AKP ភ្នំពេញ ថ្ងៃទី២៥ ខែសីហា ឆ្នាំ២០២៥

លោកស្រី Bridgette L. Walker ភារធារីនៃស្ថានទូតអាម៉េរិកនៅភ្នំពេញ នឹងដឹកនាំមន្រ្តីទូត និងបុគ្គលិកស្ថានទូតអាមេរិក បំពេញទស្សនកិច្ចការងារ នៅទឹកដីខេត្តព្រះសីហនុ ចាប់ពីថ្ងៃទី ២៦ ដល់ ៣០ ខែសីហា ដើម្បីការអបអរសាទររយៈពេលពេញមួយឆ្នាំ នៃខួបទី ៧៥ ឆ្នាំ នៃទំនាក់ទំនងការទូតរវាងសហរដ្ឋអាមេរិក និងកម្ពុជា។ ប្រធានបទសម្រាប់ទស្សកិច្ចការងារនេះគឺ «សប្តាហ៍ស្ថានទូតនៅខេត្តព្រះសីហនុ ឆ្នាំ ២០២៥ ៖ ខួបទី ៧៥ នៃភាពជាដៃគូ និងមិត្តភាព» ដែលជាឱកាសដើម្បីពង្រឹងទំនាក់ទំនងទ្វេភាគី បង្កើនទំនាក់ទំនងរវាងប្រជាជនអាម៉េរិក និងប្រជាជនកម្ពុជា បង្កើនទំនាក់ទំនងសេដ្ឋកិច្ច ផ្តល់ការបណ្តុះបណ្តាលលើការកសាងសមត្ថភាពរបស់មន្ត្រីមានសមត្ថកិច្ច និងសន្តិសុខ គាំទ្រគម្រោងអភិវឌ្ឍន៍សុខភាព និងផ្តល់សេវាផ្នែកកុងស៊ុលដល់ពលរដ្ឋអាម៉េរិក នៅខេត្តព្រះសីហនុ។ នេះបើយោងតាមសេចក្ដីប្រកាសព័ត៌មានរបស់ស្ថានទូតអាម៉េរិកប្រចាំកម្ពុជា។

សូមជម្រាបជូនថា សម្រាប់កម្មវិធីនៅថ្ងៃទី ២៨ ខែសីហា ឆ្នាំ ២០២៥ លោកស្រីភារធារី Walker និងបុគ្គលិកស្ថានទូតអាមេរិក នឹងចូលរួមជាមួយរដ្ឋបាលខេត្តព្រះសីហនុ ក្នុងពិធីលើកស្លាកមិត្តភាពកម្ពុជា-អាម៉េរិក លើកំណាត់ផ្លូវជាតិលេខ ៤។ នៅថ្ងៃទី២៩ ខែសីហា ឆ្នាំ ២០២៥ លោកស្រីភារធារី Walker និងបុគ្គលិកស្ថានទូតអាម៉េរិក នឹងចូលរួមជាមួយរដ្ឋបាលខេត្តព្រះសីហនុ ក្នុងពិធីដាំដើមឈើ ដើម្បីអបអរសាទរខួប ៧៥ ឆ្នាំនៃមិត្តភាពរវាងសហរដ្ឋអាមេរិក និងប្រទេសកម្ពុជា។

ជាមួយគ្នានេះ ផ្នែកកិច្ចការសាធារណៈនៃស្ថានទូតអាម៉េរិក នឹងរៀបចំកិច្ចសន្ទនាអំពីការធ្វើមាតុភូមិនិវត្តន៍នៃវត្ថុបុរាណខ្មែរ ពីសហរដ្ឋអាមេរិកមកកម្ពុជា ហើយនឹងមានការចាក់បញ្ចាំងខ្សែភាពយន្តឯកសារទាក់ទងនឹងឧក្រិដ្ឋកម្មនៃការជួញដូរវត្ថុបុរាណ ដែលមានចំណងជើងថា «Loot» នៅទីតាំងសាលារៀនសុវណ្ណភូមិ។ វាគ្មិនក្នុងវេទិកានេះ មានតំណាងពីស្ថានទូតអាម៉េរិក ក្រសួងវប្បធម៌ និងវិចិត្រសិល្បៈ និងសហអ្នកនិពន្ធ និងកែសម្រួលសាច់រឿង៕

ដោយ៖ រិទ្ធី