AKP ភ្នំពេញ ថ្ងៃទី៣១ ខែកក្កដា ឆ្នាំ ២០២៥--កម្ពុជាបានធ្វើការអំពាវនាវឱ្យភាគីថៃ ដែលបានធ្វើការចាប់ខ្លួនកងទ័ពកម្ពុជាចំនួន២០រូប ក្រោយបញ្ចប់បទឈប់បាញ់ចូលជាធរមាន កាលពីយប់ថ្ងៃទី ២៩ ខែ កក្កដា នោះ ដោយត្រូវដោះលែងទាហានកម្ពុជាត្រឡប់មកវិញឱ្យបានឆាប់ ស្របតាមច្បាប់មនុស្សធម៌អន្តរជាតិ។ នេះគឺជាការលើកឡើងរបស់លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិក្នុងសន្និសីទសារព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាព្រឹកថ្ងៃទី ៣១  ខែកក្កដា ឆ្នាំ ២០២៥។ 

លោកជំទាវ ឧត្តមសេនីយ៍ឯក ម៉ាលី សុជាតា បានថ្លែងថា ករណីកងទ័ពកម្ពុជាដែលត្រូវបានកងទ័ពថៃចាប់នេះ បានកើតឡើងនាព្រឹកថ្ងៃទី២៩ ខែ កក្កដា ឆ្នាំ ២០២៥ វេលាម៉ោង៧៖៥០នាទីព្រឹក ។ ចំពោះកងកម្លាំងកម្ពុជា២០រូប ដែលស្ថិតនៅក្នុងការគ្រប់គ្រងភាគីថៃមកដល់ពេលនេះយើងបានទទួលសពមួយរូប និង២០រូបផ្សេងទៀតនឹងត្រូវបញ្ជូនត្រឡប់មកវិញ ។ លោកជំទាវ ឧត្តមសេនីយ៍ឯក អ្នកនាំពាក្យក្រសួងការពារជាតិបានគូសបញ្ជាក់ថា៖ «យើងនឹងបន្តចរចាឱ្យអស់លទ្ធភាពដើម្បីយកបងប្អូនទាំងអស់ ត្រឡប់មកវិញឱ្យបានឆាប់បំផុតដោយសុវត្តិភាព។ ខ្ញុំសុំអំពាវនាវដល់ភាគីថៃ ត្រូវធ្វើយ៉ាងណាបញ្ជូនកងកម្លាំងរបស់យើងទាំង២០រូប ត្រឡប់មកវិញឱ្យបានឆាប់ រួមទាំងកម្លាំងផ្សេងទៀតបើមានក្នុងការគ្រប់គ្រងរបស់ថៃ»។

ជាមួយគ្នានេះ លោកជំទាវឧត្តមសេនីយ៍ឯក ម៉ាលី សុជាតា ក៏បានធ្វើការអំពាវនាវដល់ប្រជាពលរដ្ឋកម្ពុជា កងទ័ពកម្ពុជា មានលំនឹងចិត្តថារាជរដ្ឋាភិបាល ថ្នាក់ដឹកនាំក្រសួងការពារជាតិ និងកងទ័ពកម្ពុជា មិនដែលលះបង់កងទ័ពរបស់យើងណាម្នាក់ឡើយ ទោះក្នុងកាលៈទេសៈណាក៏ដោយ។

ពាក់ព័ន្ធករណីកងទ័ពថៃបានប្រើប្រាស់ល្បិចកលចាប់កងទ័ពកម្ពុជានេះដែរ ក្រសួងការពារជាតិកម្ពុជាកំពុងអន្តរាគមន៍ដោយចរចាជាមួយកងទ័ពថៃ និងក្នុងនោះកម្ពុជាក៏បានស្នើឱ្យអគ្គមេបញ្ជាការប្រទេស ម៉ាឡេស៊ី ជួយអន្តរាគមន៍ផងដែរ។ ទន្ទឹមនេះ កម្ពុជាសង្ឃឹមថា បងប្អូនទាំងអស់នឹងវិលត្រឡប់មកវិញដោយសុខសុវត្តិភាព។លោកជំទាវ ឧត្តមសេនីយ៍ឯកបានបន្ថែមថា កម្ពុជាសូមអំពាវនាវដល់ភាគីថៃ សូមជួយមើលថែ មើលការខុសត្រូវ ចំពោះបងប្អូនកងទ័ពកម្ពុជាដែលកំពុងត្រូវភាគីថៃគ្រប់គ្រងឱ្យបានល្អ និងឆាប់បញ្ជូនពួកគាត់ត្រឡប់មកវិញស្រតាមច្បាប់មនុសុ្សធម៌អន្តរជាតិ។

លោកជំទាវ ឧត្តមសេនីយ៍ឯក អ្នកនាំពាក្យក្រសួងការពារជាតិកម្ពុជាបានសង្កត់ធ្ងន់ថា៖ «ខ្ញុំសុំបញ្ជាក់ជាថ្មីថាអាយុជីវិត សុខសុវត្តិភាព ទាំងកងទ័ព ទាំងប្រជាពលរដ្ឋស៊ីវិល គឺជាអ្វីដែលរាជរដ្ឋាភិបាលចាត់ទុកជាអាទិភាពចម្បងបំផុត ហើយតែងតែខិតខំប្រឹងប្រែងដោះស្រាយគ្រប់មធ្យោបាយទាំងអស់ ដើម្បីសម្រេចឱ្យបាននូវគោលដៅនេះ»៕

សូមជម្រាបជូនថា កងទ័ពកម្ពុជាចំនួន២១រូបដែលប្រចាំការនៅសមរភូមិមុខត្រង់តំបន់ ជាំតែ ត្រូវបានកងទ័ពថៃ ប្រើប្រាស់នូវល្បិចកលស្មោកគ្រោក ដោយយកល្បិចក្រោយបទឈប់បាញ់ចូលជាធរមានហើយ ហៅកងទ័ពកម្ពុជាទៅចាប់ដៃបង្ហាញពីមិត្តភាពឡើងវិញ ។ ភ្លាមៗនោះកងទ័ពថៃ បានធ្វើការភ្ជង់ និងចាប់កងទ័ពកម្ពុជា ដោយក្នុងចំណោមពួកគេទាំងនោះ កងទ័ពថៃសង្ស័យថាបានបាញ់សម្លាប់កងទ័ពកម្ពុជាចំនួន២រូបនិងម្នាក់បានរួចខ្លួន៕

ដោយ៖ មករា