AKP សៀមរាប ថ្ងៃទី០៦ ខែឧសភា ឆ្នាំ២០២៥ -- សាខាកាកបាទក្រហមកម្ពុជាខេត្តសៀមរាប បានរៀបចំរាត្រីសមោសរ ដើម្បីសប្បុរសធម៌ និងអបអរសាទរខួបលើទី១៦២ ទិវាពិភពលោកកាកបាទក្រហម-អឌ្ឍចន្ទក្រហម៨ឧសភា ឆ្នាំ២០២៥ និងខួបកំណើត៧០ឆ្នាំរបស់កាកបាទក្រហមកម្ពុជា សំដៅលើកកម្ពស់វិស័យមនុស្សធម៌ សម្រាប់ជួយគាំទ្រប្រជាពលរដ្ឋមានជីវភាពខ្វះខាតនិងគ្រោះមហន្តរាយ ដោយពិធីនេះបានប្រារព្ធឡើងនារាត្រីថ្ងៃទី០៥ ខែឧសភា ឆ្នាំ២០២៥ ក្រោមប្រធានបទ៖ រួមគ្នាស្ម័គ្រចិត្តដើម្បីសហគមន៍មានសុខភាពល្អ និងមានភាពធន់នឹងអាកាសធាតុ ក្រោមអធិបតីភាពដ៏ខ្ពង់ខ្ពស់សម្តេចពិជ័យសេនា នាយឧត្ដមសេនីយ៍ផុតលេខផ្កាយមាស៥ ទៀ បាញ់ ឧត្តមទីប្រឹក្សាផ្ទាល់ព្រះមហាក្សត្រ។

សម្តេចពិជ័យសេនា  ទៀ បាញ់ មានប្រសាសន៍ថា ការជួបជុំគ្នានៅពេលនេះពិតជាឆ្លើយតបទៅនឹងគោលដៅដ៏ឧត្តុង្គឧត្តមរបស់កាកបាទក្រហមកម្ពុជា ពិសេសបន្តនូវក្តីសង្ឃឹម និងភាពកក់ក្តៅដល់អ្នករងគ្រោះ និងអ្នកងាយរងគ្រោះបំផុត ដូចជាចាស់ជរាគ្មានទីពឹង ស្ត្រីមេម៉ាយក្រីក្រមានកូនច្រើន ជនពិការ កុមារកំព្រា អ្នករស់នៅជាមួយមេរោគអេដស៍ ដែលត្រូវការជំនួយឧបត្ថម្ភចាំបាច់។ តាមរយៈការចូលរួមឧបត្ថម្ភគាំទ្រពីសប្បុរសជនទាំងក្នុង និងក្រៅប្រទេស បានធ្វើឱ្យសាខាកាកបាទក្រហមកម្ពុជា ខេត្តសៀមរាបមានលទ្ធភាពគ្រប់គ្រាន់ក្នុងប្រតិបត្តិការមនុស្សធម៌ ជួយដល់ប្រជាពលរដ្ឋរងគ្រោះ ដោយឧបទ្ទវហេតុផ្សេងៗ  បានទាន់ពេលវេលានិងមានប្រសិទ្ធភាព។

សម្តេចពិជ័យសេនាបន្ថែមថា រយៈពេលកន្លងមកនេះ សាខាបានជួយដល់ប្រជាពលរដ្ឋរងគ្រោះ និងងាយរងគ្រោះបំផុត បានយ៉ាងរហ័សនៅគ្រប់ទីកន្លែង គ្រប់ពេលវេលា ដោយមិនមានភាពរើសអើង និងតម្លាភាពខ្ពស់។ ជាក់ស្តែងក្នុងឆ្នាំ២០២៤កន្លងទៅ បានជួយប្រជាពលរដ្ឋងាយរងគ្រោះដោយផ្ទាល់ និងតាមខ្នងផ្ទះ រួមទាំងប្រយោលជាង៥ម៉ឺន នាក់។សម្តេចពិជ័យសេនាក៏បានអំពាវនាវ ដល់សប្បុរសជនជិតឆ្ងាយ សូមបន្តជួយឧបត្ថម្ភគាំទ្រសាខាកាកបាទក្រហមកម្ពុជា ខេត្តសៀមរាប ដើម្បីឱ្យសាខា កាន់មានលទ្ធភាពពង្រីកប្រតិបត្តិការមនុស្សធម៌ប្រកបដោយប្រសិទ្ធភាព ជាពិសេស ធានាបាននូវការផ្គត់ផ្គង់ផ្នែកធនធានហិរញ្ញវត្ថុជាកត្តាចាំបាច់មិនអាចខ្វះបានសម្រាប់ការងារនេះ។ វប្បធម៌ចែករំលែកគឺជាប្រពៃណីដ៏ឧត្តុង្គឧត្តម របស់ប្រជាជាតិកម្ពុជាយើង។

ឯកឧត្តម ប្រាក់ សោភ័ណ អភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្តសៀមរាប បានបង្ហាញពីលទ្ធផលការងារឆ្នាំ២០២៤ និង៤ខែ ឆ្នាំ២០២៥ លើវិស័យអាទិភាពទាំងបួនរបស់សាខារួមមាន៖ ការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ  វិស័យអាទិភាព សុខភាព និងការថែទាំសុខភាពក្នុងសហគមន៍ វិស័យអាទិភាព ការលើកកម្ពស់គោលការណ៍គ្រឹះ និងតម្លៃមនុស្សធម៌និង វិស័យអាទិភាព ការអភិវឌ្ឍស្ថាប័ន។ក្នុងចំណោមវិស័យអាទិភាពទាំង០៤ ការងារគ្រប់គ្រងគ្រោះមហន្តរាយ សាខាកាកបាទក្រហមខេត្តបាន ចែកអំណោយសរុប ៤,៦១៨គ្រួសារ ក្នុងនោះ គ្រួសារងាយរងគ្រោះបំផុតចំនួន៣,៤៣៩ គ្រួសារ។ គ្រួសាររងគ្រោះដោយមហន្តរាយ ១,១៧៩គ្រួសារ។ ការស្តារឡើងវិញ សង់ផ្ទះមនុស្សធម៌ជូនគ្រួសារក្របំផុតចំនួន ៥ខ្នង។ជួសជុលដំបូលផ្ទះចំនួន ១ខ្នង។ឧបត្ថម្ភសង្កសីដល់គ្រួសាររងគ្រោះដោយខ្យល់កន្រ្តាក់ចំនួន៩,៧៥៤សន្លឹក និងតង់កៅស៊ូចំនួន ៩ផ្ទាំង។

ជាមួយគ្នានោះ  សាខាកាកបាទក្រហមខេត្ដបានធ្វើបច្ចុប្បន្នភាពទិន្នន័យគ្រួសារងាយរងគ្រោះបំផុតទាំង ១៣ក្រុង-ស្រុក សរុប១៧,៨៥២គ្រួសារ និងរៀបចំក្រុមតេឡេក្រាម២ សម្រាប់ទំនាក់ទំនងការងារគ្រោះមហន្តរាយ៕

ដោយ ឃុត សៅ