AKP ភ្នំពេញ ថ្ងៃទី១៧ ខែកក្កដា ឆ្នាំ២០២៥-

ឯកឧត្តម ស្លេះ អាល់ហ្វីន អនុរដ្ឋលេខាធិការក្រសួងព័ត៍មាន បានអញ្ជើញចូលរួមទិវាទូរទស្សន៍នៃប្រទេសសមាជិកអង្គការសហប្រតិបត្តិការសៀងហៃលើកទី២ នៅទីក្រុង Xi’An ខេត្ត Shaanxi សាធារណរដ្ឋប្រជាមានិតចិន ដែលបានធ្វើឡើងពីថ្ងៃទី១៤-១៨ខែកក្កដា ឆ្នាំ២០២៥ ដោយឯកឧត្តមតំណាងក្រសួងព័ត៍មានបានថ្លែងសុន្ទរកថាគន្លឹះស្តីពី «ការបង្កើតកម្មវិធីសោតទស្សន៍ដើម្បីអនាគតរួម»ផងដែរ។

ក្នុងឱកាសនោះ ឯកឧត្តម ស្លេះ អាល់ហ្វីន បានមានប្រសាសន៍ថា ខណៈពេលដែលប្រព័ន្ធផ្សព្វផ្សាយ និងព័ត៌មានក្នុងពិភពលោកកំពុងវិវឌ្ឍន៍យ៉ាងឆាប់រហ័ស តួនាទីប្រព័ន្ធផ្សាយសោតទស្សន៍មានសារៈសំខាន់ជាងពេលណាទាំងអស់។ ឯកឧត្តមអនុរដ្ឋលេខាធិការបានសង្កត់ធ្ងន់ថា៖ «យើងគាំទ្រយ៉ាងចំពោះកិច្ចខិតខំប្រឹងប្រែងដើម្បីលើកកម្ពស់កិច្ចសន្ទនាអន្តរវប្បធម៌ កិច្ចសហប្រតិបត្តិការលើផ្នែកបច្ចេកវិទ្យា និងការផ្លាស់ប្តូរមាតិកាដែលគួរឱ្យទុកចិត្ត និងគុណភាពខ្ពស់»។ 

ជាមួយគ្នានេះ ឯកឧត្តមបានបន្ថែមថា ប្រព័ន្ធផ្សព្វផ្សាយបែបប្រពៃណី និងប្រព័ន្ធផ្សព្វផ្សាយទំនើមិនមែនគ្រាន់តែជាបណ្តាញទំនាក់ទំនងទេ ប៉ុន្តែជាគន្លឹះយុទ្ធសាស្ត្រសម្រាប់ការកសាងប្រទេសជាតិ ការលើកកម្ពស់សន្តិភាព និងការអភិវឌ្ឍប្រកបដោយចីរភាព ។

សូមជម្រាបថា អង្គការសហប្រតិបត្តិការសៀងហៃ មានរដ្ឋជាសមាជិកចំនួន១០ប្រទេស ហើយក្នុងនោះមានប្រទេសសង្កេតការណ៍ចំនួន២ មកពីតំបន់អ៊ៀរ៉ាស៊ី។ អង្គការនេះ បង្កើតឡើងនៅថ្ងៃទី២៦ ខែមេសា ឆ្នាំ១៩៩៦ ដែលបច្ចុប្បន្ននេះ មានដៃគូសន្ទនាចំនួន១៤៕

ដោយ៖ រិទ្ធី