AKP ភ្នំពេញ ថ្ងៃទី៣០ ខែមេសា ឆ្នាំ២០២៦ -- តបតាមការអញ្ជើញឯកឧត្តម Huang Runqiu រដ្ឋមន្ត្រីក្រសួងអេកូឡូស៊ី និងបរិស្ថាន នៃសាធារណរដ្ឋប្រជាមានិតចិន ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានដឹកនាំប្រតិភូក្រសួងបរិស្ថាន ដើម្បីបំពេញបេសកកម្មនៅប្រទេសចិនចំនួន២ថ្ងៃ ចាប់ពីថ្ងៃទី២៨ ដល់ថ្ងៃទី២៩ ខែមេសា ឆ្នាំ២០២៦។

ក្រសួងបរិស្ថានបានឱ្យដឹងថានៅថ្ងៃទី២៨ ខែមេសា ឆ្នាំ២០២៦ ឯកឧត្តមរដ្ឋមន្ត្រីបានដឹកនាំប្រតិភូ ធ្វើទស្សនៈកិច្ចនៅរោងចក្រក្រណាត់Tiqiao Shanghai, នៅPuJiang ទីក្រុងសៀងហៃ ប្រទេសចិន។ 

ក្នុងពិធីនេះឯកឧត្តមបណ្ឌិត អ៊ាង សុផល្លែត បានទទួលជួបពិភាក្សា ការងារជាមួយលោក Pan Yuming ប្រធានរោងចក្រផលិតក្រណាត់Tiqiao Shanghai, ដែលសព្វថ្ងៃនេះ កំពុងតែផ្គត់ផ្គង់ក្រណាត់ ទៅរោងចក្រកាត់ដេរជាច្រើននៅក្នុងពិភពលោក ហើយក្នុងនោះក៏មានរោងចក្រមួយចំនួនធំនៅកម្ពុជាផងដែរ។ 

ក្នុងពិធីនេះដែរ ឯកឧត្តមរដ្ឋមន្រ្តីបានថ្លែងអំណរគុណ និងលើកទឹកចិត្តជំរុញឱ្យក្រុមហ៊ុន មកវិនិយោគនៅកម្ពុជា និងប្រើប្រាស់អុសឬធ្យូងផលិតចេញពីស្មៅយក្ស ដែលក្រសួងបរិស្ថានកម្ពុជា បាននិងកំពុងលើកទឹកចិត្តឱ្យមានការដាំ ស្មៅយក្ស (Giant King Grass) នៅតាមសហគមន៍តំបន់ការពារធម្មជាតិ ដើម្បីប្រើប្រាស់ជាជីវអុសសម្រាប់ដុតជំនួសអុស និងធ្យូងដែលកាប់ចេញពីព្រៃឈើធម្មជាតិ។

ឯកឧត្តម អ៊ាង សុផល្លែត បានលើកឡើងថា រោងចក្រកាត់ដេរនៅកម្ពុជាមួយជាច្រើននៅបន្តប្រើប្រាស់ និងធ្យូង ដើម្បីដុតចំហុយក្រណាត់ និងអ៊ុតក្រណាត់ ដែលការប្រើប្រាស់អុស និងធ្យូងនេះ គឺបានដាក់សម្ពាធយ៉ាងខ្លាំងទៅលើព្រៃឈើ ហើយជាពិសេសទៀត ទៅលើយុទ្ធនាការដាំកូនឈើដែលក្រសួងបរិស្ថាន និងប្រជាពលរដ្ឋយើងទូទាំងប្រទេសកំពុងតែរួមគ្នាដាំ យ៉ាងតិចចំនួន១ លានដើម ជារៀងរាល់ឆ្នាំ។ 

ឯកឧត្តមរដ្ឋមន្រ្តីបានជំរុញឱ្យមានការដាំស្មៅយក្ស និងធ្វើការកែច្នៃ ឬប្រើប្រាស់ ស្មៅយក្សនេះ ទៅជាអុសជីវៈ ហើយប្រើជំនួសអុសធម្មជាតិ និងបានជួយកាត់បន្ថយទាំងសម្ពាធទៅលើធនធានធម្មជាតិ ជាពិសេសព្រៃឈើរបស់កម្ពុជា និងជួយឱ្យកូនឈើដែលយើងខំនាំគ្នាដាំហ្នឹង លូតលាស់ធំធាត់ផងដែរ៕

ដោយ៖មករា