AKP បន្ទាយមានជ័យ ថ្ងៃទី០៥ ខែឧសភា ឆ្នាំ២០២៥ -- ឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ បានលើកទឹកចិត្តដល់សមាជិកក្រុមប្រឹក្សាខេត្ត និងមន្ត្រីរាជការកងកម្លាំងពាក់ព័ន្ធទាំងអស់ឱ្យបន្តកិច្ចសហការរួមគ្នាឱ្យបានល្អប្រសើរថែមទៀតក្នុងការអនុវត្តផែនការ និងគោលនយោបាយរបស់រាជរដ្ឋាភិបាល ដើម្បីផលប្រយោជន៍រួមរបស់ប្រជាពលរដ្ឋក្នុងខេត្ត។ ការថ្លែងបែបនេះរបស់ឯកឧត្តមបានធ្វើឡើងក្នុងកិច្ចប្រជុំសាមញ្ញលើកទី១២ អាណត្តិទី៤ របស់ក្រុមប្រឹក្សាខេត្តបន្ទាយមានជ័យនៅព្រឹកថ្ងៃចន្ទ ទី០៥ ខែឧសភា ឆ្នាំ២០២៥ ក្នុងគោលបំណងសំខាន់ដើម្បីត្រួតពិនិត្យ និងវាយតម្លៃលើការងារដែលរដ្ឋបាលខេត្តបានអនុវត្តកន្លងមក ព្រមទាំងកំណត់ទិសដៅបន្ត ដើម្បីលើកកម្ពស់ប្រសិទ្ធភាពការងារថែមទៀត។

អង្គប្រជុំនេះមានការចូលរួមពីឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត ប្រធានមន្ទីរ អង្គភាព ស្ថាប័នពាក់ព័ន្ធជុំវិញខេត្ត និងតំណាងស្រុក ក្រុងជាច្រើនរូបផងដែរ ដែលបានបង្ហាញពីការយកចិត្តទុកដាក់ខ្ពស់ចំពោះការអភិវឌ្ឍខេត្ត។

ក្នុងកិច្ចប្រជុំនោះ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត បានមានប្រសាសន៍សង្កត់ធ្ងន់លើសារៈសំខាន់នៃការពិនិត្យ និងវាយតម្លៃការងារជាប្រចាំ ដើម្បីកំណត់ចំណុចខ្លាំង និងចំណុចដែលត្រូវកែលម្អសំដៅជំរុញការអភិវឌ្ឍខេត្តឱ្យកាន់តែរីកចម្រើនថែមទៀត។

ជាមួយគ្នានោះដែរ ឯកឧត្តម អ៊ុំ រាត្រី អភិបាលនៃគណៈអភិបាលខេត្ត ក៏បានធ្វើរបាយការណ៍យ៉ាងលម្អិតអំពីវឌ្ឍនភាពការងាររបស់រដ្ឋបាលខេត្តក្នុងរយៈពេលកន្លងមក ដោយបានគូសបញ្ជាក់ពីសមិទ្ធផលសំខាន់ៗដែលសម្រេចបាន ក៏ដូចជាបញ្ហាប្រឈមដែលកំពុងកើតមាន និងវិធានការដែលរដ្ឋបាលខេត្តកំពុងដោះស្រាយ និងបានបង្ហាញការប្តេជ្ញាចិត្តខ្ពស់ក្នុងការដឹកនាំរដ្ឋបាលខេត្តឱ្យបម្រើប្រជាពលរដ្ឋឱ្យកាន់តែល្អប្រសើរ និងជំរុញការអភិវឌ្ឍន៍ខេត្តឱ្យកាន់តែរីកចម្រើនលើគ្រប់វិស័យ។

ទន្ទឹមនឹងនេះ កិច្ចប្រជុំសាមញ្ញលើកទី១២ អាណត្តិទី៤ របស់ក្រុមប្រឹក្សាខេត្តបន្ទាយមានជ័យនេះ បានប្រព្រឹត្តទៅក្នុងបរិយាកាសនៃការពិភាក្សាដោយបើកចំហ និងស្មារតីទទួលខុសត្រូវខ្ពស់ ដោយសមាជិកក្រុមប្រឹក្សាខេត្តបានចូលរួមផ្តល់យោបល់ និងសំណូមពរប្រកបដោយលក្ខណៈស្ថាបនា ដើម្បីឱ្យសេចក្តីសម្រេច និងផែនការសកម្មភាពនានាដែលត្រូវបានអនុម័ត អាចឆ្លើយតបបានយ៉ាងពេញលេញទៅនឹងតម្រូវការ និងផលប្រយោជន៍របស់ប្រជាពលរដ្ឋនៅក្នុងខេត្តបន្ទាយមានជ័យ។

