AKP ភ្នំពេញ ថ្ងៃទី៣១ ខែកក្កដា ឆ្នាំ២០២៥--អ្នកនាំពាក្យក្រសួងការបរទេស និងសហប្រតិបត្តិការអន្ដរជាតិកម្ពុជាបានគូសបញ្ជាក់ថា កម្ពុជាសូមបញ្ជាក់សាជាថ្មីយ៉ាងម៉ឺងម៉ាត់ នូវការប្តេជ្ញាចិត្តឥតងាករេក្នុងការអនុវត្តកិច្ចព្រមព្រៀងបទឈប់បាញ់គ្នាប្រកបដោយប្រសិទ្ធភាព និងពេញលេញ ព្រមទាំងការដោះស្រាយជម្លោះជាមួយប្រទេសថៃដោយសន្តិវិធី។ នេះគឺជាការគូសបញ្ជាក់របស់ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្ដរជាតិ ក្នុងសន្និសីទសារព័ត៌មានសម្រាប់ការធ្វើសេចក្តីសង្ខេបព័ត៌មានប្រចាំថ្ងៃស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នៅទីស្តីការគណៈរដ្ឋមន្ត្រី នាព្រឹកថ្ងៃទី៣១ ខែកក្កដា ឆ្នាំ២០២៥។

ឯកឧត្ដម ជុំ សន្ទរី បានថ្លែងថា ក្រសួងការបរទេស និងសហប្រតិបត្តិការអន្តរជាតិនៃ ព្រះរាជាណាចក្រកម្ពុជា បានសេចក្តីថ្លែងការណ៍ បដិសេធការចោទប្រកាន់របស់ថៃអំពីការរំលោភបទឈប់បាញ់ ហើយរាជរដ្ឋាភិបាលកម្ពុជាសូមបដិសេធដាច់អហង្ការ ចំពោះសេចក្តីប្រកាសរបស់ក្រសួងការបរទេសថៃ ចុះផ្សាយនៅថ្ងៃទី ៣០ ខែកក្កដា ឆ្នាំ២០២៥ ដែលចោទប្រកាន់ខុសពីការពិតថា កម្ពុជា បានរំលោភលើបទឈប់បាញ់ ដែលបានឯកភាពគ្នាកាលថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៊ី ។ ឯកឧត្ដមបានថ្លែងបញ្ជាក់ថា កងកម្លាំងប្រដាប់អាវុធកម្ពុជាពុំបានធ្វើសកម្មភាពណាមួយទាល់តែសោះ ដែលចាត់ទុកថា ជាការរំលោភលើបទឈប់បាញ់ ដែលបានព្រមព្រៀងគ្នា។ ឯកឧត្តមបានលើកឡើងជាថ្មីម្តងទៀតថា កម្ពុជាសូមទាត់ចោលទាំងស្រុងការបន្តប្រឌិតអះអាងរបស់ថៃនេះ ដូចដែលបានធ្វើរួចមកហើយនៅក្នុងសេចក្តីថ្លែងការណ៍របស់ក្រសួងការបរទេសកម្ពុជា ចេញថ្ងៃទី២៩ ខែកក្កដា ឆ្នាំ២០២៥។ ឯកឧត្តមអ្នកនាំពាក្យបានបញ្ជាក់យ៉ាងដូច្នេះថា៖ «កងកម្លាំងប្រដាប់អាវុធកម្ពុជាពុំបានធ្វើសកម្មភាពណា មួយទាល់តែសោះ ដែលចាត់ទុកថាជាការរំលោភលើបទឈប់បាញ់ ដែលបានព្រមព្រៀងគ្នា។ កម្ពុជាព្យាយាមដោយស្មោះត្រង់ ដើម្បីសម្រេចកិច្ចព្រមព្រៀងបញ្ចប់ជម្លោះប្រដាប់អាវុធ ទាំងស្រុង ក្នុងបំណងចៀសវាងការបាត់បង់អាយុជីវិតមនុស្សដោយមិនចាំបាច់បន្ថែមទៀត ក៏ដូចជាការរងទុក្ខរបស់ប្រជាជនរាប់ម៉ឺននាក់ ដែលត្រូវរត់ចោលលំនៅឋាន ដោយសារតែការប្រយុទ្ធគ្នា»។ 

