AKP កំពង់ធំ ថ្ងៃទី១៧ ខែកក្កដា ឆ្នាំ២០២៥--ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំបានដាក់ទិសដៅឱ្យថ្នាក់ដឹកនាំស្នងការនគរបាលខេត្តនិងអធិការនគរបាលទាំង៩ក្រុង ស្រុកត្រូវអនុវត្តបទបញ្ជាលេខ០១បបរបស់រាជរដ្ឋាភិបាលស្ដីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា(ONLINE SCAMS)ឱ្យបានម៉ឺងមាត់បំផុតនិងមានប្រសិទ្ធភាពក្នុងឱកាសអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែកក្កដា ឆ្នាំ២០២៥ និងលើកទិសដៅការងារសម្រាប់អនុវត្តបន្តដែលមានកងកម្លាំងចូលរួមប្រមាណជាង២០០នាក់នៅសាលប្រជុំស្នងការដ្ឋាននគរបាលខេត្តកាលពីរសៀលថ្ងៃទី១៦ខែកក្កដាឆ្នាំ២០២៥។

ឧត្តមសេនីយ៍ទោ ហេង សុផលបានកោតសរសើរ ដល់បងប្អូនកងកម្លាំងទូទាំងខេត្តក្នុងរយៈពេលកន្លងមក បានខិតខំប្រឹងប្រែងបំពេញតួនាទី ភារកិច្ច ដែលថ្នាក់ដឹកនាំប្រគល់ជូនអនុវត្តសម្រេចបានលទ្ធផលល្អប្រសើរធានាថែរក្សាបាន សន្តិសុខ សុវត្ថិភាព សណ្តាប់ធ្នាប់ ជូនសង្គមជាតិ និងប្រជាពលរដ្ឋតាមគោលនយោបាយ"ភូមិ-ឃុំ-សង្កាត់មានសុវត្ថិភាព"។

ទន្ទឹមនឹងនេះឧត្តមសេនីយ៍ទោ ស្នងការ បានប្រគល់ភារកិច្ច ជូនលោក លោកស្រីស្នងការរង ដែលចុះជួយមូលដ្ឋាននៅតាមបណ្តាអធិការដ្ឋាននគរបាលក្រុង-ស្រុក គឺដើម្បីពង្រឹងនិងជំរុញការងារមួយចំនួន ពិសេសការងារសន្តិសុខ សណ្តាប់ធ្នាប់ សុវត្ថិភាពសង្គមត្រូវរួមគ្នាដោះស្រាយបញ្ហាប្រឈមនានា របស់ប្រជាពលរដ្ឋ ដែលស្ថិតក្រោមដែនសមត្ថកិច្ចរបស់ខ្លួនឱ្យកាន់តែមានប្រសិទ្ធភាព តម្លាភាព គណនេយ្យភាព និងសុច្ចរិតភាពនិងរួមចំណែកពង្រឹងការងារអភិបាលកិច្ចល្អ ការអភិវឌ្ឍន៍របស់ជំនាញ នៃកងកម្លាំងនគរបាលជាតិឱ្យបានល្អប្រសើរ ស្របតាមផែនការយុទ្ធសាស្ត្ររបស់រាជរដ្ឋាភិបាលនៃព្រះរាជាណាចក្រកម្ពុជា ។

ឧត្តមសេនីយ៍ទោស្នងការក៏បានក្រើនរំលឹកដល់លោក លោកស្រី ជាថ្នាក់ដឹកនាំត្រូវធ្វើគំរូល្អដល់មន្ត្រីក្រោមឱវាទនិងត្រូវពង្រឹងការគ្រប់គ្រងដឹកនាំបញ្ជា អនុវត្តតួនាទី ភារកិច្ចប្រចាំថ្ងៃ ពង្រឹងវិន័យលេខ៨៧៣ របស់កងកម្លាំងនគរបាលជាតិ លើកកម្ពស់ប្រពន្ធ័គ្រប់គ្រងដឹកនាំនិងលើកទឹកចិត្ត រកឱ្យឃើញមន្ត្រីដែលសកម្ម មានស្នាដៃ ក្នុងការបំពេញភារកិច្ច ជូនអង្គភាព តែត្រូវរកឱ្យឃើញនូវមន្ត្រីអសកម្ម ក្នុងការបំពេញតួនាទីភារកិច្ចត្រូវអនុវត្តតាមលក្ខន្តិកៈដោយឡែកនៃក្របខណ្ឌមន្ត្រីនគរបាលជាតិ៕

ដោយ៖ ស៊ុម វណ្ណា