AKP កំពង់ស្ពឺ ថ្ងៃទី០៤ ខែឧសភា ឆ្នាំ២០២៥ -- ឯកឧត្តម យឹម សុខុម ប្រធានក្រុមប្រឹក្សាខេត្តឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានអញ្ជើញក្នុងពិធីអបអរសាទរ ខួបអនុស្សាវរីយ៍លើកទី១៣៩ ទិវាពលកម្មអន្តរជាតិ ថ្ងៃទី១ ខែឧសភា ឆ្នាំ២០២៥ ក្រោមប្រធានបទ "រួមគ្នាដើម្បីការងារសមរម្យ និងកំណើនប្រកបដោយចីរភាព និងភាពធន់" កាលពីព្រឹកថ្ងៃទី០៣ ខែឧសភា ឆ្នាំ២០២៥ ដែលរៀបចំឡើងដោយមន្ទីរបណ្តុះបណ្តាលវិជ្ជាជីវរៈ សហការជាមួយរោងចក្រ Ventura Leather wear MFY (CD) H.K មានកម្មករនិយោជិត ចូលរួម សរុបប្រមាណ ៨,០០០នាក់។

ក្នុងពិធីសំណេះសំណាលនោះ ឯកឧត្តមបណ្ឌិត ជាម ច័ន្ទសោភ័ណ បានមានប្រសាសន៍លើកឡើងថា គុណតម្លៃនៃសុខសន្តិភាព ដែលជាកិច្ចខិតខំប្រឹងប្រែងអនុវត្តគោលនយោបាយរបស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឲ្យប្រទេសជាតិមានការអភិវឌ្ឍស្ទើរគ្រប់វិស័យ ។ ជាក់ស្តែងប្រមុខរាជរដ្ឋាភិបាល ធ្វើឱ្យខេត្តកំពង់ស្ពឺ មានរោងចក្រ សហគ្រាស គ្រឹះស្ថាន សិប្បកម្មសរុប ១,៤១៣កន្លែង ក្នុងនោះ រោងចក្រ កាត់ដេរសម្លៀកបំពាក់ ផលិតស្បែកជើង កាបូប និងផលិតផលធ្វើដំណើរមានចំនួន ៣៤៥កន្លែង មានកម្មករនិយោជិត សរុប ២៤៦,៩៣៤នាក់ ក្នុងនោះ ស្រី១៥៦,២៧៥នាក់ នឹងបច្ចុប្បន្ននេះ ខេត្តកំពង់ស្ពឺកំពុងតែមានតម្រូវការកម្លាំងពលកម្មបន្ថែមចំនួន៨,៣១៦នាក់បន្ថែមទៀត។ ទន្ទឹមនឹងភាពរីកចម្រើនក្នុងការវិនិយោគទុនក្នុងខេត្តកំពង់ស្ពឺ រាជរដ្ឋាភិបាលបានបង្កើតកម្មវិធីនយោបាយជាច្រើនក្នុងការលើកស្ទួយដល់ជីវភាពបងប្អូនកម្មករនិយោជិត ការបណ្តុះបណ្តាលបច្ចេកទេសវិជ្ជាជីវៈ កិច្ចគាំពារសង្គមជាពិសេសផ្តល់អត្ថប្រយោជន៍ជាច្រើនជូនដល់ស្ត្រីមានផ្ទៃពោះ និងសម្រាលកូន។

ឯកឧត្តមបណ្ឌិតអភិបាលខេត្តបានអំពាវនាវឱ្យបងប្អូនប្រជាពលរដ្ឋ ជាពិសេសបងប្អូន កម្មករនិយោជិត សូមឱ្យបញ្ឈប់ការចោលសំរាមពាសវាលពាសកាល ដើម្បីជួយលើកកម្ពស់មុខមាត់និងសោភ័ណភាពខេត្ត និងបានសង្កត់ធ្ងន់ថា  បច្ចុប្បន្ន ដោយសក្តានុពលសេដ្ឋកិច្ចនៃខេត្ត ស្ថិតក្រោមការដឹកនាំប្រកបដោយគតិបណ្ឌិតរបស់សម្តេចធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា មានសន្តិភាព និងស្ថេភាពនយោបាយពេញលេញ ធ្វើឱ្យអ្នកវិនិយោគ នាំគ្នាមកដាក់ទុនរកស៊ីនៅក្នុងខេត្តយើង ហើយផ្តល់ឱកាសដល់កូនក្មួយប្រមាណ ជាង២៤ម៉ឺននាក់មានការងារធ្វើ ចៀសផុតពីភាពក្រីក្រ។

ជាមួយគ្នានេះដែរ ឯកឧត្តមបណ្ឌិត ជាម ច័ន្ទសោភ័ណ បានអំពាវនាវដល់និយោជិត កម្មករ កម្មការិនី សូមរស់នៅរកស៊ីទទួលទានជាមួយគ្នាប្រកបដោយសុខដុមរមនាធ្វើឱ្យសហគ្រាសមួយក្លាយជាសហគមន៍សុខសាន្ត បើមានបញ្ហាសូមធ្វើការសម្របសម្រួលគ្នាដោយសន្តិវិធី ក្រោមម្លប់សន្តិភាពឈរលើគោលការណ៍ច្បាប់៕

ដោយ លឹម សាន្ត