AKP កំពង់ស្ពឺ ថ្ងៃទី០៦ ខែឧសភា ឆ្នាំ២០២៥-- ទឹកធ្លាក់ចំបក់គឺជាទឹកជ្រោះធម្មជាតិមួយកន្លែងដែលមានសម្រស់ទេសភាពស្អាត ដោយសារតែមានទេសភាពព្រៃព្រឹក្សា នៅតាមដងផ្លូវពោរពេញដោយព្រៃឫស្សីដ៏ក្រាស់ឃ្មឹក ដែលជាម្លប់ដ៏ត្រជាក់សម្រាប់អ្នកដំណើរ ហើយមួយវិញទៀតលក្ខណៈពិសេសរបស់ទឹកធ្លាក់នេះគឺមិនមានការកែច្នៃអ្វីនោះឡើយ ថែមទាំងបានទាក់ទាញភ្ញៀវទេសចរជាច្រើន ជាពិសេសគឺភ្ញៀវទេសចរបរទេស។ ក្រៅពីសក្តានុពលទេសធម្មជាតិទឹកធ្លាក់ សហគមន៍ក៏មានសេវាម្ហូបអាហារ និងស្នាក់នៅសម្រាប់ភ្ញៀវទេសចរដែលមកលេងកម្សាន្ត។

សហគមន៍ទេសចរណ៍ធម្មជាតិទឹកធ្លាក់ចំបក់ មានទីតាំងស្ថិតនៅឃុំចំបក់ ស្រុកភ្នំស្រួច ខេត្តកំពង់ស្ពឺ មានចម្ងាយប្រមាណ១១០ គីឡូម៉ែត្រពីរាជធានីភ្នំពេញ មានព្រំប្រទល់ជាប់នឹងឧទ្យានជាតិគិរីរម្យផ្ទាល់តែម្តង។ នៅពេលដែលចូលដល់ផ្លូវចូលឧទ្យានជាតិគិរីរម្យហើយ ត្រូវធ្វើដំណើរបន្តប្រមាណ១០គីឡូម៉ែត្រ ទើបទៅដល់ទេសចរណ៍ធម្មជាតិមួយនេះ និងត្រូវធ្វើដំណើរថ្មើរជើងដើរកាត់ភ្នំជាងមួយគីឡូដើម្បីទៅដល់ទឹកធ្លាក់។ ការធ្វើដំណើរកាត់ព្រៃដែលមានតែសំឡេងសត្វយំឆ្លងឆ្លើយគ្នា  លាយឡំដោយក្លិនបុប្ផាធម្មជាតិពិតជាធ្វើឱ្យអារម្មណ៍អ្នកទេសចរស្រស់ប្លែកពីការកម្សាន្តនានា។

លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺ បានឱ្យដឹងថា បច្ចុប្បន្នរដ្ឋបាលខេត្តបានកសាងស្ពានថ្មី២កន្លែង និងចាក់បេតុងតាមបណ្តោយផ្លូវជាតិ៤៦ តភ្ជាប់ពីផ្លូវជាតិលេខ៤ទៅកាន់ឧទ្យានជាតិគីរីរម្យ ស្ថិតនៅក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ។ នៅក្នុងឃុំចំបក់មានប្រជាពលរដ្ឋប្រមាណជាង១ពាន់គ្រួសារគឺជាកសិករ ហើយក៏មានរមណីយដ្ឋានពីរកន្លែងមានឧទ្យានជាតិគីរីរម្យ និងទឹកធ្លាក់ចំបក់គឺជាតំបន់ទេសចរណ៍ធម្មជាតិមួយដែលបាន និងកំពុងទទួលការចាប់អារម្មណ៍ខ្លាំងពីសំណាក់ភ្ញៀវទេសចរណ៍ជាតិ អន្តរជាតិ។ ដូច្នេះរំពឹងថា ការស្ថាបនាស្ពានពីរកន្លែងនៅលើផ្លូវជាតិលេខ៤៦នេះនឹងបម្រើដល់វិស័យដឹកជញ្ជូនកសិកម្មរបស់ពលរដ្ឋទៅកាន់ទីផ្សារ និងសម្រួលដល់ដំណើរភ្ញៀវទេសចរមកកាន់រមណីយដ្ឋាននេះបានយ៉ាងល្អប្រសើរ។ មួយវិញទៀតក៏បង្កលក្ខណៈងាយស្រួលបន្ថែមទៀតដល់បងប្អូន និងសិស្សានុសិស្សបានទៅកាន់មន្ទីរពេទ្យ និងទៅសាលារៀនបានយ៉ាងឆាប់រហ័សផងដែរ៕

ដោយ លឹម សាន្ត