AKP បន្ទាយមានជ័យ ថ្ងៃទី២៤ ខែមេសា ឆ្នាំ២០២៥-- សាខាកាកបាទក្រហមកម្ពុជាខេត្តបន្ទាយមានជ័យ ដឹកនាំដោយឯកឧត្តម អ៊ុ រាត្រី ប្រធានគណៈកម្មាធិការសាខា និងលោកជំទាវ នូម សោភ័ណ អនុប្រធានកិត្តិយសសាខា បានចុះសួរសុខទុក្ខ និងនាំយកអំណោយមនុស្សធម៌ទៅប្រគល់ជូនគ្រួសារដែលរងគ្រោះដោយសារខ្យល់កន្ត្រាក់ចំនួន២៣គ្រួសារ និងគ្រួសារដែលរងគ្រោះដោយភ្លើងឆេះផ្ទះចំនួន១គ្រួសារ នៅក្នុងស្រុកមង្គលបូរី និងក្រុងសិរីសោភ័ណនៅព្រឹកថ្ងៃព្រហស្បតិ៍ ទី២៤ ខែមេសា ឆ្នាំ២០២៥ ដោយមានការចូលរួមពីសំណាក់សមាជិកគណៈកម្មាធិការសាខា គណៈកម្មាធិការអនុសាខាក្រុងសិរីសោភ័ណ ស្រុកមង្គលបូរី ក្រុមការងារកាកបាទក្រហមឃុំ សង្កាត់ លោកមេភូមិ និងអ្នកស្ម័គ្រចិត្តកាកបាទក្រហមជាច្រើនរូបផងដែរ។

យោងតាមរបាយការណ៍បានឱ្យដឹងថា គ្រួសាររងគ្រោះដោយខ្យល់កន្ត្រាក់ទាំង២៣គ្រួសារនេះ បានរងផលប៉ះពាល់កាលពីថ្ងៃទី២២ ខែមេសា ឆ្នាំ២០២៥ កន្លងទៅ ដែលក្នុងនោះ ស្រុកមង្គលបូរី មាន ១៧គ្រួសារ មកពី៣ភូមិ ក្នុងឃុំស្រះរាំង ដែលមានគ្រួសាររងគ្រោះដោយខ្យល់កន្ត្រាក់ចំនួន ១៦គ្រួសារ និងគ្រួសាររងគ្រោះដោយភ្លើងឆេះផ្ទះចំនួន ១គ្រួសារ។ ក្រុងសិរីសោភ័ណមាន៧គ្រួសារ មកពី២ភូមិ ក្នុងសង្កាត់ម្កាក់ ដែលរងផលប៉ះពាល់ដោយសារខ្យល់កន្ត្រាក់។

ក្នុងឱកាសនោះ ឯកឧត្តម អ៊ុ រាត្រី បានសម្តែងនូវការសោកស្តាយចំពោះគ្រួសាររងគ្រោះទាំង ២៤គ្រួសារ និងបានលើកទឹកចិត្តពួកគាត់ឱ្យមានស្មារតីរឹងមាំ និងជំនះរាល់ការលំបាក។ ឯកឧត្តមក៏បានផ្តាំផ្ញើដល់បងប្អូនប្រជាពលរដ្ឋទាំងអស់ សូមបង្កើនការប្រុងប្រយ័ត្នខ្ពស់នៅពេលមានភ្លៀងខ្យល់ ជាពិសេសកុំនៅក្រោមដើមឈើធំៗ ឬទីវាលទំនេរ និងត្រូវស្វែងរកទីកន្លែងដែលមានសុវត្ថិភាព។ ទន្ទឹមនឹងនេះ ឯកឧត្តម ក៏បានក្រើនរំលឹកឱ្យបងប្អូនថែរក្សាសុខភាព ដោយសារអាកាសធាតុបច្ចុប្បន្នកំពុងមានការកើនឡើងកម្តៅខ្លាំង ត្រូវពិសាទឹកឱ្យបានច្រើន។

ការចែកជូនអំណោយនេះធ្វើឡើងនៅ ៣ទីតាំងផ្សេងគ្នាគឺសាលាបឋមសិក្សាតាអ៊ិន ឃុំស្រះរាំង ស្រុកមង្គលបូរី សម្រាប់គ្រួសាររងគ្រោះចំនួន ១៧គ្រួសារ (ខ្យល់កន្ត្រាក់ ១៦គ្រួសារ និងភ្លើងឆេះផ្ទះ ១គ្រួសារ)។ សាលាសង្កាត់ម្កាក់ ក្រុងសិរីសោភ័ណ សម្រាប់គ្រួសាររងគ្រោះចំនួន ៧គ្រួសារ (ខ្យល់កន្ត្រាក់)។ អំណោយដែលសាខាកាកបាទក្រហមកម្ពុជាខេត្តបន្ទាយមានជ័យ នាំយកទៅផ្តល់ជូនក្នុងមួយគ្រួសារដែលរងគ្រោះដោយខ្យល់កន្ត្រាក់រួមមានអង្ករ២៥គីឡូក្រាម មីជាតិ១កេស ត្រីខ១យួរ ទឹកត្រី១យួរ មុង១ ភួយ១ សារុង១ ក្រមា១ និងថវិកាមួយចំនួន។ ដោយឡែក សម្រាប់គ្រួសារដែលរងគ្រោះដោយភ្លើងឆេះផ្ទះ ទទួលបានអង្ករ២៥គីឡូក្រាម មី១កេស ត្រីខ១យួរ ទឹកត្រី១យួរ មុង១ ភួយ១ សារុង១ ក្រមា១ តង់ប្លាស្ទិក១ផ្ទាំង កន្ទេលជ័រ១ ធុងទឹក៦០លីត្រ ១ ឆ្នាំង២ ចានបាយ៥ ស្លាបព្រា៥ និងថវិកា២០ម៉ឺនរៀល។

ទន្ទឹមនឹងនោះ ឯកឧត្តម អ៊ុ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ ក៏បានលើកឡើងនូវការសោកស្តាយ និងការចូលរួមរំលែកទុក្ខយ៉ាងក្រៀមក្រំចំពោះបងប្អូនប្រជាពលរដ្ឋដែលរងគ្រោះ និងសូមបងប្អូនមានភាពរឹងមាំដើម្បីឆាប់បានវិលត្រឡប់ទៅកាន់ជីវភាពរស់នៅប្រចាំថ្ងៃវិញផងដែរ៕

ដោយ ឈុន សារ៉ាត