AKP ភ្នំពេញ ថ្ងៃទី១៦ ខែកក្កដា ឆ្នាំ២០២៥-- «ការចូលរួមរបស់បងប្អូនប្រជាពលរដ្ឋ ក្នុងការទទួលយកកូនឈើទៅដាំតាមសហគមន៍ និងដាំស្តារព្រៃ មិនត្រឹមតែបង្កើនភាពបៃតង បង្កើនគម្របព្រៃឈើ និងបន្ស៊ាំនឹងការប្រែប្រួលអាកាសធាតុ។ លើសពីនេះ ដើមឈើដែលបានដាំនៅពេលនេះនឹងក្លាយជាព្រៃឈើ និងកេរដំណែលធម្មជាតិ សម្រាប់កូនចៅជំនាន់ក្រោយ ហើយក័ជាផ្នែកមួយនៃការអភិវឌ្ឍគោលដៅលំហែបៃតង ដែលទាក់ទាញទេសចរ នាពេលអនាគតផងដែរ»។ នេះគឺជាការលើកឡើងរបស់ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំព្រះធាតុ ស្រុកអូររាំងឪ ខេត្តត្បូងឃ្មុំ។

បញ្ជាក់ចំពោះមុខថ្នាក់ដឹកនាំនៃរដ្ឋបាលថ្នាក់ក្រោមជាតិ រដ្ឋបាលស្រុកអូររាំងឪ អាជ្ញាធរមូលដ្ឋាន កងកម្លាំងប្រដាប់អាវុធ រួមជាមួយសិស្សានុសិស្ស លោកគ្រូ អ្នកគ្រូ ព្រះសង្ឃ ក្រុមយុវជន និងប្រជាពលរដ្ឋនៅ ឃុំព្រះធាតុ ស្រុកអូររាំងឪ ខេត្តត្បូងឃ្មុំ និងមកពីឃុំពង្រ ស្រុកកោះសូទិន ខេត្តកំពង់ចាម នាថ្ងៃទី១៦ ខែកក្កដា ឆ្នាំ២០២៥ ឯកឧត្តម ខ្វៃ អាទិត្យា បានឱ្យដឹងថា ការចូលរួមដាំដើមឈើនៅមូលដ្ឋានគ្រប់ទីកន្លែង រួមចំណែកជំរុញលើកទឹកចិត្តប្រជាសហគមន៍ ចូលរួម ក្នុងសកម្មភាពយុទ្ធនាការ ពិពរណ៍«ពន្លកបៃតង» ចែកកូនឈើដោយឥតគិតថ្លៃ ជូនប្រជាពលរដ្ឋយកទៅដាំ និងរួមជាមួយព្រឹត្តិការណ៍ដាំកូនត្នោត១លានដើម ក្នុងឆ្នាំ២០២៥ ដែលគ្រោងរៀបចំឡើងដោយក្រសួងបរិស្ថាន ចាប់ពីថ្ងៃទី០៥-០៧ ខែសីហា ឆ្នាំ២០២៥ នៅវិមានឈ្នះឈ្នះ រាជធានីភ្នំពេញ។

ឯកឧត្តមបានវាយតម្លៃខ្ពស់ចំពោះកិច្ចការងាររបស់អាជ្ញាធរមូលដ្ឋានគ្រប់ថ្នាក់ ក្នុងខេត្តត្ពូងឃ្មុំ និងជាពិសេសប្រជាពលរដ្ឋទូទាំងប្រទេស បានចូលរួម ចូលរួមការពារ និងអភិរក្សធានធានធម្មជាតិ និងបានតម្កល់ផលប្រយោជន៍ជាតិ ផលប្រយោជន៍បរិស្ថាន ដើម្បីបង្កើនជីវភាពសហគមន៍។ ក្រោមម្លប់សន្តិភាព និងការអភិវឌ្ឍជឿនលឿនលើគ្រប់វិស័យ ដែលថ្នាក់ដឹកនាំនៃរាជរដ្ឋាភិបាលកន្លងមក របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភានៃ ព្រះរាជាណាចក្រកម្ពុជា និងការដាក់ចេញគោលនយោបាយ និងយុទ្ធសាស្រ្តច្បាស់លាស់ របស់រាជរដ្ឋាភិបាល នីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ឆ្ពោះទៅសម្រេចទស្សនវិស័យឆ្នាំ២០៥០ កម្ពុជាជាប្រទេសមានចំណូលខ្ពស់ និងអព្យាក្រឹតកាបូន។

ជាមួយគ្នានេះ ឯកឧត្តមបានលើកឡើងពីសារៈសំខាន់នៃការដឹកនាំរបស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ក្នុងការដាក់ចេញយុទ្ធសាស្រ្តចក្រាវិស័យបរិស្ថាន ក្នុងនោះមានយុទ្ធនាការ «ពន្លកបៃតង» ជំរុញការដាំដើមឈើឱ្យបានច្រើន នៅតាមតំបន់ព្រៃរិចរិល តំបន់សហគមន៍ ដែលផ្តល់គម្របបៃតង ផ្តល់ជាស្បៀង សម្រស់របស់មូលដ្ឋាន ទៅដល់ភ្ញៀវទេសចរ និងប្រាក់ចំណូលជូនប្រជាពលរដ្ឋ ក្នុងតំបន់ នៅពេលរុក្ខជាតិទាំងអស់នេះ ដុះលូតលាស់ធំឡើង។ 

ឯកឧត្តមបានបន្ថែមថា សកម្មភាពទាំងនេះក៏ជាការចូលរួមធ្វើឱ្យប្រជាពលរដ្ឋឈប់ចូលព្រៃកាប់ឈើ ឈប់ប្រមាញ់សត្វព្រៃ ដូចមុន ហើយងាកមកជាអ្នកចូលរួមអភិរក្ស ថែរក្សាព្រៃឈើ ដើម្បីការពារធនធានធម្មជាតិ និងរៀបចំគោលដៅលំហែបៃតង ជាគួរទីទាក់ទាញ និងបន្សល់ទុកសម្រាប់កូនចៅ តជំនាន់ក្រោយៗទៀត។

សូមបញ្ជាក់ថា រដ្ឋបាលស្រុកអូររាំងឪ ខេត្តត្បូងឃ្មុំ មានគម្រោងដាំកូនឈើតាមមូលដ្ឋាន តាមដងផ្លូវ ចំនួនប្រមាណ១ម៉ឺនដើម ក្នុងឆ្នាំ២០២៥ ហើយដោយឡែកនៅក្នុងឃុំព្រះធាតុ នៅថ្ងៃនេះ ក្រុមការងារក្រសួងបរិស្ថាន រួមជាមួយអាជ្ញាធរ និងប្រជាពលរដ្ឋ បានដាំកូនឈើអមសងខាងផ្លូវ និងតាមគេហដ្ឋានចំនួន១០០០ដើម៕

ដោយ៖ មករា