AKP កំពង់ចាម ថ្ងៃទី១៩ ខែសីហា ឆ្នាំ២០២៥-- ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្ត នារសៀលថ្ងៃទី១៩ ខែសីហា ឆ្នាំ២០២៥នេះ បានអញ្ជើញចុះសួរសុខទុក្ខ និងនាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ផ្ដល់ជូនលោកព្រឹន្ទបាលឯក តក់ ពៅ អាយុ៥៦ឆ្នាំ ជាវីរយុទ្ធជនជួរមុខក្នុងអង្គភាពកងពលតូចថ្មើរជើងលេខ២១ ប្រចាំនៅទិសប្រាសាទតាក្របី  ដែលមានជម្ងឺកំពុងសម្រាកព្យាបាល នៅមន្ទីរពេទ្យបង្អែកស្រុកបាធាយ ខេត្តកំពង់ចាម។

ក្នុងឱកាសនោះ ឯកឧត្តម អ៊ុន ចាន់ដា បានពាំនាំ នូវការសាកសួរសុខពី សំណាក់ឯកឧត្តម សន្តិបណ្ឌិត នេត សាវឿន ប្រធានកិត្តិយសសាខា ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចប្រធាន តែងតែ ចង់ដឹងពីសុខទុក្ខនិងការ លំបាក របស់បងប្អូនប្រជាពលរដ្ឋយើង ពិសេស គ្រួសារកងទ័ពជួរមុខនិង បងប្អូនយោធិន និងក្រុមគ្រួសារ មានជំងឺ មានរបួស ពិការ និងពលរដ្ឋភៀសសឹក ត្រូវយកចិត្តទុកដាក់ ជួយដោះស្រាយសម្រាលទុក្ខលំបាកដល់ពលរដ្ឋរងគ្រោះ និងងាយរងគ្រោះឱ្យទាន់ពេលវេលា។

ឯកឧត្តមអភិបាលខេត្តក៏បានសម្តែងនូវក្តីមោទនភាពផុតចំពោះវីរភាពដ៏មោះមុតអង់អាចក្លាហានរបស់វីរកងទ័ពនៃយើង ក្នុងការការពារដែនអធិបតេយ្យភាពទឹកដីរបស់ប្រទេសកម្ពុជា មិនឱ្យជាតិសាសន៍ដទៃណាមួយមកឈ្លានពាន ឬរំលោភបំពានបាននោះឡើយ។ ត្រូវខិតខំថែទាំសុខភាពនិងជូនពរលោក ឆាប់ជាសះស្បើយ នឹងបានវិលត្រឡប់ទៅបំពេញបេសកកម្មនៅព្រំដែនវិញ។

សូមជម្រាបជូនថា ឯកឧត្តមប្រធានគណ:កម្មាធិការសាខាបានផ្តល់អំណោយរបស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជាជូនលោក ព្រិន្ទបាលឯក តក់ ពៅ និងក្រុមគ្រួសារ  រួមមាន អង្ករ ៥០គីឡូក្រាម ព្រមទាំងគ្រឿងឧបភោគបរិភោគ២សម្រាប់ និងថវិកាចំនួន១លានរៀលផងដែរ៕

ដោយ ឆាយ ម៉ុត