AKP បន្ទាយមានជ័យ ថ្ងៃទី២៤ ខែមេសា ឆ្នាំ២០២៥-- លេខាធិការដ្ឋានរៀបចំការបោះឆ្នោតខេត្តរួមសហការជាមួយរដ្ឋបាលខេត្តបន្ទាយមានជ័យ នាព្រឹកថ្ងៃទី២៤ ខែមេសា ឆ្នាំ២០២៥ បានរៀបចំពិធីបើកវគ្គបណ្តុះបណ្តាលដ៏សំខាន់មួយ ស្តីពី «ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥» ដែលជាជំហានដ៏សំខាន់ឆ្ពោះទៅរកការបោះឆ្នោតជាតិនាពេលខាងមុខ ក្រោមវត្តមានរបស់លោក ឃូ ពៅ អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់របស់ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ដោយមានការអញ្ជើញចូលរួមពីឯកឧត្តម ឡោ ប៊ុនពេជ្រ សមាជិកក្រុមប្រឹក្សាខេត្ត និងលោក យ៉ង់ ស័ក្តិ ប្រធានលេខាធិការដ្ឋានរៀបចំការបោះឆ្នោតខេត្តបន្ទាយមានជ័យ រួមទាំងការចូលរួមយ៉ាងកុះករពីសំណាក់អភិបាលរងក្រុង-ស្រុក នាយ-នាយរងកងកម្លាំងប្រដាប់អាវុធទាំងបីប្រភេទ តំណាងគណបក្សនយោបាយ មន្ទីរអង្គភាពនានាក្នុងខេត្ត និងអ្នកពាក់ព័ន្ធជាច្រើនរូបទៀត។

ក្នុងឱកាសនោះ លោក ឃូ ពៅ អភិបាលរងខេត្តបន្ទាយមានជ័យ បានមានប្រសាសន៍គូសបញ្ជាក់អំពីសារៈសំខាន់នៃដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត។ នេះគឺជាកិច្ចការដ៏សំខាន់បំផុតមួយក្នុងការធានាបាននូវការបោះឆ្នោតដោយសេរី ត្រឹមត្រូវ និងយុត្តិធម៌ ដែលជាមូលដ្ឋានគ្រឹះនៃលទ្ធិប្រជាធិបតេយ្យ។

ទន្ទឹមនឹងនេះ លោកបានជំរុញដល់សិក្ខាកាមទាំងអស់ឱ្យយកចិត្តទុកដាក់ស្តាប់ការបណ្តុះបណ្តាល ស្រូបយកចំណេះដឹង និងជំនាញនានា ដើម្បីអនុវត្តការងារនេះឱ្យបានល្អប្រសើរបំផុត និងបានបន្ថែមទៀតថា រដ្ឋបាលខេត្តប្តេជ្ញាផ្តល់កិច្ចសហការយ៉ាងពេញលេញជាមួយលេខាធិការដ្ឋានរៀបចំការបោះឆ្នោតខេត្ត និងគ្រប់ភាគីពាក់ព័ន្ធ ដើម្បីឱ្យដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ នេះ ប្រព្រឹត្តទៅដោយរលូន តម្លាភាព និងទទួលបានលទ្ធផលល្អប្រសើរ។

ជាមួយនោះដែរលោក យ៉ង់ ស័ក្តិ ប្រធានលេខាធិការដ្ឋានរៀបចំការបោះឆ្នោតខេត្តបន្ទាយមានជ័យវិញ បានធ្វើបទបង្ហាញលម្អិតអំពីគោលការណ៍ នីតិវិធី និងជំហានសំខាន់ៗនៃការពិនិត្យបញ្ជីឈ្មោះ និងការចុះឈ្មោះបោះឆ្នោត និងបានសង្កត់ធ្ងន់លើភាពត្រឹមត្រូវ និងការយកចិត្តទុកដាក់ខ្ពស់ក្នុងការបំពេញភារកិច្ចនេះ ដើម្បីធានាថាពលរដ្ឋគ្រប់រូបដែលមានសិទ្ធិបោះឆ្នោត ត្រូវបានចុះឈ្មោះ និងមានឈ្មោះនៅក្នុងបញ្ជីបោះឆ្នោតត្រឹមត្រូវ។

លោក យ៉ង់ ស័ក្តិ បានបញ្ជាក់បន្ថែមថា វគ្គបណ្តុះបណ្តាលនេះមានគោលបំណងពង្រឹងសមត្ថភាពមន្ត្រី ល.ខ.ប និងភាគីពាក់ព័ន្ធឱ្យកាន់តែច្បាស់លាស់អំពីតួនាទី ភារកិច្ច និងការទទួលខុសត្រូវរបស់ខ្លួនក្នុងការអនុវត្តដំណើរការនេះប្រកបដោយប្រសិទ្ធភាព និងបានលើកទឹកចិត្តសិក្ខាកាមឱ្យសួរនូវរាល់ចម្ងល់ និងបញ្ហាប្រឈមនានា ដើម្បីស្វែងរកដំណោះស្រាយរួមគ្នា។

ពិធីបើកវគ្គបណ្តុះបណ្តាលនេះបានបង្ហាញឱ្យឃើញនូវការប្តេជ្ញាចិត្តយ៉ាងមុតមាំរបស់រដ្ឋបាលខេត្តបន្ទាយមានជ័យ និងលេខាធិការដ្ឋានរៀបចំការបោះឆ្នោតខេត្ត ក្នុងការធានាបាននូវដំណើរការបោះឆ្នោតប្រកបដោយគុណភាព តម្លាភាព និងការចូលរួមពីគ្រប់ភាគីពាក់ព័ន្ធ ដើម្បីពង្រឹងលទ្ធិប្រជាធិបតេយ្យនៅកម្ពុជា។ វគ្គបណ្តុះបណ្តាលនេះត្រូវបានគេរំពឹងថានឹងផ្តល់នូវចំណេះដឹង និងជំនាញដ៏សំខាន់ដល់អ្នកចូលរួម ដើម្បីត្រៀមខ្លួនអនុវត្តការងារពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ ឱ្យទទួលបានជោគជ័យ៕

ដោយ ឈុន សារ៉ាត