AKP ភ្នំពេញ ថ្ងៃទី២៤ ខែមេសា ឆ្នាំ២០២៥-- នៅដែនជម្រកសត្វព្រៃលំផាត់ មានសហគមន៍តំបន់ការពារធម្មជាតិចំនួន៤ រួមមាន សហគមន៍តំបន់ការពារធម្មជាតិអូររៃ សហគមន៍តំបន់ការពារធម្មជាតិអូរគរគី សហគមន៍តំបន់ការពារធម្មជាតិវាលកំបោរ និងសហគមន៍តំបន់ការពារធម្មជាតិរវាក់ និងក្រុមអភិរក្សជីវចម្រុះចំនួន២ គឺ ក្រុមអភិរក្សជីវចម្រុះស្រែជ្រៃ និងក្រុមអភិរក្សជីវចម្រុះកូនវ៉ា បាន និងកំពុងអនុវត្តកិច្ចការល្បាតយ៉ាងសកម្មនៅក្នុងតំបន់ការពារសហគមន៍របស់ពួកគេ។ នេះបើតាមការបញ្ជាក់របស់អង្គការ NatureLife នៅថ្ងៃទី២៣ ខែមេសា ឆ្នាំ២០២៥។

គោលបំណងនៃការល្បាតនេះធ្វើឡើងដើម្បីត្រួតពិនិត្យ ទប់ស្កាត់ និងកាត់បន្ថយបទល្មើសព្រៃឈើ ឬធនធានធម្មជាតិនានា ព្រមទាំងត្រួតពិនិត្យ និងកត់ត្រាអំពីជីវចម្រុះ និងជម្រកនៅក្នុងតំបន់ការពារទាំងនោះ។ ចាប់ពីខែមករា ឆ្នាំ២០២៥ មកក្រុមល្បាតសហគមន៍បានដកហូតអន្ទាក់ចំនួន៣២២ខ្សែ និងសំណាញ់ចាប់សត្វចំនួន២។ អន្ទាក់មិនអាចដោះអស់ពីក្នុងព្រៃនោះទេ ប្រសិនបើមនុស្សនៅតែបរិភោគសាច់សត្វព្រៃ ហេតុនេះហើយសហគមន៍ទាំង ៦ខាងលើសូមអំពាវនាវដល់សាធារណជនគ្រប់រូបរួមគ្នាប្រឆាំងនឹងការបរិភោគសាច់សត្វព្រៃ។ 

ការមិនបរិភោគសាច់សត្វព្រៃតទៅទៀតនឹងបញ្ឈប់សកម្មភាពការបរបាញ់ ការដាក់អន្ទាក់ ការបំពុល និងជួញដូរសត្វព្រៃ៕

ដោយ ណយ នឿន (ប្រភព៖ NatureLife)