AKP ភ្នំពេញ ថ្ងៃទី០៥ ខែឧសភា ឆ្នាំ២០២៥--សម្ដេចហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឱ្យក្រសួងសុខាភិបាល មន្ទីរសុខាភិបាល សហការជាមួយក្រសួងអប់រំ ចួលរួមផ្សព្វផ្សាយវិធីសាស្ត្របង្ការជំងឺមហារីកដល់ប្រជាពលរដ្ឋឱ្យបានទូលំទូលាយ។ 

ការជំរុញនេះធ្វើឡើង ក្នុងឱកាសសម្ដេចធិបតីនាយករដ្ឋមន្ត្រី អញ្ជើញជាអធិបតី ក្នុងពិធីប្រកាសដាក់ឱ្យអនុវត្តជាផ្លូវការ«ផែនការជាតិប្រយុទ្ធនឹងជំងឺមហារីក ២០២៥-២០៣០» នៅសណ្ឋាគារសូហ្វីតែលភ្នំពេញ នាព្រឹកថ្ងៃទី០៥ ខែឧសភា ឆ្នាំ២០២៥។

សម្ដេចធិបតីនាយករដ្ឋមន្ត្រី បានថ្លែងថា«ក្រសួងសុខាភិបាលសូម មន្ទីរសុខាភិបាលសូម ជួយផ្សព្វផ្សាយអប់រំ សហការជាមួយក្រសួងអប់រំក៏បាន តាមសាលាដើម្បីឱ្យយល់អំពីវីធីបង្ការ ឬវិធីចៀសវាងនៅក្នុងការបរិភោគឬមួយការធ្វើសកម្មភាពណាមួយ ដែលអាចបង្កើនហានិភ័យខ្ពស់នៅក្នុងការកើតជំងឺមហារីក ព្រោះសំខាន់គឺការអប់រំ ការផ្សព្វផ្សាយ ខ្ញុំមិនជឿថា មានពីណាម្នាក់ចង់កើតកង់ស៊ែទេ ប៉ុន្តែពេលខ្លះគឺព័ត៌មានអត់គ្រប់ អ៊ីចឹងការគ្រប់គ្រងនេះ ត្រូវបន្ថែម ហើយទី២ បង្កើនការចាក់ថ្នាំបង្ការ ចាក់វ៉ាក់សាំងបង្ការ ដូចមិញបានលើកថា នៅប្រទេសជឿនលឿនមួយចំនួន ជំងឺមហារីកមាត់ស្បូនក៏មាន ប៉ុន្តែហានិភ័យនៃការស្លាប់ថយ ដោយសារយើងចាក់ថ្នាំបង្ការពីមុន អ៊ីចឹងការខិតខំទៅលើនេះ យើងនឹងពង្រីកទៅលើកិច្ចការងារនេះ»។ 

កន្លងមក រាជរដ្ឋាភិបាលបានបានបង្កើនកញ្ចប់ថវិកាជូនក្រសួងសុខាភិបាល សម្រាប់ជំងឺ លើសឈាម និងជំងឺទឹកនោមផ្អែម ចំណែកពាក់ព័ន្ធជំងឺមហារីកវិញ សម្ដេចធិបតី បានថ្លែងបញ្ជាក់ថា«ខ្ញុំគាំទ្រដល់ក្រសួងសុខាភិបាលដែលបើកយុទ្ធនាការបន្ថែម ដើម្បីគិតគូរនៅក្នុងលទ្ធភាពរបស់យើងការអប់រំផង ការចាក់ថ្នាំបង្ការផង ជាពិសេសដល់ស្ត្រី និងកុមារ ស្រីៗនេះ អារឿងកង់ស៊ែ ដោះកង់ស៊ែ ស្បូនអីនេះច្រើន  អ៊ីចឹងបើយើងអាចជួយតាមគ្រប់រូបភាពដែលអាចធ្វើទៅបាន ជាពិសេសនៅតាមមូលដ្ឋាន នៅតាមមណ្ឌលសុខភាពរបស់យើង ប្រជាពលរដ្ឋយើងដែលនៅឆ្ងាយ គាត់អត់មានលទ្ធភាព អត់មានសមត្ថភាពព្យាបាលនៅទីប្រជុំជន»។

រាជរដ្ឋាភិបាលកម្ពុជាតែងតែយកចិត្តទុកដាក់និងបានចាត់ទុកវិស័យសុខាភិបាលនិងសុខុមាលភាពរបស់ប្រជាពលរដ្ឋកម្ពុជា ជាអាទិភាពមួយក្នុងចំណោមអាទិភាពខ្ពស់បំផុត។ ក្នុងន័យនេះ យុទ្ធសាស្ត្រនិងគោលនយោបាយជាច្រើនត្រូវបានរៀបចំឡើង ដើម្បីលើកស្ទួយស្ថានភាពសុខភាពប្រជាជននិងវិស័យសុខាភិបាល ឱ្យកាន់តែមានភាពប្រសើរឡើងជាលំដាប់ ដោយរាជរដ្ឋាភិបាលនីតិកាលទី៧ នៃរដ្ឋសភាបានដាក់ចេញនូវ «យុទ្ធសាស្ត្របញ្ចកោណ ដំណាក់កាលទី១» ដែលក្នុងនោះរាជរដ្ឋាភិបាលបានកំណត់«ការផ្តល់ការថែទាំសុខភាពឆ្ពោះទៅកម្មវិធីគ្របដណ្តប់សុខភាពជាសកល» ជាកម្មវិធីទី១ នៃកម្មវិធីគោលនយោបាយអាទិភាព ចំនួន៦ របស់រាជរដ្ឋាភិបាល។

ពាក់ព័ន្ធនឹងវិស័យថែទាំសុខភាពនៅប្រទេសកម្ពុជា ជំងឺមហារីកគឺជាជំងឺមួយក្នុងចំណោមជំងឺមិនឆ្លងចម្បងៗទាំង៤ ដែលត្រូវបានចាត់ទុកជាអាទិភាព ដោយក្រសួងសុខាភិបាលបានខិតខំប្រឹងប្រែងដាក់ចេញនូវវិធានការជាច្រើនដើម្បីបង្ការនិងគ្រប់គ្រងជំងឺទាំងនេះ៕

ដោយ៖ គង់ សិរីរ័ត្ន, រូបថត៖ គល់ រ៉េននី