AKPបន្ទាយមានជ័យ ១៧ កក្កដា ២០២៥--រដ្ឋបាលខេត្តបន្ទាយមានជ័យ បានធ្វើជាម្ចាស់ផ្ទះរៀបចំវគ្គតម្រង់ទិសដ៏សំខាន់មួយ ស្តីពី “ការប្រើប្រាស់ប្រព័ន្ធគ្រប់គ្រងទិន្នន័យបណ្ដឹង និងព័ត៌មានផ្សេងៗសម្រាប់របស់ការិយាល័យប្រជាពលរដ្ឋក្រុង-ស្រុក” ។

វគ្គបណ្ដុះបណ្ដាលរយៈពេលពីរថ្ងៃនេះ គឺចាប់ពីថ្ងៃទី១៦ ដល់ថ្ងៃទី១៧ ខែកក្កដា ឆ្នាំ២០២៥ នេះធ្វើឡើងនៅសាលប្រជុំ (ក) នៃសាលាខេត្តបន្ទាយមានជ័យ ដោយមានការចូលរួមពីមន្ត្រីមកពីខេត្តគោលដៅចំនួន ៨ រួមមាន បន្ទាយមានជ័យ, បាត់ដំបង, ប៉ៃលិន, ពោធិ៍សាត់, កំពង់ឆ្នាំង, ឧត្តរមានជ័យ, សៀមរាប និងកំពង់ធំ។

ពិធីដ៏មានសារសំខាន់នេះ ប្រព្រឹត្តទៅក្រោមអធិបតីភាពរបស់ ឯកឧត្តម បួន ហេង អគ្គនាយករងនៃអគ្គនាយកដ្ឋានរដ្ឋបាល ក្រសួងមហាផ្ទៃ និងជាអគ្គលេខាធិការរងនៃអគ្គលេខាធិការដ្ឋានគណៈកម្មាធិការគ្រប់គ្រងសំរាម សំណល់រឹងទីប្រជុំជន។ 

ក្នុងពិធីនេះ ក៏មានការចូលរួមពី លោក លី សុវណ្ណារិទ្ធ អភិបាលរងនៃគណៈអភិបាលខេត្តបន្ទាយមានជ័យ តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ រួមនិងមន្ត្រីពាក់ព័ន្ធជាច្រើននាក់ទៀត។

ថ្លែងក្នុងពិធីបើកវគ្គ លោក លី សុវណ្ណារិទ្ធ អភិបាលរងខេត្តបន្ទាយមានជ័យ បានលើកឡើងពីសារៈសំខាន់នៃវគ្គតម្រង់ទិសនេះ ដែលជាផ្នែកមួយដ៏សំខាន់ក្នុងការលើកកម្ពស់ប្រសិទ្ធភាពការងាររបស់ការិយាល័យប្រជាពលរដ្ឋនៅថ្នាក់មូលដ្ឋាន។ លោកបានសង្កត់ធ្ងន់ថា “ប្រព័ន្ធគ្រប់គ្រងទិន្នន័យបណ្ដឹងនេះ នឹងក្លាយជាឧបករណ៍ដ៏មានប្រសិទ្ធភាពមួយ ក្នុងការកត់ត្រា តាមដាន និងដោះស្រាយបណ្ដឹងនានារបស់ប្រជាពលរដ្ឋប្រកបដោយតម្លាភាព និងឆាប់រហ័ស។ វាជាមធ្យោបាយដ៏ល្អក្នុងការជួយឱ្យអាជ្ញាធរគ្រប់លំដាប់ថ្នាក់ អាចយល់ដឹងកាន់តែច្បាស់ពីបញ្ហាប្រឈមរបស់ប្រជាពលរដ្ឋ និងឆ្លើយតបបានទាន់ពេលវេលា។” លោកក៏បានណែនាំដល់មន្ត្រីពាក់ព័ន្ធចូលរួមទាំងអស់ ឱ្យយកចិត្តទុកដាក់ខ្ពស់ក្នុងការសិក្សា និងអនុវត្តនូវចំណេះដឹងដែលទទួលបានពីវគ្គនេះ ដើម្បីជាប្រយោជន៍ដល់ការងារប្រចាំថ្ងៃរបស់ខ្លួន។

