AKP កំពង់ស្ពឺ ថ្ងៃទី០៥ ខែកក្កដា ឆ្នាំ២០២៥-- មន្ទីរអភិវឌ្ឍន៍ជនបទខេត្តកំពង់ស្ពឺបានរៀបចំកិច្ចប្រជុំបូកសរុបលទ្ធផលការងារប្រចាំត្រីមាសទី២ និងលើកទិសដៅការងារត្រីមាសទី៣ ឆ្នាំ២០២៥ របស់មន្ទីរអភិវឌ្ឍន៍ជនបទខេត្តកំពង់ស្ពឺ កាលពីថ្ងៃទី០៤ ខែកក្កដា ឆ្នាំ២០២៥ ក្រោមអធិបតីភាព ឯកឧត្តមបណ្ឌិត សួស គង់ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ប្ញទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ឯកឧត្តម សុខ ម៉េង អនុរដ្ឋលេខាធិការ និងឯកឧត្តម អ៊ុក ផាន់ ទីប្រឹក្សាក្រសួងអភិវឌ្ឍន៍ជនបទ ដោយមានការចូលរួមផងដែរពី ថ្នាក់ដឹកនាំ និងមន្ត្រីរាជការ នៃមន្ទីរអភិវឌ្ឍន៍ជនបទខេត្ត សរុបចំនួន ៤៦នាក់។

បន្ទាប់ពីមតិស្វាគមន៍និងរបាយការណ៍បូកសរុបលទ្ធផលការងារប្រចាំត្រីមាសទី២ និងទិសដៅការងារបន្តសម្រាប់ត្រីមាសទី៣ ឆ្នាំ២០២៥រួចមក ឯកឧត្តម សួស គង់ បានធ្វើការកោតសរសើរ និងវាយតម្លៃខ្ពស់ចំពោះមន្រ្តីអភិវឌ្ឍន៍ជនបទដែលខិតខំប្រឹងប្រែងសហការរួមគ្នាយ៉ាងជិតស្និត មានផែនការមេច្បាស់លាស់ កំណត់អាទិភាពនិងដាក់មធ្យោបាយរួម មានការគិតគូរជាលក្ខណៈបុរេសកម្ម ស្តែងចេញជាលទ្ធផលជួយដល់ប្រជាជននៅមូលដ្ឋានឱ្យមានជីវភាពប្រសើរឡើង មានភោគផលសេដ្ឋកិច្ច និងលើកទឹកចិត្តឱ្យបន្តការងារនេះ ដើម្បីជំរុញឱ្យមានសន្ទុះលឿនជាងមុនបន្ថែមទៀត។

ក្នុងឱកាសនោះដែរ ឯកឧត្តមរដ្ឋលេខាធិការ បានផ្តល់ជាអនុសាសន៍មួយចំនួនជូនដល់មន្ទីរអភិវឌ្ឍន៍ជនបទសម្រាប់យកទៅអនុវត្តបន្តរួមមាន៖ ១. សូមកោតសសើរ និងវាយតម្លៃខ្ពស់ចំពោះសមិទ្ធផល និងវឌ្ឍនភាពការងារដែលមន្ទីរសម្រេចបានក្នុងត្រីមាសទី២ ឆ្នាំ២០២៥។ ២. ខិតខំបន្តយកចិត្តទុកដាក់ក្នុងការអនុវត្តភារកិច្ចការងារស្របតាមផែនការយុទ្ធសាស្រ្តដែលក្រសួងបានដាក់ជូន។ ៣. បន្តពង្រឹងអនុវត្តបទបញ្ជាផ្ទៃក្នុង និងរក្សានូវសាមគ្គីភាពផ្ទៃក្នុងឱ្យបានល្អប្រសើរ ជាពិសេសលើកទឹកចិត្តដល់បងប្អូនមន្រ្តីរាជការដែលមានពិការភាព មន្រ្តីរាជការជាស្រ្តីមានផ្ទៃពោះ និងមន្រ្តីចាស់ៗ។ ៤. បន្តយកចិត្តទុកដាក់ ត្រួតពិនិត្យ ដោះស្រាយរាល់បញ្ហាប្រឈម និងសំណើសំណូមពររបស់បងប្អូនប្រជាពលរដ្ឋ ស្របតាមអនុសាសន៍របស់សម្តេចធិបតី  “ធ្វើឱ្យលឿន ធ្វើឱ្យលះ បើស្ទះសុំគោលការណ៍”។ ៥. បន្តយកចិត្តទុកដាក់ក្នុងការពង្រឹងនូវគុណភាពផ្លូវជនបទ និងសំណង់សិល្បការ ដោយស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចធិបតី នាយករដ្ឋមន្រ្តី គឺ “ពង្រឹង ៧០ភាគរយ និងពង្រីក ៣០ភាគរយ”។ ៦. បន្តយកចិត្តទុកដាក់លើអនាម័យទឹក និងការប្រើប្រាស់បង្គន់អនាម័យ ជាពិសេសប្រជាពលរដ្ឋដែលបានការខ្វះខាត និងជំរុញលើកទឹកចិត្តដើម្បីសម្រេចបានជ័យលាភី ODF+ ក្នុងពេលខាងមុខ។ ៧. បន្ត និងជំរុញលើកទឹកចិត្តក្នុងការចូលរួមផ្សព្វផ្សាយនូវសមិទ្ធផលដែលក្រសួង និងមន្ទីរបានសម្រេចបានជូនបងប្អូនប្រជាពលរដ្ឋ តាមរយៈការចែករំលែកនិងតាមដានលើបណ្តាញសង្គមជាប្រចាំ។

បន្ទាប់ពីកិច្ចប្រជុំនៅមន្ទីរអភិវឌ្ឍន៍ជនបទខេត្ត រួចមក ឯកឧត្តមបណ្ឌិត សួស គង់ និងសហការី បានចុះ ពិនិត្យស្ថានភាពភូមិគំរូ ដែលជាភូមិធ្លាប់ បានចូលរួម ក្នុងគម្រោង "ចលនាភូមិថ្មី" គឺ ភូមិត្រពាំងលើក សង្កាត់ច្បារមន ក្រុងច្បារមន។ ឯកឧត្តមបណ្ឌិតក៏បានជួបសំណេះសំណាល ជាមួយគណៈកម្មាធិការអភិវឌ្ឍន៍ភូមិ(គ.អ.ភ) និងប្រជាពលរដ្ឋចំនួន១៥នាក់  ហើយចុះពិនិត្យគ្រួសារកសិករចិញ្ចឹមកណ្តូប ចិញ្ចឹមមាន់  និងសួនដំណាំបន្លែចម្រុះ ថែមទៀតផង៕

ដោយ លឹម សាន្ត