AKP កំពង់ធំ ថ្ងៃទី១៩ ខែសីហា ឆ្នាំ២០២៥-- ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំបានដាក់ចេញនៅគោលការណ៍ចំនួន០៩ចំណុច ដល់ថ្នាក់ដឹកនាំផែនការងារជំនាញនិងអធិការនគរបាលក្រុង ស្រុកទាំង០៩ យកទៅអនុវត្តឱ្យទទួលបានជោគជ័យ ក្នុងឱកាសអញ្ជើញនាំកិច្ចប្រជុំបូកសរុបលទ្ធផលការងារប្រចាំខែសីហា លើកទិសដៅការងារសម្រាប់ខែកញ្ញា ឆ្នាំ២០២៥ដែលមានកងកម្លាំងប្រមាណជិត ៣០០នាក់ចូលរួមនៅសាលប្រជុំស្នងការដ្ឋាននគរបាលខេត្ត នាព្រឹកថ្ងៃទី១៩ ខែសីហា ឆ្នាំ២០២៥។

ក្នុងកិច្ចប្រជុំនោះ លោកឧត្តមសេនីយ៍ទោ ហេង សុផល ស្នងការនគរបាលខេត្ត បានឯកភាព និងវាយតម្លៃខ្ពស់ចំពោះកិច្ចប្រតិបត្តិការ រក្សាសន្តិសុខ សណ្តាប់ធ្នាប់សង្គម នាពេលកន្លងមក បងប្អូនយកអស់កម្លាំងកាយចិត្ត ខិតខំប្រឹងប្រែង បំពេញភារកិច្ច រហូតទទួលបានល្អប្រសើរ ជូនសង្គមជាតិ និងប្រជាពលរដ្ឋ។

លោកឧត្តមសេនីយ៍ទោស្នងការបានមានប្រសាសន៍បូកសរុប និងដាក់ចេញនូវគោលការណ៍ ០៩ចំណុចដល់ថ្នាក់ដឹកនាំផែនការងារជំនាញ លោកអធិការនគរបាលទាំង០៩ក្រុង-ស្រុក យកទៅអនុវត្តឱ្យទទួលបានជោគជ័យបន្ថែមទៀត៖ ១.ការងារសន្តិសុខ បន្តយកចិត្តទុកដាក់ អនុវត្ត តួនាទី ភារកិច្ច ដែលថ្នាក់ដឹកនាំប្រគល់ជូន អនុវត្ត ឱ្យទទួលបានជោគជ័យបន្ថែមទៀត។ ២.ការងារព្រហ្មទណ្ឌ បន្តពង្រឹងវិធានការជំនាញ វិធានការច្បាប់ វិធានការរដ្ឋបាល បង្ការ ទប់ស្កាត់ បទល្មើសគ្រប់ប្រភេទ ធានាសេចក្តីសុខក្សេមក្សាន្តជូនប្រជាពលរដ្ឋ និងសង្គមជាតិ។ ៣. ការងារសណ្ដាប់ធ្នាប់សាធារណ: បន្តអនុវត្តគោលការណ៍ សេចក្តីណែនាំរបស់ថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិឱ្យទទួលបានប្រសិទ្ធភាពខ្ពស់។ ៤. ផែនការងារគ្រប់គ្រងអាវុធគ្រឿងផ្ទុះ និងអគ្គិភ័យ ត្រូវគ្រប់គ្រងអាវុធគ្រឿងផ្ទុះ និងជាតិពុល  ត្រួតពិនិត្យយុទ្ធោបករណ៍ បម្រើឱ្យកិច្ចប្រតិបត្តិការ រក្សាសន្តិសុខ សុវត្ថិភាពសណ្តាប់ធ្នាប់សាធារណៈ។ ៥. ការងារអត្តសញ្ញាណកម្ម ឧត្តមសេនីយ៍ទោស្នងការបានកោតសរសើរ ដល់មន្ត្រីជំនាញ ដែលបានយកចិត្តទុកដាក់ពន្លឿន ការផ្ដល់សេវារដ្ឋបាល ជូនប្រជាពលរដ្ឋ ជាពិសេសអត្តសញ្ញាណប័ណ្ណ សៀវភៅស្នាក់នៅ សៀវភៅគ្រួសារ។ ៦. ផែនការងារសេនាធិការ ឧត្តមសេនីយ៍ទោស្នងការ បានលើកទឹកចិត្តដល់មន្ត្រីជំនាញ ដែលបានចងក្រង របាយការណ៍ លម្អិតក្បោះក្បាយ ដើម្បីរំលេចអំពីស្នាដៃ គុណបំណាច់របស់បងប្អូនកងកម្លាំង តាមបណ្ដាផែនការងារជំនាញ សម្រេចបានលទ្ធផលជោគជ័យជូនអង្គភាព។ ៧. ផែនការងារ ភស្តុភារ និងហិរញ្ញវត្ថុ គ្រប់គ្រងទ្រព្យសម្បត្តិរដ្ឋ (ចលនទ្រព្យ និងអចលនទ្រព្យ)។ ៨. ប្រឆាំងគ្រឿងញៀន ពង្រឹងការអនុវត្តច្បាប់ រួមគ្នាគិតរួមគ្នាធ្វើ ពុះពារព្យាយាម ដោយមានឆន្ទ: មនសិការ និងការលះបង់ខ្ពស់ សំដៅកាត់បន្ថយបទល្មើសគ្រឿងញៀន ក្នុងមូលដ្ឋានទូទាំងខេត្ត ឱ្យថយចុះជាបន្តបន្ទាប់ និង៩. ចំពោះកងអនុសេនាតូចទាំង០២កង បន្តត្រៀមលក្ខណៈសម្បត្តិ រួចជាស្រេច ដើម្បីគាំទ្រដល់សមរភូមិមុខ។

ទន្ទឹមនឹងនេះ ឧត្តមសេនីយ៍ទោស្នងការបានប្រសិទ្ធពរជ័យជូនចំពោះលោក លោកស្រីស្នងការរង ព្រមទាំងកងកម្លាំងក្រោមឱវាទទាំងអស់សូមជួបប្រទះតែពុទ្ធពរទាំង៤ ប្រការគឺអាយុ វណ្ណៈ សុខៈ ពលៈ សម្រេចបានជោគជ័យគ្រប់ភារកិច្ច ដែលថ្នាក់ដឹកនាំប្រគល់ជូន៕

ដោយ ស៊ុម វណ្ណា (ប្រភព៖ ស្នងការនគរបាលខេត្តកំពង់ធំ)