AKP បន្ទាយមានជ័យ ថ្ងៃទី០៥ ខែសីហា ឆ្នាំ២០២៥-- លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា បានដឹកនាំគណៈប្រតិភូ និងក្រុមសមាជិកាព្រឹទ្ធសភា ចុះបំពេញទស្សនកិច្ចនៅច្រកទ្វារព្រំដែនអន្តរជាតិប៉ោយប៉ែត ដើម្បីជួបសំណេះសំណាលជាមួយអាជ្ញាធរពាក់ព័ន្ធ និងស្វែងយល់ពីស្ថានភាពនៃការវិលត្រឡប់របស់ពលរដ្ឋខ្មែរពីប្រទេសថៃ។ ដំណើរទស្សនកិច្ចនេះបានធ្វើឡើង កាលពីព្រឹកថ្ងៃអង្គារ ទី០៥ ខែសីហា ឆ្នាំ២០២៥។

ក្នុងកិច្ចប្រជុំជាមួយអាជ្ញាធរច្រកទ្វារអន្តរជាតិប៉ោយប៉ែត ដែលដឹកនាំដោយលោក លៀម សុដា អភិបាលរងខេត្តបន្ទាយមានជ័យ លោកជំទាវ មាន សំអាន បានកោតសរសើរចំពោះកិច្ចខិតខំប្រឹងប្រែងរបស់កងកម្លាំង និងអាជ្ញាធរគ្រប់លំដាប់ថ្នាក់ ដែលបានខិតខំសម្របសម្រួល និងបំពេញភារកិច្ចយ៉ាងសកម្ម ក្នុងការថែរក្សាសន្តិសុខ សណ្ដាប់ធ្នាប់ និងសម្រួលដល់ការធ្វើដំណើររបស់ពលរដ្ឋទាំងឡាយដែលចេញចូលតាមច្រកទ្វារនេះ។

ក្នុងឱកាសនោះ លោកជំទាវ មាន សំអាន បានលើកឡើងពីភាពចាំបាច់នៃការយកចិត្តទុកដាក់ខ្ពស់ ចំពោះពលរដ្ឋខ្មែរដែលវិលត្រឡប់មកពីប្រទេសថៃ និងបានមានប្រសាសន៍ថា "គណៈកម្មការទី៨ព្រឹទ្ធសភា មានការព្រួយបារម្ភចំពោះសុខុមាលភាពរបស់បងប្អូនពលរដ្ឋខ្មែរដែលធ្វើការនៅប្រទេសថៃ ហើយបានវិលត្រឡប់មកស្រុកកំណើតវិញ។ ដូច្នេះ យើងខ្ញុំស្នើសុំឱ្យអាជ្ញាធរគ្រប់ផ្នែកទាំងអស់ត្រូវបន្តបង្កើនការសម្របសម្រួល និងផ្តល់សេវាឱ្យបានល្អប្រសើរ ទាំងផ្នែកនីតិវិធីនៃការឆ្លងដែន និងការធានាបាននូវសុវត្ថិភាពរបស់ពួកគាត់។ យើងត្រូវប្រកាន់ខ្ជាប់នូវភាពទន់ភ្លន់ និងយកចិត្តទុកដាក់ចំពោះបងប្អូនពលករទាំងអស់ ព្រោះពួកគាត់ជាកម្លាំងចលករដ៏សំខាន់សម្រាប់សេដ្ឋកិច្ចគ្រួសារ និងជាតិ។

លោក លៀម សុដា អភិបាលរងខេត្តបន្ទាយមានជ័យ បានជម្រាបជូនលោកជំទាវ មាន សំអាន ព្រមទាំងគណៈប្រតិភូអំពីស្ថានភាពទូទៅនៅតាមច្រកទ្វារព្រំដែន ក្នុងនោះក៏មានការរៀបចំយន្តការ និងកិច្ចសហប្រតិបត្តិការជាមួយភាគីថៃ ដើម្បីធានាបាននូវភាពរលូនក្នុងការចេញចូលរបស់ពលរដ្ឋ។ លោកបានបញ្ជាក់ថា  "អាជ្ញាធរខេត្តបន្ទាយមានជ័យបានដាក់ចេញនូវវិធានការជាច្រើន ដើម្បីសម្រួលដល់ការងាររបស់មន្ត្រីប្រចាំការនៅតាមច្រកទ្វារ និងធានាបាននូវភាពងាយស្រួលសម្រាប់ប្រជាពលរដ្ឋក្នុងការឆ្លងដែន។ យើងក៏បានសហការយ៉ាងជិតស្និទ្ធជាមួយភាគីថៃ ដើម្បីដោះស្រាយបញ្ហាប្រឈមនានាដែលកើតឡើងជាយថាហេតុ។ យើងខ្ញុំបានជំរុញឱ្យមន្ត្រីទាំងអស់ត្រូវបម្រើសេវាសាធារណៈដោយស្មារតីទទួលខុសត្រូវខ្ពស់ គោរពតាមច្បាប់ និងត្រូវជៀសវាងដាច់ខាតពីអំពើពុករលួយ ដើម្បីរក្សាបាននូវភាពស្អាតស្អំ និងទំនុកចិត្តពីសំណាក់ប្រជាពលរដ្ឋ។"

បន្ទាប់ពីកិច្ចប្រជុំរួចរាល់ គណៈប្រតិភូក៏បានចុះពិនិត្យដោយផ្ទាល់នូវស្ថានភាពនៃការវិលត្រឡប់របស់ពលរដ្ឋខ្មែរ ហើយបានជួបសំណេះសំណាល និងសួរសុខទុក្ខបងប្អូនប្រជាពលរដ្ឋនៅទីនោះផងដែរ។ ដំណើរទស្សនកិច្ចនេះបានបង្ហាញពីការយកចិត្តទុកដាក់យ៉ាងជ្រាលជ្រៅរបស់ថ្នាក់ដឹកនាំព្រឹទ្ធសភា ចំពោះសុខុមាលភាព និងជីវភាពរស់នៅរបស់ប្រជាពលរដ្ឋខ្មែរ ដែលបាននិងកំពុងបំពេញការងារនៅក្រៅប្រទេស។

សូមជម្រាបថា ការវិលត្រឡប់របស់បងប្អូនពលករខ្មែរជាបន្តបន្ទាប់បានទទួលនូវការយកចិត្តទុកដាក់ខ្ពស់ពីសំណាក់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដោយសម្ដេចបានផ្ដល់រថយន្តជាច្រើនគ្រឿងដើម្បីដឹកជញ្ជូនបងប្អូនប្រជាពលករទៅដល់ស្រុកកំណើតរៀងៗខ្លួនវិញជាបន្តបន្ទាប់ប្រកបដោយសុខសុវត្ថិភាព។ រដ្ឋបាលខេត្តបន្ទាយមានជ័យ មន្រ្តីជំនាញមកពីក្រសួងការងារ និងបណ្ដុះបណ្ដាលវិជ្ជាជីវៈ ក្រុមគ្រូពេទ្យ យុវជន អាជ្ញាធរ និងកងកម្លាំងរបស់កម្ពុជាបានជួយសម្របសម្រួលជញ្ជូនអីវ៉ាន់ ការរៀបចំសណ្ដាប់ធ្នាប់ ការពិនិត្យព្យាបាលបឋម  ការរៀបចំមណ្ឌលសំចត ផ្ដល់អាហារសម្រន់ និងការប្រឹក្សាផ្សេងៗ៕

ដោយ ឈុន សារ៉ាត