AKP បន្ទាយមានជ័យ, ថ្ងៃទី០២ ខែឧសភា ឆ្នាំ២០២៦--ក្នុងស្មារតីបម្រើប្រជាពលរដ្ឋ និងឆ្លើយតបទៅនឹងតម្រូវការចាំបាច់នៃហេដ្ឋារចនាសម្ព័ន្ធមូលដ្ឋាន លោក ស្រេង សុផល អភិបាលនៃគណៈអភិបាលក្រុងសិរីសោភ័ណ បានអញ្ជើញជាអធិបតីក្នុងពិធីបើកការដ្ឋានសាងសង់ផ្លូវបេតុងអាមេចំនួន ២ខ្សែ ស្ថិតក្នុងសង្កាត់ព្រះពន្លា នាព្រឹកថ្ងៃសៅរ៍នេះ ដែលជាការឆ្លុះបញ្ចាំងពីវឌ្ឍនភាពមិនឈប់ឈរនៃរដ្ឋបាលថ្នាក់ក្រោមជាតិ។     
 គម្រោងស្ថាបនាផ្លូវថ្មីនេះ គឺជាសមិទ្ធផលដែលប្រើប្រាស់ កញ្ចប់ថវិកាមូលនិធិសង្កាត់ឆ្នាំ២០២៦ដោយផ្តោតលើគុណភាព និងភាពរឹងមាំ ទីតាំង ភូមិព្រះពន្លា និងភូមិ១ សង្កាត់ព្រះពន្លា ក្រុងសិរីសោភ័ណដែលមាន ប្រវែង ៧៩៩ ម៉ែត្រ ទទឹង ៥ ម៉ែត្រដោយចាក់បេតុងកម្រាស់ ០,១៥ ម៉ែត្រ (១តឹកកន្លះ) ធានាបាននូវការប្រើប្រាស់យូរអង្វែង និងធន់នឹងការដឹកជញ្ជូន។   

 
ថ្លែងក្នុងឱកាសនោះ លោក ស្រេង សុផល បានលើកឡើងពីឆន្ទៈដ៏មុតស្រួចរបស់រាជរដ្ឋាភិបាល ក៏ដូចជាអាជ្ញាធរខេត្ត-ក្រុង ក្នុងការកែប្រែជីវភាពរស់នៅរបស់ពលរដ្ឋតាមរយៈការអភិវឌ្ឍន៍ផ្លូវថ្នល់។ លោកបានសង្កត់ធ្ងន់ថាការកសាងផ្លូវពីផ្លូវដីដែលពិបាកធ្វើដំណើរ មកជាផ្លូវបេតុងអាមេរឹងមាំនាពេលនេះ គឺជាលទ្ធផលនៃសន្តិភាព និងការយកចិត្តទុកដាក់ខ្ពស់ពីថ្នាក់ដឹកនាំ ដើម្បីធានាថាប្រជាពលរដ្ឋមានភាពងាយស្រួលក្នុងការធ្វើដំណើរ និងជំរុញសេដ្ឋកិច្ចគ្រួសារឱ្យកាន់តែប្រសើរឡើង ស្របតាមការរីកចម្រើនរបស់ប្រទេសជាតិ។     
ជាមួយគ្នានេះ លោកអភិបាលក្រុង ក៏បានអំពាវនាវយ៉ាងទទូចដល់បងប្អូនប្រជាពលរដ្ឋដែលរស់នៅតាមដងផ្លូវដែលកំពុងស្ថាបនាសូមមេត្តាយោគយល់ និងអធ្យាស្រ័យ ចំពោះការរំខានក្នុងអំឡុងពេលសាងសង់។បង្កលក្ខណៈងាយស្រួល ដល់ក្រុមការងារបច្ចេកទេស ដើម្បីឱ្យការសាងសង់ប្រព្រឹត្តទៅបានលឿន និងតាមស្តង់ដារដែលបានកំណត់។    

ការបើកការដ្ឋាននាព្រឹកនេះ បានធ្វើឱ្យប្រជាពលរដ្ឋនៅក្នុងភូមិព្រះពន្លា និងភូមិ១ បង្ហាញនូវក្តីរំភើបយ៉ាងខ្លាំង។ តំណាងប្រជាពលរដ្ឋម្នាក់បានលើកឡើងថា កាលពីមុន ផ្លូវនេះពិបាកដើរណាស់ ជាពិសេសពេលភ្លៀងធ្លាក់មានភក់ និងរអិល។ ថ្ងៃនេះឃើញលោកអភិបាលក្រុងមកបើកការដ្ឋានចាក់បេតុងឱ្យ ពួកខ្ញុំសប្បាយចិត្តរកអ្វីប្រៀបមិនបានទេ។ ពួកខ្ញុំសន្យានឹងជួយសម្របសម្រួលឱ្យជាងធ្វើការឱ្យបានស្រួល ដើម្បីឱ្យបានផ្លូវស្អាតប្រើប្រាស់ឆាប់ៗ។ សមិទ្ធផលផ្លូវបេតុងទាំង ២ខ្សែនេះ មិនត្រឹមតែជួយសម្រួលដល់ការធ្វើដំណើរប៉ុណ្ណោះទេ ប៉ុន្តែវាក៏នឹងជួយលើកកម្ពស់សោភ័ណភាពក្រុងសិរីសោភ័ណ និងកាត់បន្ថយការចំណាយលើការថែទាំផ្លូវជារៀងរាល់ឆ្នាំផងដែរ៕

ដោយ ឈុន សារ៉ាត