សូមបញ្ជាក់ថាកិច្ចប្រជុំសាមញ្ញលើកទី១២ អាណត្តិទី៤ របស់ក្រុមប្រឹក្សាខេត្តបន្ទាយមានជ័យបានធ្វើការពិនិត្យ ពិភាក្សា និងអនុម័តលើឯកសារសំខាន់ៗមួយចំនួនមាន៖ សេចក្តីព្រាងកំណត់ហេតុកិច្ចប្រជុំសាមញ្ញលើកទី១១ អាណត្តិទី៤ របស់ក្រុមប្រឹក្សាខេត្ត។ នេះគឺជាការរំលឹក និងបញ្ជាក់ឡើងវិញនូវខ្លឹមសារនៃកិច្ចប្រជុំលើកមុន ដើម្បីធានាបាននូវការអនុវត្តន៍តាមសេចក្តីសម្រេចនានា។ សេចក្តីព្រាងរបាយការណ៍ប្រចាំខែមេសា ឆ្នាំ២០២៥ របស់រដ្ឋបាលខេត្ត ដែលបង្ហាញពីវឌ្ឍនភាពការងារ សមិទ្ធផល និងបញ្ហាប្រឈមនានាដែលរដ្ឋបាលខេត្តបានជួបប្រទះក្នុងខែនេះ។ សេចក្តីព្រាងក្របខណ្ឌអភិវឌ្ឍន៍ខេត្ត និងកម្មវិធីអភិវឌ្ឍន៍មូលដ្ឋានរយៈពេល ៥ ឆ្នាំ (២០២៥-២០២៩) របស់រដ្ឋបាលខេត្ត ដែលជាផែនការយុទ្ធសាស្ត្រដ៏សំខាន់សម្រាប់ដឹកនាំការអភិវឌ្ឍន៍ខេត្តបន្ទាយមានជ័យក្នុងរយៈពេលវែង។ ផែនការនេះនឹងកំណត់អាទិភាព និងគម្រោងសំខាន់ៗនានា ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងការអភិវឌ្ឍន៍សេដ្ឋកិច្ច សង្គមនៅក្នុងខេត្ត។ សេចក្តីព្រាងសេចក្តីសម្រេចស្តីពីការកែសម្រួលប្រការ១ នៃសេចក្តីសម្រេច លេខ០០៩/២៥ ស.ស.រ ចុះថ្ងៃទី៨ ខែមករា ឆ្នាំ២០២៥ របស់រដ្ឋបាលខេត្ត ស្តីពីការកែសម្រួលគណៈកម្មាធិការពិគ្រោះយោបល់កិច្ចការស្ត្រី និងកុមារ អាណត្តិទី៤ របស់ក្រុមប្រឹក្សាខេត្តបន្ទាយមានជ័យ ដែលមានគោលបំណងធ្វើឱ្យសមាសភាព   របស់គណៈកម្មាធិការនេះកាន់តែមានប្រសិទ្ធភាពក្នុងការលើកកម្ពស់សិទ្ធិ និងសុខុមាលភាពរបស់ស្ត្រី និងកុមារនៅក្នុងខេត្ត។ សេចក្តីព្រាងតារាងបែងចែកប្រាក់រង្វាន់លើកទឹកចិត្តដែលបានមកពីការផ្តល់សេវារដ្ឋបាលសម្រាប់ឧបត្ថម្ភជូនមន្ត្រី បុគ្គលិក នៃរដ្ឋបាលខេត្ត សម្រាប់ខែមេសា ឆ្នាំ២០២៥ និង ថវិកាពង្រឹងយន្តការរដ្ឋបាល ដែលជាការទទួលស្គាល់ និងលើកទឹកចិត្តដល់ការខិតខំប្រឹងប្រែងរបស់មន្ត្រីរាជការក្នុងការផ្តល់សេវាសាធារណៈប្រកបដោយគុណភាព និងប្រសិទ្ធភាព។ ថវិកានេះក៏នឹងរួមចំណែកដល់ការពង្រឹងយន្តការរដ្ឋបាលឱ្យកាន់តែរឹងមាំ និងមានសមត្ថភាពខ្ពស់៕

ដោយ ឈុន សារ៉ាត