AKP ឧត្តរមានជ័យ ថ្ងៃទី៣១ ខែកក្កដា ឆ្នាំ២០២៥--អំណោយសប្បុរសជននានា តាមរយៈរដ្ឋបាលរាជធានីភ្នំពេញ ជាចង្ក្រានហ្គាសធន់តូចចល័ត(សម្រាប់ដាំស្ល) ចំនួន៣០០០ចង្ក្រាន កំប៉ុងហ្គាស៦០០០ កំប៉ុង និងខ្ទឹមសចំនួន៥០០គីឡូក្រាម ត្រូវបានរដ្ឋបាលរាជធានីភ្នំពេញយកមកផ្ដល់ជូនដល់មូលដ្ឋានវីរកងទ័ពជួរមុខ នៅខ្សែបន្ទាត់ព្រំដែនកម្ពុជា-ថៃ អន្លង់វែង ខេត្ដឧត្ដរមានជ័យ ដែលដឹកនាំដោយឯកឧត្ដម អ៊ីមរ៉ន ហាស្សាន់ អភិបាលរងរាជធានីភ្នំពេញ តំណាងឯកឧត្ដម ឃួង ស្រេង អភិបាលរាជធានីភ្នំពេញ ផ្ដល់ជូនឯកឧត្ដម ឧត្ដមសេនីយ៍ឯក ច័ន្ទ លំផាត អនុប្រធានគណៈកម្មាធិការគ្រប់គ្រងគ្រោះមហន្ដរាយ តំណាងឯកឧត្តម កិត្តិសង្គហបណ្ឌិត ទេសរដ្ឋមន្ដ្រី គន់ គីម ប្រធានគណៈកម្មាធិការគ្រប់គ្រងគ្រោះមហន្ដរាយ និងលោក ងួន ទ្ធីរិទ្ធ អភិបាលស្រុកអន្លង់វែង កាលពីថ្ងៃទី៣០ ខែកក្កដា ឆ្នាំ២០២៥។

ក្នុងឱកាសនោះ ឯកឧត្តម ឧត្ដមសេនីយ៍ឯក ច័ន្ទ លំផាត បានថ្លែងអំរគុណចំពោះឯកឧត្ដម ឃួង ស្រេង អភិបាលរាជធានីភ្នំពេញ តាមរយៈឯកឧត្ដម អ៊ីមរ៉ន ហាស្សាន់ ដែលបាននាំអំណោយសប្បុរសជនជាចង្ក្រានហ្គាសតូចចល័ត យកមកផ្ដល់ជូនវីរកងទ័ពជួរមុខ នៅខ្សែបន្ទាត់ព្រំដែនទិសអន្លង់វែង ខេត្ដឧត្ដរមានជ័យ នាពេលនេះគឺចំពេលដែលបងប្អូនវីរកងទ័ពកំពុងខ្វះខាតចង្ក្រានហ្គាសតូចចល័តបែបនេះ សម្រាប់ចម្អិនអាហារប្រចាំថ្ងៃ ដែលងាយស្រួលចល័ត។ អំណោយទាំងនេះពិតជាបានបង្ហាញឱ្យឃើញពីសាមគ្គីភាពជាធ្លុងមួយខ្មែរ ស្រឡាញ់ខ្មែរពិតប្រាកដ។

ឯកឧត្ដម អ៊ីមរ៉ន ហាស្សាន់ អភិបាលរងរាជធានភ្នំពេញ តំណាងឱ្យអភិបាលរាជធានីភ្នំពេញ ឯកឧត្ដម ឃួង ស្រេង ក៏បានអរគុណចំពោះទឹកចិត្តសប្បុរសជននានានៅរាជធានីភ្នំពេញ ដែលតែងតែចូលរួមចែករំលែកនូវធនធានតាមលទ្ធលភាពរៀងៗខ្លួន ដើម្បីឧបត្ថម្ភដល់វីរកងទ័ពជួរមុខ ដែលពួកគាត់មានការខ្វះខាត និងត្រូវការសម្រាប់ជីវភាពនៅអង្គភាព រួមការងារអាវុធ ក្នុងបុព្វហេតុការពារទឹកដីនៃមាតុភូមិរបស់យើង។ នេះពិតជាបានបង្ហាញឱ្យឃើញពីសាមគ្គីភាពជាធ្លុងមួយ ខ្មែរស្រឡាញ់ខ្មែរ ដោយបានលើកឡើងថា “ខ្ញុំសូមអរគុណនូវទឹកចិត្តរបស់បងប្អូនប្រជាពលរដ្ឋយើង និងសប្បុរសជនក្នុងស្មារតីខ្មែរ ជួយខ្មែរ។ ក្នុងនាមសមរភូមិក្រោយរដ្ឋបាលរាជធានីភ្នំពេញ នៅតែបន្ដជួយបងៗកងទ័ពជួរមុខ ជារៀងរហូត”។

សូមបញ្ជាក់ថា រដ្ឋបាលរាជធានីភ្នំពេញបាននាំយកអំណោយសប្បុរសជនជាគ្រឿងឧបភោគបរិភោគ និងសម្ភារប្រើប្រាស់មកឧបត្ថម្ភដល់វីរកងទ័ពតាមបន្ទាត់ព្រំដែនជួរមុខ និងប្រជាពលរដ្ឋដែលទទួលផលប៉ះពាល់ នាពេលនេះជាលើកទី៥ នៅខេត្តឧត្តរមានជ័យ៕

ដោយ សួស សំរិត