AKP បន្ទាយមានជ័យ ថ្ងៃទី០២ ខែមិថុនា ឆ្នាំ២០២៥--

ឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ នៅថ្ងៃទី០២ ខែមិថុនា ឆ្នាំ២០២៥ បានដឹកនាំក្រុមការងារ និងចុះបញ្ជាផ្ទាល់ក្នុងការប្រើប្រាស់គ្រឿងចក្រ ដើម្បីធ្វើអន្តរាគមន៍កាយបើកផ្លូវទឹកនៅចំណុចស្ពានទី២ (ផ្លូវជាតិលេខ៦) ក្រុងសិរីសោភ័ណ។ សកម្មភាពនេះធ្វើឡើងក្នុងគោលបំណងរំដោះទឹកពីផ្នែកខាងលើដែលកំពុងកើនឡើងជាបណ្ដើរៗនៅក្នុងសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដោយសារជំនន់ទឹកភ្លៀង។

ឯកឧត្ដម អ៊ុ រាត្រី បានមានប្រសាសន៍ថា ស្ថានភាពទឹកភ្លៀងនៅប៉ុន្មានថ្ងៃចុងក្រោយនេះ បានធ្វើឱ្យចំណុចមួយចំនួនក្នុងខេត្ត ចាប់ផ្ដើមរងផលប៉ះពាល់ ជាពិសេសនៅតំបន់ទំនាបក្នុងសង្កាត់កំពង់ស្វាយ។ «យើងចាំបាច់ត្រូវតែចាត់វិធានការជាបន្ទាន់ ដើម្បីទម្លាក់ទឹកទៅផ្នែកខាងក្រោម កុំឱ្យជន់់លិចលំនៅឋាន និងផលដំណាំរបស់ប្រជាពលរដ្ឋ។ ការបើកផ្លូវទឹកត្រង់ចំណុចស្ពានទី២នេះ គឺជាដំណោះស្រាយបឋមដ៏សំខាន់មួយ ដើម្បីសម្រួលលំហូរទឹក និងកាត់បន្ថយសម្ពាធទឹកនៅផ្នែកខាងលើ»។

ឯកឧត្ដមអភិបាលខេត្តក៏បានជំរុញឱ្យអាជ្ញាធរពាក់ព័ន្ធទាំងអស់ ត្រូវបន្តតាមដានយ៉ាងយកចិត្តទុកដាក់លើស្ថានភាពទឹក និងត្រៀមលក្ខណៈអន្តរាគមន៍បានទាន់ពេលវេលា ប្រសិនបើមានករណីចាំបាច់កើតឡើង និងបានសង្កត់ធ្ងន់ពីសារៈសំខាន់នៃកិច្ចសហប្រតិបត្តិការរវាងអាជ្ញាធរ និងប្រជាពលរដ្ឋក្នុងការទប់ស្កាត់ និងដោះស្រាយបញ្ហាទឹកជំនន់នេះ។

ប្រជាពលរដ្ឋដែលរស់នៅជុំវិញតំបន់សង្កាត់កំពង់ស្វាយ បានបង្ហាញការកោតសរសើរ និងថ្លែងអំណរគុណយ៉ាងជ្រាលជ្រៅចំពោះឯកឧត្ដមអភិបាលខេត្ត ដែលបានចុះមកពិនិត្យ និងចាត់វិធានការដោះស្រាយបញ្ហាទឹកជំនន់នេះដោយផ្ទាល់។

លោក នួន សារ៉ាត់ ជាប្រជាពលរដ្ឋម្នាក់នៅភូមិកំពង់ស្វាយ បានឱ្យដឹងថា «យើងពិតជាសប្បាយចិត្តណាស់ដែលឃើញឯកឧត្ដម អភិបាលខេត្តយកចិត្តទុកដាក់ដល់ទុក្ខលំបាករបស់ពួកយើង។ កាលពីឆ្នាំមុនៗ ពេលទឹកឡើងគឺលំបាកខ្លាំងណាស់ ព្រោះទឹកហូរមិនទាន់។ តែឥឡូវនេះ មានការកាយបើកផ្លូវទឹកបែបនេះ ពួកយើងសង្ឃឹមថា ស្ថានភាពនឹងប្រសើរឡើងវិញ»។

ចំណែកឯ លោកស្រី សុខា អាយុ ៤៥ឆ្នាំ ដែលមានផ្ទះនៅក្បែរស្ពាននោះដែរ ក៏បានបន្ថែមថា «ការអន្តរាគមន៍បានលឿនបែបនេះ គឺពិតជាជួយបានច្រើនណាស់ ព្រោះទឹកទើបតែចាប់ផ្ដើមឡើង ហើយបើមិនមានវិធានការទាន់ពេលទេ ប្រាកដជាលិចផ្ទះសម្បែងមិនខាន។ ពួកខ្ញុំសូមអរគុណដល់ឯកឧត្ដម អ៊ុ រាត្រី និងក្រុមការងារទាំងអស់»។

សកម្មភាពអន្តរាគមន៍រំដោះទឹកជំនន់ទឹកភ្លៀងនេះបានបង្ហាញពីការយកចិត្តទុកដាក់របស់អាជ្ញាធរខេត្តបន្ទាយមានជ័យ ក្នុងការដោះស្រាយបញ្ហាប្រឈមរបស់ប្រជាពលរដ្ឋ ជាពិសេសក្នុងរដូវវស្សាដែលតែងតែកើតមានបញ្ហាទឹកជំនន់ជាយថាហេតុ៕

ដោយ ឈុន សារ៉ាត