AKP ភ្នំពេញ ថ្ងៃទី២៥ ខែសីហា ឆ្នាំ២០២៥--
 ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជានៅថ្ងៃទី២៥ ខែ សីហា ឆ្នាំ ២០២៥នេះបានចូលរួមជាវាគ្មិនកិត្តិយស ក្នុងសិក្ខាសាលា ស្តីពី «ការទូតសភា និងច្បាប់អន្តរជាតិ៖ ករណីសភាអឺរ៉ុប Parliamentary Diplomacy and International Law: The Case of the European Parliament» ដែលប្រារព្ធធ្វើឡើង នៅរាជបណ្ឌិត្យសភាកម្ពុជា។ ក្នុងសិក្ខាសាលានេះ ក៏មានការអញ្ជើញចូលរួមពីឯកឧត្តម អន់តូន រីប៉ូល (Mr. Antoine Ripoll) អគ្គទីប្រឹក្សានៃគណៈប្រតិភូសហភាពអឺរ៉ុបប្រចាំអាស៊ានក៏បានធ្វើការបកស្រាយផងដែរពីការទូតសភា និងច្បាប់អន្តរជាតិជូនដល់និស្សិតកម្ពុជាផងដែរ។

ការរៀបចំសិក្ខាសាលាស្តីពី «ការទូតសភា និងច្បាប់អន្តរជាតិ៖ ករណីសភាអឺរ៉ុប» នេះធ្វើឡើងដើម្បីជាផ្នែកមួយនៃការស្វែងយល់ពីរបៀប ដែលការទូតសភាបង្កើតច្បាប់អន្តរជាតិ និងពង្រឹងកិច្ចសហប្រតិបត្តិការក្នុងស្ថានភាពនៃពិភពលោកសព្វថ្ងៃ។ តាមរយៈបាឋកថានេះ អ្នកចូលរួម នឹងទទួលបានការយល់ដឹងដោយផ្ទាល់អំពីតួនាទីរបស់សភាអឺរ៉ុបក្នុងកិច្ចការអន្តរជាតិ និងផលប៉ះពាល់ចំពោះអាស៊ាន និងកម្ពុជា។
ឯកឧត្តមបណ្ឌិត យង់ ពៅ បានបញ្ជាក់ថា ការទូតបច្ចុប្បន្នបានដើរតួនាទីយ៉ាងសំខាន់ក្នុងចូលរួមកសាងអំណាច ដ៏មានប្រសិទ្ធភាព និងត្រជាក់មួយ ក្នុងចំណោមអំណាចទន់ (Soft Powers) ផ្សេងទៀតរបស់រដ្ឋ (នយោបាយអន្តរជាតិ ការទូត សេដ្ឋកិច្ច វប្បធម៌ និងព័ត៌មាន)។

ឯកឧត្ដមបណ្ឌិតបានលើកជាឧទាហរណ៍ថា សង្គ្រាម តែងកើតឡើងដោយសារមហិច្ឆតារបស់អ្នកនយោបាយ ចាបប់ពីរនាក់ឡើងទៅ ធ្វើឱ្យវិនាសកម្មធ្ងន់ធ្ងរ ប៉ុន្តែបញ្ចប់វិញ ដោយអ្នកការទូតដ៏ពូកែ។ ជាមួយគ្នានេះ ការទូតសភា ក៏បានរួមចំណែកយ៉ាងសំខាន់បន្ថែមទៀតលើយន្តការអន្តរជាតិក្នុង ការកសាងទំនុកចិត្ត និងជំរុញកិច្ចសហប្រតិបត្តិការ។ ឯកឧត្តមបណ្ឌិតអគ្គលេខាធិការបានថ្លែងបញ្ជាក់ថា៖ «ច្បាប់អន្តរជាតិ ក៏បានដើរតួនាទីយ៉ាងសំខាន់ក្នុងធានាសណ្តាប់ធ្នាប់ពិភពលោក បើទោះជា បច្ចុប្បន្ននិន្នាប្រទេសមួយចំនួនបានរំលោភបំពាន ច្បាប់អន្តរជាតិដើម្បីបំប៉នមហិច្ឆតានយោបាយទុច្ចរឹត របស់គេក៏ដោយ។ ជាការសង្កេតកត់សម្គាល់របស់ខ្ញុំ កម្ពុជា និងបណ្តាអឺរ៉ុបសុទ្ធតែជាប់ប្រទេសដែលប្រកាន់ខ្ជាប់នូវការគោរពគោលការណ៍ជាអន្តរជាតិ ច្បាប់អន្តរជាតិ ធម្មនុញ្ញ អន្តរជាតិជាចម្បង»។

បើតាមឯកឧត្ដមបណ្ឌិត យង់ ពៅ សិក្ខាសាលានេះមានសារៈសំខាន់ជាពិសេសសម្រាប់អ្នកសិក្សាស្រាវជ្រាវកម្ពុជាសារដោយសារអាចផ្តល់ឱកាសដល់អ្នកសិក្សាស្រាវជ្រាវកម្ពុជា ដោយសារវាផ្តល់នូវឱកាសដ៏មានតម្លៃក្នុងការពង្រឹងការយល់ដឹងរបស់យើងអំពីការទូតសភា និងច្បាប់អន្តរជាតិ។ ទន្ទឹមនេះ កម្ពុជា ក្នុងនាមជាសមាជិកសកម្មនៃ សមាគមប្រជាជាតិអាស៊ីអាគ្នេយ៍ (អាស៊ាន) មានតួនាទី សំខាន់ក្នុងការចូលរួមជាមួយសហភាពអឺរ៉ុប ដើម្បីជំរុញ ទំនាក់ទំនងសភា នឹងកិច្ចសហប្រតិបត្តិការលើវិស័យសំខាន់ៗ ដូចជាការអភិវឌ្ឍប្រកបដោយចីរភាព សន្តិភាព និង សិទ្ធិមនុស្ស។

ឯកឧត្តមបណ្ឌិត យង់ ពៅ បានបន្ថែមថា សិក្ខាសាលានេះ នឹងជួយបង្កើនការយល់ដឹងការទូតសភា ដែលអាចជាជំនួយស្មារតីនៃអំណាចទន់លើឆាកអន្តរជាតិ ខណៈពេលបច្ចុប្បន្នកម្ពុជា ក៏បាននិងកំពុងច្បាមយកតួនាទីការទូតសភានេះផងដែរ។ ឯកឧត្ដមបណ្ឌិតបានសង្កត់ធ្ងន់ថា៖ «ការបង្កើនការយល់ដឹងអំពីគុណតម្លៃច្បាប់អន្តរជាតិ និងការចូលរួមក្នុងការដែលកម្ពុជានឹងត្រូវប្រើប្រាស់យ៉ាងសកម្ម ដោយរួមបញ្ចូលទាំងការគោរពកាតព្វកិច្ចអន្តរជាតិ ដោះស្រាយបញ្ហាប្រឈមសកល ដូចជាបម្រែបម្រួលអាកាសធាតុ និងការជួញដូរមនុស្ស»៕

ដោយ៖ មករា