ឯកឧត្តមអ្នកនាំពាក្យបានលើកឡើងឱ្យដឹងទៀតថា បច្ចុប្បន្ននេះ គឺជាពេលវេលាដែលត្រូវផ្តោតការគិតគូរទៅលើគោលដៅចម្បង ក្នុងការស្តារសន្តិភាព និងរក្សាចីរភាពនៃសន្តិភាព ដើម្បីជាប្រយោជន៍ នៃប្រទេសទាំងពីរ និងស្ថិរភាពក្នុងតំបន់ទាំងមូល។ ក្នុងន័យនេះ កម្ពុជាសូមវាយតម្លៃខ្ពស់ចំពោះការប្តេជ្ញាចិត្តដ៏មុតមាំរបស់ ប្រទេសម៉ាឡេស៊ី ជាប្រធានអាស៊ានបច្ចុប្បន្ន ដែលបានចាត់វិធានការយ៉ាងឆាប់រហ័សក្នុងការបង្កើតយន្តការត្រួតពិនិត្យ និងរាយការណ៍ សំដៅធ្វើយ៉ាងណាឱ្យបទឈប់បាញ់ត្រូវបានអនុវត្តន៍ យ៉ាងមានប្រសិទ្ធភាពតាមការព្រមព្រៀងគ្នា។ជាមួយគ្នានោះដែរ ឯកឧត្ដម ជុំ សន្ទរី បានអះអាងផងដែរថា កម្ពុជាក៏សូមវាយតម្លៃខ្ពស់ផងដែរចំពោះការគាំទ្ររបស់ប្រទេសសមាជិកអាស៊ាន និងប្រទេសផ្សេងទៀតដែលយកចិត្តដាក់ ក្នុងការធ្វើឱ្យបទឈប់បាញ់មានស្ថិរភាពស្ថិតស្ថេរយូរអង្វែង ។ ទន្ទឹមនេះ ដើម្បីតម្លាភាពពេញលេញ និងដោយមានកិច្ចសហប្រតិបត្តិការល្អពីប្រធានអាស៊ាន នៅថ្ងៃទី ៣០ ខែកក្កដា ឆ្នាំ២០២៥ កម្ពុជាបានរៀបចំដំណើរទស្សនកិច្ចរបស់អ្នកការទូតបរទេស និងអនុព័ន្ធយោធាបរទេសនៅរាជធានីភ្នំពេញ ទៅកាន់តំបន់ព្រំដែនអានសេះ។ ឯកឧត្តមអ្នកនាំពាក្យក៏បានបន្ថែមថា ការណ៍ដែលប្រទេសកម្ពុជា ខិតខំជំរុញឱ្យមានយន្តការត្រួតពិនិត្យ គឺជាសក្ខីភាពបញ្ជាក់ពីភាពស្មោះត្រង់ ភាពបើកចំហ និងបំណង ប្រាថ្នាដ៏មុតមាំរបស់កម្ពុជាក្នុងការរក្សាឱ្យបាននូវបទឈប់បាញ់ និងបញ្ចប់ការប្រយុទ្ធគ្នាជាស្ថាពរ ដើម្បីសង្គ្រោះជីវិតមនុស្ស។ 

ក្នុងឱកាសនោះ ឯកឧត្ដមរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជាបានសង្កត់ធ្ងន់ថា៖ «រាជរដ្ឋាភិបាលកម្ពុជាសូមបញ្ជាក់ជាថ្មីនូវការប្រកាន់ខ្ជាប់បទឈប់បាញ់ និងការប្តេជ្ញាចិត្តយ៉ាងខ្ជាប់ខ្ជួនចំពោះគោលការណ៍ច្បាប់អន្តរជាតិ ការដោះស្រាយវិវាទដោយសន្តិវិធី និងការគោរពយ៉ាងម៉ឺងម៉ាត់ចំពោះអធិបតេយ្យ បូរណភាពទឹកដី និងសេចក្តីថ្លៃថ្នូរនៃប្រជាជាតិទាំងពីរ»៕

ដោយ៖ ប៊ុនរិទ្ធ