AKP ស្ទឹងត្រែង ថ្ងៃទី០៩ ខែ មេសា ឆ្នាំ ២០២៥--ទំនប់វារីអគ្គិសនីសេសានក្រោម២ មានសមត្ថភាព ក្នុងការផលិតថាមពលអគ្គិសនី រហូតដល់ ១ ៩១២ លានគីឡូវ៉ាត់ម៉ោង ជាមួយកម្លាំងថាមពល ៤០០ មេហ្គាវ៉ាត់។ ទំនប់វារីអគ្គិសនីដែលមានតួប៊ីនចំនួន៨ មានកម្លាំង ៥០មេហ្កាវ៉ាត់ ដោយការផលិតអគ្គិសនីប្រចាំឆ្នាំជាមធ្យមបានចំនួន ១ ៩៧០ ជីហ្គាវ៉ាត់ ហើយក៏ត្រូវបានគេបំពាក់ជាមួយគ្រឿងចក្រក្នុងចំណោមប្រភេទទំនើបៗនៅទូទាំងពិភពលោក។

ទំនប់វារីអគ្គិសនីនេះ មានទីតាំងនៅលើខ្សែមេនៃទន្លេសេសាន ស្ថិតក្នុងស្រុកសេសាន ខេត្តស្ទឹងត្រែង ។ វាជាទំនប់វារីអគ្គិសនីដ៏ទំនើបដែលត្រូវបានចាប់ផ្តើមសាងសង់នៅក្នុងខែតុលា ឆ្នាំ ២០១៣  ហើយត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី១៧ ខែធ្នូ ឆ្នាំ២០១៨។

លោក ដេង យូលីន(Deng Yulin) អគ្គនាយករង និងជានាយកគ្រប់គ្រង ស្ថានីយវារីអគ្គីសនីសេសានក្រោម២ បានឱ្យដឹងថា ស្ថានីយវារីអគ្គីសនីនេះគឺ មានថាមពលផលិតអគ្គិសនីបានប្រមាណ២០ភាគរយ ឬប្រមាណ២លានគ្រួសារ ក្នុងចំណោមអគ្គិសនីដែលប្រើប្រាស់នៅកម្ពុជាពេលបច្ចុប្បន្ន។ លោកលើកឡើងថា ទំនប់វារីអគ្គីសនីកន្លែងនេះ ទោះបីឆ្នាំ២០២៣ និងឆ្នាំ២០២៤កន្លងមក អាកាសធាតុក្តៅហួតហែង ក៏នៅតែអាចរក្សាដំណើរការបានល្អ ពុំមានបញ្ហាប៉ះពាល់ច្រើនទេពោលគឺខ្វះខាតបន្តិចបន្តួចប៉ុណ្ណោះ។ លោកបានអះអាងថា សម្រាប់ឆ្នាំ២០២៥នេះលំហូរទឹកមានសភាពល្អប្រសើរ ដែលធ្វើឱ្យការផ្គត់ផ្គង់ថាមពលអគ្គិសនីដូចធម្មតានារដូវប្រាំងទូទៅ។

ចំណែកលោក លឹម ហូង មន្រ្តីប្រតិបត្តិការប្រចាំក្រុមហ៊ុនទំនប់វារីអគ្គិសនីសេសានក្រោម២បានបញ្ជាក់ឱ្យដឹងថា ថាមពលអគ្គិសនីដែលបញ្ជូនចេញពីទំនប់វារីអគ្គីសនីនេះដោយក្នុងនេះមានឡាញទាំងអស់ចំនួន៥ ក្នុងនេះមាន៤ឡាញស្តង់ដារខ្ពស់មានចំនួន២៣០គីឡូវ៉ុល ២ឡាញទៀតបញ្ជូនទៅខេត្ដរតនគិរី និង២ឡាញទៀតបញ្ជូនទៅអនុស្ថានីយស្ទឹងត្រែងរួចហើយ បានចែកចាយបន្តទៅបណ្តាខេត្តផ្សេងៗទៀតដូចជា ខេត្តក្រចេះ កំពង់ចាម និង រាជធានីភ្នំពេញ ជាដើម។ លោកបានបញ្ជាក់ប្រាប់បន្ថែមថា នៅទំនប់ទឹកសេសាននេះមានប្រភពទឹកហូរចូលមិនចេះដាច់ ដោយសារជាប្រភពទឹកទន្លេ ហេតុនេះធ្វើឱ្យដំណើរការបានគ្រប់ខួបប្រាំង វស្សាគ្រាន់តែខែប្រាំងមានថាមពលតិចជាងក្តី។ លោកបានបន្ដថា សម្រាប់តំបន់វារីអគ្គិសនីដទៃទៀតប្រើពីប្រភពទឹកភ្នំ ម្ល៉ោះហើយនៅពេលខែប្រាំងគ្មានភ្លៀងធ្លាក់ ទើបគ្មានទឹកសម្រាប់ដំណើរការបាន ដែលលក្ខខណ្ឌនេះហើយទើបធ្វើឱ្យវារីអគ្កីនីសេសាន អាចដំណើរការបានគ្រប់រដូវកាល។

បើតាមលោក លឹម ហូង នារដូវវស្សាមានលំហូរទឹកច្រើនគឺអាចមានសមត្ថភាពផលិតបានចំនួន៨ម៉ាស៊ីនគឺបាន៤០០មេហ្គាវ៉ាត់ពេញ និងចំណែកខែប្រាំងវិញមិនទៀងទាត់ពោលគឺដំណើរការតែ២ទៅ៣ម៉ាស៊ីន ហើយផលិតថាមពលបាន៣០ទៅ៤០មេហ្គាវ៉ាត់ ឬថ្ងៃខ្លះបាន១០០មេហ្គាវ៉ាត់ក៏មានផងដែរ ពោលគឺទៅតាមកម្លាំងលំហូររបស់ទឹក ថ្ងៃខ្លះតិច ឬច្រើនតែប៉ុណ្ណោះ។

សូមជម្រាបជូនថា ទំនប់វារីអគ្គិសនីដ៏ធំមួយនេះមានតម្លៃ ៧៨១.៥២លានដុល្លារ ដោយមានការបណ្តាក់ទុនរួមគ្នារវាងក្រុមហ៊ុន Hydrolancang International Energy ក្រុមហ៊ុន Royal Group របស់អ្នកឧកញ៉ា គិត ម៉េង និងក្រុមហ៊ុន EVN មកពីប្រទេសវៀតណាម។ ទំនប់វារីអគ្គិសនីនេះអាចផ្គត់ផ្គង់អគ្គិសនីដល់ប្រជាពលរដ្ឋតាមបណ្តោយបណ្តាញបញ្ជូនទៅភ្នំពេញ-កំពង់ចាម-ក្រចេះ-ស្ទឹងត្រែង-មណ្ឌលគិរី និងរតនគិរី។ ជាមួយគ្នានេះ វារីអគ្គិសនីនេះ ក៏បានជួយធ្វើឱ្យកម្ពុជាម្ចាស់ការលើវិស័យថាមពលអគ្គិសនី កាត់បន្ថយការនាំចូល និងធ្វើឱ្យតម្លៃ អគ្គិសនីទាបជាងមុនទៀតផង៕

ដោយ៖ ដេប៉ូ