AKP ភ្នំពេញ ថ្ងៃទី០៦ ខែឧសភា ឆ្នាំ២០២៥-- មន្រ្តីអង្គការ MCC បានឱ្យដឹងនៅថ្ងៃទី០៥ ខែឧសភា ឆ្នាំ២០២៥ថា ប្រមាណជា១ខែមុន អ្នកជ្រមុជខ្យល់របស់យើងទាំង៤នាក់ដែលជាអតីតអ្នកនេសាទដោយប្រើម៉ាស៊ីនខ្យល់នោះ បានបញ្ចប់ការបណ្តុះបណ្តាលផ្នែកជ្រមុជទឹក និងសង្គ្រោះរបស់ពួកគេប្រកបដោយវិជ្ជាជីវៈ ហើយពេលនេះអ្នកជ្រមុជទឹកដែលទើបបញ្ចប់ការហ្វឹកហាត់របស់អង្គការ MCC ទាំងនោះកំពុងដាក់ពង្រាយសំណង់ថ្មជម្រកត្រីសិប្បនិម្មិតការពារជីវចម្រុះបាតសមុទ្រ។ 

ពីមុនការជ្រមុជទឹកដោយប្រើម៉ាស៊ីនខ្យល់បានរងផលប៉ះពាល់ក្នុងការនេសាទ ដោយមិនមានការហ្វឹកហាត់ត្រឹមត្រូវ និងឧបករណ៍ជ្រមុជទឹកមិនមានសុវត្ថិភាព ពិសេសនោះហានិភ័យដែលបង្កពីកម្រិតអាសូតច្រើនក្នុងរាងកាយ ឬលង់ទឹក។ រាល់អ្នកជ្រមុជទឹកដោយប្រើម៉ាស៊ីនខ្យល់ទាំងអស់ ប្រឈមនឹងគ្រោះថ្នាក់គ្រប់ពេលវេលា។ បច្ចុប្បន្ននេះ ពួកគេបានជ្រមុជទឹកដោយសុវត្ថិភាពជារៀងរាល់ថ្ងៃក្នុងការដាក់ពង្រាយសំណង់ជម្រកត្រីសិប្បនិម្មិត ដើម្បីរួមចំណែកក្នុងការជួយការពារប្រភេទជីវៈចម្រុះស្រទាប់បាតពីការបំផ្លាញតាមរយៈការអូសបាតសមុទ្រ។ ពួកគេបានប្រែខ្លួនពីការប្រកបរបរដែលប្រឈមគ្រោះថ្នាក់ទៅជាសកម្មភាពដ៏មានអត្ថន័យក្នុងការការពារសមុទ្រសម្រាប់មនុស្សជំនាន់ក្រោយ។

អង្គការ MCC សូមថ្លែងអំណរគុណយ៉ាងជ្រាលជ្រៅចំពោះក្រសួងកសិកម្ម រុក្ខាប្រមាញ់ និងនេសាទ និងធនាគារអភិវឌ្ឍន៍អាស៊ីដែលបានបង្កើតការផ្លាស់ប្តូរនេះឡើងប្រកបដោយប្រសិទ្ធភាព៕

ដោយ ណយ នឿន (ប្រភព៖ MCC)