AKP តាកែវ ថ្ងៃទី០៤ ខែកក្កដា ឆ្នាំ២០២៥-- នៅភូមិបាក់ដៃ ឃុំគោកធ្លក ស្រុកអង្គបូរី ខេត្តតាកែវ នាថ្ងៃទី០៤ ខែកក្កដា ឆ្នាំ២០២៥ សាខាកាកបាទក្រហមកម្ពុជាខេត្តតាកែវបានរៀបចំពិធីចុះសួរសុខទុក្ខ និងនាំយកអំណោយមនុស្សធម៌ចែកជូនដល់គ្រួសារប្រជាពលរដ្ឋរងគ្រោះដោយខ្យល់កន្ត្រាក់ធ្វើឱ្យប៉ះពាល់ដល់ផ្ទះបងប្អូនប្រជាពលរដ្ឋចំនួន១០ខ្នងផ្ទះ ដោយមានការចូលរួមពីលោក យឹម ច័ន្ទថន នាយកប្រតិបត្តិសាខាកាកបាទក្រហមកម្ពុជាខេត្តតាកែវ លោក ឈឹម ធី អភិបាលរងស្រុកអង្គរបូរី ព្រមទាំងមន្ត្រីសាខា អនុសាខាកាកបាទក្រហមកម្ពុជាខេត្ត-ស្រុក ចូលរួមជាច្រើនរូបផងដែរ។

មានប្រសាសន៍សំណេះសំណាលក្នុងពិធីនោះ លោក យឹម ច័ន្ទថន បានពាំនាំការផ្ដាំផ្ញើសាកសួរសុខទុក្ខពីសំណាក់ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណ:កម្មាធិការសាខាកាកបាទក្រហមកម្ពុជាខេត្តតាកែវ ជាពិសេសពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែយកចិត្តទុកដាក់គិតគូរអំពីសុខទុក្ខ បងប្អូនប្រជាពលរដ្ឋដែលរងគ្រោះ និងងាយរងគ្រោះ នៅគ្រប់ទីកន្លែង ដោយមិនប្រកាន់និន្នាការ ពូជសាសន៍ សាសនា អ្វីឡើយ ដូចពាក្យស្លោកលើកឡើងថា“កាកបាទក្រហមកម្ពុជាមានគ្រប់ទីកន្លែងសម្រាប់គ្រប់គ្នា មិនទុកនរណាម្នាក់ចោលឡើយ” និងពាក្យស្លោក “ទីណាមានការលំបាកទីនោះមានកាកបាទក្រហមកម្ពុជា”។

លោក យឹម ច័ន្ទថន បានមានប្រសាសន៍បន្តថា ឱ្យតែបងប្អូនប្រជាពលរដ្ឋជួបកាលំបាក កាកបាទក្រហមកម្ពុជាតែងតែចុះយកអំណោយចែកជូនបងប្អូនភ្លាមៗ ដោយមិនទុកឱ្យបងប្អូនជួបការលំបាកកាន់តែធ្ងន់ធ្ងរជាងនេះនោះទេ។ ពោលគឺត្រូវធ្វើយ៉ាងណាឱ្យបងប្អូនប្រជាពលរដ្ឋរងគ្រោះ ហើយជួបប្រទះការលំបាកខ្វះខាត បានហូបចុកគ្រប់គ្រាន់ និងមានជីវភាពរស់នៅបានសមរម្យ។

លោកនាយកប្រតិបត្តិសាខាបានធ្វើការអំពាវនាវសូមឱ្យបងប្អូនប្រជាពលរដ្ឋទាំងអស់ ត្រូវយកចិត្តទុកដាក់គិតគូរជានិច្ចពីសុខភាពអនាម័យ ហូបស្អាត ផឹកស្អាត រស់នៅស្អាត និងសុវត្ថិភាពផ្ទាល់ខ្លួន។ហើយបានលើកឡើងអំពីភូមិឃុំសុវត្ថិភាព ជាពិសេសបញ្ហាគ្រោះថ្នាក់ចរាចរណ៍ សូមបងប្អូនប្រជាពលរដ្ឋត្រូវយកចិត្តទុកដាក់អំពីសុវត្ថិភាពជាចម្បង។ សូមបងប្អូនកាត់បន្ថយការប្រើប្រាស់ថង់ប្លាស្ទិក ការប្រុងប្រយ័ត្នអំពីអគ្គិភ័យដែលអាចកើតមានដោយយថាហេតុ ការធ្វើចំណាកស្រុកប្រកបដោយសុវត្ថិភាព ការការពារកូនចៅពីជំងឺគ្រុនឈាម ការចូលរួមដាំដើមឈើតាមមូលដ្ឋានអោយបានគ្រប់ៗគ្នា ជាពិសេសសូមប្រុងប្រយ័ត្នអំពីបាតុភូតធម្មជាតិផ្សេងៗ និងការប្រែប្រួលអាកាសធាតុផងដែរ។

សូមជម្រាបជូនថា អំណោយដែលបានចែកជូនដល់គ្រួសារបងប្អូនប្រជាពលរដ្ឋរងគ្រោះដោយខ្យល់កន្ត្រាក់ទាំង១០គ្រួសារនោះ ក្នុងមួយគ្រួសារៗទទួលបាន អង្ករ២៥គីឡូក្រាម មុង១ ភួយ១ សារុង១ ក្រមា១ កន្ទេល១ ត្រីខ១យួរ មី១កេស ប្រេងឆា១លីត្រ នំ១ប្រអប់ធំ ទឹកត្រី៣ដប ទឹកស៊ីអ៊ីវ៣ដប និងថវិកាមួយចំនួនទៀត៕

ដោយ អ៊ុច សៀង