AKP ភ្នំពេញ ថ្ងៃទី៣០ ខែមេសា ឆ្នាំ២០២៦ -- ក្រុមការងារការិយាល័យត្រួតពិនិត្យការធ្វេីអាជីវកម្មលេីធនធានធម្មជាតិ​ នៃនាយកដ្ឋានត្រួតពិនិត្យការធ្វេីអាជីវកម្ម​ និងអភិរក្ស របស់អាជ្ញាធរទន្លេសាបនៅថ្ងៃទី២៩ ខែមេសា ឆ្នាំ២០២៦ បានចុះសិក្សាការធ្វេីវារីវប្បកម្ម​ ស្ថិតនៅសង្កាត់ចំនួនបួនួមមាន​ សង្កាត់រលាប​ សង្កាត់ចំរេីនផល​ សង្កាត់ផ្ទះព្រៃ​ និងសង្កាត់ស្វាយអាត់​ ក្រុងពោធិ៍សាត់​ ខេត្តពោធិ៍សាត់។​ ក្រុមការងារចុះសិក្សាមានគោលបំណងនៃសកម្មភាពរួមមាន ការតាមដានលេីស្ថិតិអ្នកចិញ្ចឹមត្រីទាំងក្នុងបែរ​ និងស្រះ ការសិក្សាតាមដានបរិមាណនៃការចិញ្ចឹម​ ប្រភេទត្រីចិញ្ចឹម​ និងបច្ចេកទេសនៃការចិញ្ចឹម សិក្សាលេីចរន្តទីផ្សារ​ តម្លៃទីផ្សារ​ និងវិភាគលេីសេដ្ឋកិច្ចនៃការចិញ្ចឹមត្រី និងសិក្សាពីផលបះពាល់នៃការធ្វេីវារីវប្បកម្មនៅជុំវិញបឹងទន្លេសាប​។

ការចុះសិក្សានេះ ក្រុមការងារបានចុះជួបជាមួយ អាជ្ញាធរដែនដី និងស្ថាប័នពាក់ព័ន្ធ  សម្ភាសន៍ជាមួយវារីវប្បករលេីការចិញ្ចឹមត្រីតាមបែរ​ ស្រះ និងការប្រេីប្រាស់ប្រភេទចំណី និងសម្ភាសន៍ជាមួយអាជីវករទិញ លក់ត្រីនុយ លេីប្រភព​ និងតម្លៃត្រី។

សូមជម្រាបជូនថា សកម្មភាពចុះសិក្សាស្រាវជ្រាវ ការធ្វេីវារីវប្បកម្ម​ ជុំវិញបឹងទន្លេសាប គឺជាសកម្មភាពមួយក្នុងចំណោមសកម្មភាពសំខាន់ៗជាច្រើន ដែលត្រូវបានអនុម័តដាក់ឱ្យអនុវត្តនៅក្នុងផែនការសកម្មភាពប្រចាំឆ្នាំ២០២៦ របស់អាជ្ញាធរទន្លេសាប៕

ដោយ៖ ណយ នឿន (ប្រភព៖អាជ្ញាធរទន្លេសាប)