AKP ភ្នំពេញ ថ្ងៃទី១៩ ខែសីហា ឆ្នាំ២០២៥-- លោកជំទាវកិត្តិបណ្ឌិត អ៊ឺង កន្ថាផាវី រដ្ឋមន្ត្រីក្រសួងកិច្ចការនារី បានទទួលជួបសំណេះសំណាលជាមួយនិស្សិតជ័យលាភីអាហារូបករណ៍ទៅបន្តការសិក្សានៅប្រទេសបារាំង ចំនួន៦រូប នៅទីស្តីការក្រសួងកិច្ចការនារី នារសៀលថ្ងៃអង្គារ ទី១៩ ខែសីហា ឆ្នាំ២០២៥។

លោកជំទាវកិត្តិបណ្ឌិតរដ្ឋមន្ត្រីបានសម្តែងនូវការអបអរសាទរ និងកោតសរសើរចំពោះនិស្សិតជ័យលាភីទាំងអស់ដែលបានជាប់ជ័យលាភីទាំងអស់ដែលបានជ្រើសរើសជំនាញវិទ្យាសាស្ត្រ សម្រាប់ថ្នាក់បរិញ្ញាបត្រជាន់ខ្ពស់ Ecode Polytechnique និងENSIIE (École nationale supérieure d'informatique pour l'industrie et l'entreprise) ដែលជាសាកលវិទ្យាល័យល្បីៗនៅប្រទេសបារាំង។ លោកជំទាវបានលើកទឹកចិត្តឱ្យនិស្សិតទាំងអស់ខិតខំរៀនសូត្រឱ្យបានស៊ីជម្រៅ ដើម្បីទទួលបានចំណេះដឹង និងជំនាញយ៉ាងពិតប្រាកដក្លាយជាមូលធនមនុស្ស នៅក្នុងសង្គមមួយពោពេញទៅដោយអ្នកដែលមានចំណេះដឹងខ្ពស់ (knowledge-Based Society) ប្រកបដោយគុណភាព។

លោកជំទាវបានបង្ហាញនូវឆន្ទៈរបស់រាជរដ្ឋាភិបាលកម្ពុជាដែលតែងតែផ្តល់ឱកាសឱ្យនិស្សិតកម្ពុជាទាំងអស់បានចូលរួមក្នុងការប្រកួតប្រជែងជាមួយនិស្សិតដទៃទៀតដើម្បីទទួលបានអាហាររូបករណ៍ទៅបន្តការសិក្សានៅក្រៅប្រទេស ហើយលោកជំទាវបានសំនូមពរឱ្យនិស្សិតទាំងអស់ត្រូវវិលត្រឡប់មកមាតុប្រទេស ដើម្បីបំពេញការងារនៅក្នុងស្ថាប័នរបស់ខ្លួន ក្នុងការរួមចំណែកដល់កិច្ចអភិវឌ្ឍសេដ្ឋកិច្ច និងសង្គមជាតិ។

លោកជំទាវកិត្តិបណ្ឌិតក៏បានផ្តល់អនុសាសន៍គន្លឹះមួយចំនួនឱ្យដល់និស្សិតជ័យលាភីអាហារូបករណ៍ទាំងអស់ដើម្បីទទួលបានភាពជោគជ័យក្នុងការសិក្សា រួមមាន៖ ត្រូវខិតខំប្រឹងប្រែងរៀនសូត្រ សិក្សាស្រាវជ្រាវ ឈ្វេងយល់នូវចំណេះដឹង និងបទពិសោធន៍ល្អ ជាពិសេសវិទ្យាសាស្ត្រ និងបច្ចេកវិទ្យា ដើម្បីយកចំណេះដឹង និងជំនាញមកបំពេញការងារជូនស្ថាប័នរបស់ខ្លួនប្រកបដោយប្រសិទ្ធភាព និងប្រសិទ្ធផលខ្ពស់។ ដើរតួរជា «អ្នកការទូត» ចូលរួមផ្សព្វផ្សាយសិល្បៈ វប្បធម៌ អរិយធម៌ ប្រពៃណី ទំនៀមទម្លាប់ និងតំបន់ទេសចរណ៍កម្ពុជាទៅកាន់មិត្តបរទេស។ សូមថែរក្សាសុខភាពឱ្យបានល្អ ទាំងសុខភាពផ្លូវកាយ និងសុខភាពផ្លូវចិត្ត បរិភោគចំណីអាហារដោយប្រុងប្រយ័ត្ន និងហាត់ប្រាណឱ្យបានជាប្រចាំដើម្បីជួយដល់ការសិក្សារបស់ក្មួយៗទទួលបានភាពជោគជ័យ៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)