AKP ភ្នំពេញ ថ្ងៃទី២៤ ខែសីហា ឆ្នាំ២០២៥--
ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានថ្លែងថា ដំណើរទស្សនកិច្ចរបស់បណ្តាអង្គទូត តំណាងទីភ្នាក់ងារជំនាញរបស់អង្គការសហប្រជាជាតិ អង្គការអន្តរជាតិ និងអង្គការក្រៅរដ្ឋាភិបាលបរទេសដែលធ្វើការលើការងារមីនមនុស្សធម៌សរុបប្រមាណជា៦០រូប ដឹកនាំដោយឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ គណៈប្រតិភូបានទៅទស្សនានៅតាមតំបន់ដែលរងផលប៉ះពាល់នៅក្នុងខេត្តបន្ទាយមានជ័យ ដែលនៅទីនោះហើយគេបានមើលឃើញពីលួសបន្លាដែល ត្រូវបានដាក់ពង្រាយ ការដាក់របាំងរាំងផ្លូវ រួមនឹងឧបសគ្គផ្សេងៗទៀតក្រោមស្នាដៃរបស់យោធាថៃ ជាការរាំងស្កាត់ប្រជាជនកម្ពុជាមិនឱ្យវិលត្រឡប់ចូលទៅកាន់លំនៅឋានរបស់ពួកគេវិញបាន។ ការលើកឡើងរបស់អ្នកនាំពាក្យក្រសួងការបរទេសយ៉ាងដូច្នេះធ្វើឡើងក្នុងការសេចក្តីសង្ខេបព័ត៌មានប្រចាំថ្ងៃ ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នារសៀលថ្ងៃទី២៤ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

ឯកឧត្តម ជុំ សុន្ទរី បានបញ្ជាក់ថា គណៈប្រតិភូខាងលើក៏បានអញ្ជើញទៅពិនិត្យដល់ទីតាំងនៃការ ទម្លាក់គ្រប់បែកក្នុងខេត្តឧត្តរមានជ័យ ហើយក្នុងនោះក៏មានវត្តប្រាសាទតាមាន់សែនជ័យ រួមនឹងតំបន់ រងគ្រោះដោយគ្រាប់បែកប្រភេទ MK-84 នៅភូមិថ្មដូនផងដែរ ដោយក្នុងឱកាសនេះឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានអះអាងជាថ្មីម្តងទៀតអំពីការតាំងចិត្តដ៏ខ្លាំងក្លារបស់រាជរដ្ឋាភិបាលកម្ពុជានៅក្នុងការធ្វើឱ្យមានភាពធូរស្រាលចំពោះទុក្ខ លំបាករបស់បងប្អូនប្រជាពលរដ្ឋរងផលប៉ះពាល់ ខណៈដែលគណៈប្រតិភូបានសម្តែងក្តីរំពឹងថា សន្តិភាពដ៏ពេញលេញ និងស្ថិរភាពនឹងត្រូវបានស្តារមកវិញនៅក្នុងពេលដ៏ខ្លីខាងមុខដើម្បីអនុញ្ញាតឱ្យពលរដ្ឋ រងគ្រោះកម្ពុជាបានវិលត្រឡប់នៅកាន់លំនៅឋានរបស់ខ្លួនវិញប្រកបដោយសុវត្ថិភាព ដោយគណៈប្រតិភូបានគូសបញ្ជាក់ថា ការអនុវត្តដោយពេញលេញនូវកិច្ចព្រមព្រៀងឈប់បាញ់នៅតែជាជំហានដ៏សំខាន់មួយដើម្បីឆ្ពោះទៅរកសន្តិភាពដ៏ស្ថិតស្ថេរ និងដំណោះស្រាយដោយសន្តិវិធីចំពោះបញ្ហាព្រំដែន។ 
ឯកឧត្តមអ្នកនាំពាក្យក្រសួងការបរទេសក៏បានគូសបញ្ជាក់បន្ថែមថា កម្ពុជាសូមស្វាគមន៍ចំពោះការអំពាវនាវរបស់បណ្តាអង្គទូត និង សូមប្រកាសពីការអនុវត្តយ៉ាងខ្ជាប់ខ្ជួនចំពោះបទឈប់បាញ់៕

ដោយ៖ ចាន់ សុភឿន