AKP បន្ទាយមានជ័យ ថ្ងៃទី១៦ ខែកក្កដា ឆ្នាំ២០២៥--

លោកស្រី រស់ សុផានី អភិបាលរងខេត្តបន្ទាយមានជ័យ និងជាប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត (គ.ខ.ប.ជ) តំណាងឯកឧត្តម អ៊ុ រាត្រី អភិបាលនៃគណៈអភិបាលខេត្ត បានលើកឡើងថា អំពើជួញដូរមនុស្សនៅតែជាបញ្ហាប្រឈមដ៏ធំមួយដែលទាមទារឱ្យមានការយកចិត្តទុកដាក់ខ្ពស់ពីគ្រប់ភាគី និងបានអំពាវនាវដល់ប្រជាពលរដ្ឋ ជាពិសេសយុវជន ឱ្យបង្កើនការប្រុងប្រយ័ត្នចំពោះការបោកបញ្ឆោតគ្រប់រូបភាព ដែលអាចនាំឱ្យធ្លាក់ចូលក្នុងអន្ទាក់ជួញដូរមនុស្ស។

ការថ្លែងយ៉ាងដូច្នេះក្នុងឱកាសដែលលោកស្រីបានអញ្ជើញក្នុងកម្មវិធីអប់រំ និងផ្សព្វផ្សាយស៊ីជម្រៅស្តីពីការទប់ស្កាត់អំពើជួញដូរមនុស្ស ការធ្វើចំណាកស្រុកប្រកបដោយសុវត្ថិភាព សុវត្ថិភាពកុមារតាមប្រព័ន្ធអនឡាញ និងការទប់ស្កាត់ការរៀបអាពាហ៍ពិពាហ៍នៅវ័យក្មេង និងការមានផ្ទៃពោះនៅវ័យជំទង់នៅសាលាបឋមសិក្សា ហ៊ុន សែន សុភី ក្រុងសិរីសោភ័ណ ខេត្តបន្ទាយមានជ័យ នាព្រឹកថ្ងៃទី១៦ ខែកក្កដា ឆ្នាំ២០២៥។ កម្មវិធីនេះមានការចូលរួមយ៉ាងផុសផុលពីមន្ទីរអង្គភាពពាក់ព័ន្ធ តំណាងស្នងការនគរបាលខេត្ត សមាជិកក្រុមប្រឹក្សាក្រុង អភិបាលក្រុង ភូមិ ឃុំ លោកគ្រូអ្នកគ្រូ សិស្សានុសិស្ស និងប្រជាពលរដ្ឋ សរុបប្រមាណជាង ២៤០នាក់ ក្នុងនោះស្រី ១០០នាក់។

ថ្លែងក្នុងឱកាសនោះ លោកស្រី រស់ សុផានី បានណែនាំឱ្យប្រជាពលរដ្ឋដែលចង់ធ្វើចំណាកស្រុកទៅក្រៅប្រទេសដើម្បីស្វែងរកការងារ ត្រូវតែស្វែងយល់ឱ្យបានច្បាស់លាស់ពីនីតិវិធីផ្លូវច្បាប់ និងធ្វើការតាមរយៈក្រុមហ៊ុន ឬភ្នាក់ងារស្របច្បាប់ ដើម្បីចៀសវាងការប្រឈមមុខនឹងហានិភ័យដូចជា ការកេងប្រវ័ញ្ចកម្លាំងពលកម្ម ឬការជួញដូរ។

ជាមួយនឹងការរីកចម្រើននៃបច្ចេកវិទ្យា លោកស្រីបានបង្ហាញការព្រួយបារម្ភចំពោះសុវត្ថិភាពកុមារនៅលើបណ្តាញសង្គម និងអ៊ីនធឺណិត និងបានអំពាវនាវដល់មាតាបិតា អ្នកអាណាព្យាបាល និងគ្រូបង្រៀន ឱ្យយកចិត្តទុកដាក់តាមដាន និងអប់រំកុមារឱ្យប្រើប្រាស់អ៊ីនធឺណិតប្រកបដោយការទទួលខុសត្រូវ និងប្រុងប្រយ័ត្នចំពោះមាតិកាដែលមិនសមរម្យ ឬការបោកបញ្ឆោតតាមរយៈអនឡាញ។

លោកស្រីបានលើកឡើងទៀតថា បញ្ហាទាំងនេះនៅតែជាក្តីកង្វល់នៅក្នុងសង្គម ដែលអាចបង្កផលប៉ះពាល់យ៉ាងធ្ងន់ធ្ងរដល់សុខភាពផ្លូវកាយ ផ្លូវចិត្ត និងអនាគតរបស់កុមារី និងយុវតី។ លោកស្រីបានជំរុញឱ្យមានការអប់រំផ្លូវភេទឱ្យបានទូលំទូលាយ និងការផ្សព្វផ្សាយពីផលវិបាកនៃការរៀបអាពាហ៍ពិពាហ៍នៅវ័យក្មេង ដើម្បីលើកកម្ពស់សុខុមាលភាពគ្រួសារ និងសង្គម។

ចំណែក លោក ស្រេង សុផល អភិបាលក្រុងសិរីសោភ័ណ ក៏បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំខេត្តដែលបានយកចិត្តទុកដាក់រៀបចំកម្មវិធីអប់រំដ៏មានសារៈប្រយោជន៍នេះឡើងនៅមូលដ្ឋានរបស់លោក។ លោកបានសង្កត់ធ្ងន់ថា ចំណេះដឹងដែលទទួលបានពីកម្មវិធីនេះ គឺពិតជាមានតម្លៃណាស់សម្រាប់ប្រជាពលរដ្ឋ ជាពិសេសសិស្សានុសិស្ស ដើម្បីការពារខ្លួនពីហានិភ័យផ្សេងៗ និងចូលរួមចំណែកកសាងសហគមន៍ឱ្យកាន់តែរឹងមាំ និងមានការអភិវឌ្ឍ។

កម្មវិធីអប់រំ និងផ្សព្វផ្សាយនេះ ត្រូវបានរំពឹងថានឹងជួយបង្កើនការយល់ដឹង និងសមត្ថភាពរបស់ប្រជាពលរដ្ឋ ពិសេសយុវជន និងកុមារ ក្នុងការការពារខ្លួនពីបញ្ហាប្រឈមទាំងនេះ និងចូលរួមចំណែកយ៉ាងសកម្មក្នុងការកសាងសង្គមមួយដែលកាន់តែមានសុវត្ថិភាព និងការអភិវឌ្ឍប្រកបដោយចីរភាព៕

ដោយ ឈុន សារ៉ាត