AKP សៀមរាប ថ្ងៃទី២៩ ខែសីហា ឆ្នាំ២០២៥-- ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ នៅរសៀលថ្ងៃទី២៨ ខែសីហា ឆ្នាំ២០២៥ បានដឹកនាំកិច្ចប្រជុំបូកសរុបលទ្ធផលការងារប្រតិបត្តិការរយៈពេល៧ខែ ឆ្នាំ២០២៥ និងលើកទិសដៅបន្ត ដែលបានធ្វើឡើងនៅសារមន្ទីរតេជោសន្តិភាព ខេត្តសៀមរាប។ 

កិច្ចប្រជុំនេះផ្តោតសំខាន់លើការងារប្រតិបត្តិការ និងបញ្ហាប្រឈមរយៈពេលកន្លងមក ក៏ដូចជាការពង្រឹងស្មារតីសតិអារម្មណ៍ ការពង្រឹងគោលការណ៍សុវត្ថិភាព និងការពង្រឹងសមត្ថភាពធនធានមនុស្សរបស់អង្គភាព ដែលភារកិច្ចទាំងអស់នេះជាកាងារស្នូល និងជាយុទ្ធសាស្ត្រ សំដៅពង្រឹងភាពជាម្ចាស់ដែលអាចម្ចាស់ការដោះស្រាយរាល់ជំនាញបច្ចេកទេសនៃវិស័យសកម្មភាពកម្ចាត់គ្រាប់មីន និងសំណល់យុទ្ធភណ្ឌសង្គ្រាមនៅកម្ពុជា ពិនិត្យ និងតាមដានវាយតម្លៃលទ្ធផលនៃការងារប្រតិបត្តិការ ដែលបានអនុវត្តកន្លងមក ក៏ដូចជាបញ្ហាប្រឈម និងដំណោះស្រាយចំបាច់ចំពោះមុខ។

សូមជម្រាបថា កិច្ចប្រតិបត្តិការបោសសម្អាតមីន និងសំណល់យុទ្ទភណ្ឌសង្គ្រាមរបស់អង្គភាពស៊ីម៉ាក់ក្នុងរយៈពេល៧ខែ ឆ្នាំ២០២៥ ទទួលបានលទ្ធផលគួរជាទីមោទនៈ ដោយបានបោសសម្អាតរំដោះផ្ទៃដីចម្ការមីននិងចម្ការគ្រាប់បាន៨៩.៧០៥.៨៤៤ម៉ែត្រក្រឡា គិតជាតំបន់ចម្ការមីនមានចំនួនជាង៥៥០ ក្នុងនោះរុករកឃើញនិងកម្ទេចចោលគ្រាប់មីននិងគ្រាប់មិនទាន់ផ្ទុះគ្រប់ប្រភេទបានចំនួន ២៧,៣៣៣ ក្នុងនោះមីនប្រឆាំងមនុស្សចំនួន៥.៥៣៣ គ្រាប់ មីនប្រឆាំងយានយន្តចំនួន ៩៦ គ្រាប់ មីនច្នៃចំនួន ១១ គ្រាប់ គ្រាប់ទម្លាក់ពីយន្តហោះ ចំនួន ៣២ គ្រាប់ កូនគ្រាប់បែកចង្កោមចំនួន ៣.២៧៩ គ្រាប់ និងយុទ្ធភណ្ឌុមិនទាន់ផ្ទុះផ្សេងៗ ចំនួន ១៨.៣៨២ គ្រាប់ គ្រាប់ឆ្លើយតបតាមសំណើបន្ទាន់បានចំនួន ២.៤៨១ សំណើ។ ដោយឡែកចំពោះការស្រាវជ្រាវចម្ការមីននិងចម្ការគ្រាប់ប្រើវិធីសាស្ត្របញ្ញាសិប្បនិម្មិត(AI)ដោយបាន ស្រាវជ្រាវទីតាំងសង្ស័យមានមីន/គ្រាប់ក្នុងចំនួន៣៣ ភូមិ រកឃើញទីតាំងថ្មីសង្ស័យមានមីនចំនួន ២១១ ពហុកោណ ស្មើនឹង ៣៩.៣៤៣.៤៣៧ ម២ អប់រំយល់ដឹងពីគ្រោះថ្នាក់ដោយសារមីនបានចំនួនជាង ១លាន ៤សែននាក់។ 

លទ្ធផលនៃកិច្ចប្រតិបត្តិការនេះបានផ្ដល់ផលប្រយោជន៍ដោយផ្ទាល់និងប្រយោលដល់ប្រជាពលរដ្ឋជាង២០ម៉ឹនគ្រួសារសម្រាប់ដីលំនៅដ្ឋាន ដីកសិកម្ម និងគាំទ្រការអភិវឌ្ឍក្នុងមូលដ្ឋានផងដែរ។ បន្ថែមពីនេះអង្គភាពCMACក៏បានត្រៀមខ្លួនផងដែរដើម្បីរួមចំណែកក្នុងការបណ្តុះបណ្តាល ផ្លាស់ប្តូបទពិសោធន៍លើវិស័យសកម្មភាពមីនជាមួយនឹងប្រទេសដែលរងផលប៉ះពាល់ដោយសារគ្រាប់មីន និងយុទ្ធភណ្ឌមិនទាន់ផ្ទុះមួយចំនួនទៀត ដូចជាអ៊ុយក្រែន ប្រទេសឡាវ និងប្រទេសនៅតំបន់អាហ្វ្រិកជាដើម៕

ដោយ ឃុត សៅ