ឆ្លៀតក្នុងឱកាសនោះ ឯកឧត្តម បួន ហេង បានថ្លែងកោតសរសើរចំពោះរដ្ឋបាលខេត្តបន្ទាយមានជ័យ ដែលបានធ្វើជាម្ចាស់ផ្ទះរៀបចំវគ្គនេះប្រកបដោយជោគជ័យ។ ឯកឧត្តមបានបញ្ជាក់ថា “ការបង្កើត និងការប្រើប្រាស់ប្រព័ន្ធគ្រប់គ្រងទិន្នន័យបណ្ដឹងនេះ គឺជាផ្នែកមួយនៃការកែទម្រង់ស៊ីជម្រៅរបស់រាជរដ្ឋាភិបាលកម្ពុជា ក្រោមការដឹកនាំរបស់ក្រសួងមហាផ្ទៃ សំដៅពង្រឹងយន្តការដោះស្រាយបញ្ហា និងបណ្ដឹងសាទុក្ខរបស់ប្រជាពលរដ្ឋ។ គោលបំណងចម្បង គឺដើម្បីកាត់បន្ថយគម្លាតរវាងអាជ្ញាធរ និងប្រជាពលរដ្ឋ តាមរយៈការផ្ដល់សេវាសាធារណៈប្រកបដោយភាពងាយស្រួល ប្រសិទ្ធភាព និងភាពជឿជាក់”។

ឯកឧត្តមក៏បានគូសបញ្ជាក់ផងដែរថា ប្រព័ន្ធនេះមិនត្រឹមតែជួយសម្រួលដល់ការគ្រប់គ្រងបណ្ដឹងប៉ុណ្ណោះទេ ប៉ុន្តែក៏ជាប្រភពទិន្នន័យដ៏សំខាន់សម្រាប់ធ្វើការវិភាគ និងរៀបចំគោលនយោបាយនានា ដើម្បីឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋ។ 

ឯកឧត្តមបានបន្ថែមថា“យើងត្រូវធានាថា រាល់បណ្ដឹងទាំងអស់ត្រូវបានកត់ត្រា បញ្ជូន និងដោះស្រាយដោយតម្លាភាព និងគណនេយ្យភាព។ មន្ត្រីដែលទទួលបន្ទុកការិយាល័យប្រជាពលរដ្ឋ គឺមានតួនាទីសំខាន់ណាស់ក្នុងការធ្វើជាស្ពានតភ្ជាប់រវាងប្រជាពលរដ្ឋ និងអាជ្ញាធរ។ ការប្រើប្រាស់ប្រព័ន្ធឌីជីថលនេះ នឹងជួយឱ្យការងាររបស់យើងកាន់តែមានលក្ខណៈវិទ្យាសាស្ត្រ និងទាន់សម័យ។”

ការរំពឹងទុកក្នុងរយៈពេលពីរថ្ងៃនៃវគ្គតម្រង់ទិសនេះ មន្ត្រីចូលរួមនឹងទទួលបានការបណ្ដុះបណ្ដាលស៊ីជម្រៅអំពី របៀបប្រើប្រាស់មុខងារសំខាន់ៗនៃប្រព័ន្ធគ្រប់គ្រងទិន្នន័យបណ្ដឹង។ នីតិវិធីនៃការទទួល ចុះបញ្ជី និងតាមដានបណ្ដឹង, ការប្រើប្រាស់ទិន្នន័យដើម្បីវិភាគ និងរៀបចំរបាយការណ៍ ,ការធានាសុវត្ថិភាព និងភាពឯកជននៃទិន្នន័យ។

ការរៀបចំវគ្គនេះ គឺស្របតាមគោលនយោបាយរបស់រាជរដ្ឋាភិបាលក្នុងការជំរុញការប្រើប្រាស់បច្ចេកវិទ្យាព័ត៌មាន និងឌីជីថលភាវូបនីយកម្ម ដើម្បីលើកកម្ពស់អភិបាលកិច្ចល្អ និងប្រសិទ្ធភាពនៃការបម្រើសេវាសាធារណៈជូនប្រជាពលរដ្ឋ។ ការិយាល័យប្រជាពលរដ្ឋក្រុង-ស្រុក ត្រូវបានរំពឹងថានឹងអាចអនុវត្តប្រព័ន្ធថ្មីនេះ ប្រកបដោយប្រសិទ្ធភាពខ្ពស់ បន្ទាប់ពីបញ្ចប់វគ្គបណ្ដុះបណ្ដាលនេះ។

វគ្គតម្រង់ទិសនេះ មិនត្រឹមតែជាការផ្ដល់ចំណេះដឹងផ្នែកបច្ចេកទេសប៉ុណ្ណោះទេ ប៉ុន្តែក៏ជាវេទិកាមួយសម្រាប់មន្ត្រីមកពីខេត្តនានាអាចផ្លាស់ប្ដូរបទពិសោធន៍ និងសិក្សាពីគ្នាទៅវិញទៅមក ដើម្បីពង្រឹងសមត្ថភាពរួមក្នុងការបម្រើប្រជាពលរដ្ឋឱ្យកាន់តែល្អប្រសើរ៕

ដោយ៖ ឈុនសារ៉ាត