AKP កណ្ដាល ថ្ងៃទី២៤ ខែមេសា ឆ្នាំ២០២៥-- ឯកឧត្តម គួច ចំរើន អភិបាលខេត្តកណ្ដាល នៅថ្ងៃទី២៤ ខែមេសា ឆ្នាំ ២០២៥នេះ បានដឹកនាំក្នុងកិច្ចប្រជុំត្រួតពិនិត្យគម្រោងឃុំ សង្កាត់ លើការប្រើប្រាស់មូលនិធិរ៉ែដែលកិច្ចប្រជុំនេះ បានរៀបចំឡើងនៅសល់ប្រជុំសាលាខេត្តដោយមានការចូលរួមពីមន្ទីរពាក់ព័ន្ធ និងអាជ្ញាធរក្រុង-ស្រុកទាំង១៣។

ក្នុងកិច្ចប្រជុំនេះ ឯកឧត្តមអភិបាលខេត្តបានធ្វើការត្រួតពិនិត្យទៅលើបញ្ជីគម្រោងដែលបានស្នើឡើងតាមបណ្តាឃុំ សង្កាត់ របស់រដ្ឋបាលក្រុង ស្រុកទាំង១៣ ដើម្បីធ្វើការសម្រេចឯកភាពគាំទ្រ ព្រមទាំងបានផ្តល់ជាមតិយោបល់ណែនាំបំពេញបន្ថែមទៀត ទៅលើចំណុចខ្វះខាតមួយចំនួនរបស់គម្រោងដែលបានស្នើឡើង សំដៅជួយជំរុញធ្វើឱ្យគម្រោងទាំងនោះកាន់តែទទួលបានការគាំទ្រ ពីក្រសួងរ៉ែ និងថាមពលនៅពេលឡើងការពារគម្រោងរបស់ខ្លួននាពេលខាងមុខ។

អាជ្ញាធរក្រុង ស្រុកត្រូវរៀបចំបញ្ជីបានស្មានតម្លៃគម្រោងឱ្យបានត្រឹមត្រូវ និងសមស្រប និងត្រូវដឹកនាំអាជ្ញាធរឃុំ-សង្កាត់ ការិយាល័យអប់រំ ពិភាក្សាអំពីការសាងសង់ និងជួសជុលកែលម្អសាលារៀន នៅតាមមូលដ្ឋានដែលមានការចាំបាច់  ដើម្បីការពារគម្រោងឱ្យទទួលគាំទ្រ អាចយកមកអភិវឌ្ឍចេញជាសមិទ្ធផល ឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋនៅមូលដ្ឋាន។

ឯកឧត្តមអភិបាលខេត្តបានស្នើដល់មន្ទីរ៉ែ និងថាមពលខេត្ត ទីចាត់ការផែនការ និងវិនិយោគខេត្ត និងមន្ទីរផែនការ ត្រូវជួយពិនិត្យគម្រោងដែលបានមកពីមូលនិធិរ៉ែ ឆ្នាំ២០២៥ ឱ្យបានច្បាស់លាស់រៀបចំធ្វើជាតារាងឱ្យមានលក្ខណៈទិន្នន័យស៊ីគ្នាសមស្របទៅតាមទំហំជាក់ស្ដែងរបស់គម្រោងនីមួយៗ ត្រូវមានបច្ចេកទេសត្រឹមត្រូវធានាគុណភាព នឹងត្រូវមានបញ្ជីបានស្មានតម្លៃឱ្យបានសមស្របផងដែរ ងាយស្រួលក្នុងការឡើងការពារគម្រោងទទួលបានជោគជ័យ។

ជាពិសេសគ្រប់គម្រោងទាំងអស់ អាជ្ញាធរមន្ទីរពាក់ព័ន្ធត្រូវខិតខំជំរុញការអនុវត្តគម្រោងក្នុង ឆ្នាំ២០២៥នេះ ឱ្យបានតាមការឯកភាពគ្នាក្នុងកិច្ចប្រជុំនាថ្ងៃនេះ ហើយក៏ត្រូវតែត្រៀមលក្ខណៈទុកជាមុនសម្រាប់គម្រោងនៅឆ្នាំបន្តបន្ទាប់ទៀតឱ្យមានភាពរលូន និងល្អប្រសើរថែមទៀត ឆាប់រហ័សទាន់ពេលវេលា៕

ដោយ ណយ នឿន (ប្រភព៖ រដ្ឋបាលខេត្តកណ្តាល)