួយទីបញ្ជាការស្រាលឈរជើងនៅឃុំផាត់សណ្តាយ ស្រុកកំពង់ស្វាយ បានចុះទប់ស្កាត់ និងបង្រ្កាបបទល្មើសនេសាទនៅចំណុច ក្រឡុកបាយក្អែក ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។ ជាលទ្ធផលអនុវត្តបាន០១ករណីដោយបានរុះរើ និងបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ របាំងសាច់អួនក្រឡាញឹកចំនួន០១ របាំងប្រវែង១៥០ម៉ែត្រ ទ្បុកចំនួន០២គ្រឿង លប/លូចំនួន០៤មាត់ បង្គោលចំនួន៩០ដើម និងបានចាក់លែងកូនត្រីស្រស់ចម្រុះមួយចំនួនចូលទន្លេវិញ។

លោក គន ចាន់សីហា នាយសង្កាត់រដ្ឋបាលជលផលស្ទោង បានចុះប្រតិបត្តិការ និងបង្រ្កាបបទល្មើសជលផលនៅចំណុចឆេះអង្រុត បឹងខាល ឃុំចំការក្រោម ស្រុកស្ទោង ខេត្តកំពង់ធំ។ ជាលទ្ធផលអនុវត្តបាន០១ករណីដោយបានរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ របាំងស្បៃមុងចំនួន០៥របាំង ប្រវែង៣០០ម៉ែត្រ ឡុកចំនួន០៥គ្រឿងលូចំនួន០៥មាត់ បង្គោលចំនួន៧០ដើម និងចាក់លែងត្រីស្រស់ចម្រុះទំងន់១០គីឡូក្រាមចូលទន្លេវិញ៕

ដោយ ស៊ុម វណ្ណា