AKP សៀមរាប ថ្ងៃទី០៨ ខែមេសា ឆ្នាំ២០២៥--បុណ្យចូលឆ្នាំខ្មែរ ជាបុណ្យប្រពៃណីជាតិដែលប្រជាជននៅក្នុងប្រទេសកម្ពុជាតែងតែប្រារព្ធធ្វើជារៀងរាល់ឆ្នាំ ហើយតាមទំនៀមទម្លាប់ប្រពៃណីរបស់ខ្មែរមុននឹងពិធីបុណ្យចូលឆ្នាំថ្មីឈានចូលមកដល់ គេឃើញប្រជាជននៅតាមភូមិ ស្រុក តែងតែនាំគ្នារៀបចំតុបតែង លម្អផ្ទះសម្បែង និងរៀបចំសម្ភារផ្សេងៗ ដើម្បីត្រៀមទទួលទេវតាឆ្នាំថ្មី។

ជាមួយគ្នានេះ តាមទំនៀមទម្លាប់ ពិធីបុណ្យចូលឆ្នាំថ្មីប្រពៃណីជាតិខ្មែរគឺមានរយៈពេល៣ថ្ងៃ ហើយថ្ងៃទី១ ជាថ្ងៃចូលឆ្នាំ ថ្ងៃទី២ ជាថ្ងៃវារៈវនបត ហើយថ្ងៃទី៣ ជាថ្ងៃវារៈឡើងស័ក។ សម្រាប់ថ្ងៃទី៣នេះ ប្រជាជនតែងប្រារព្ធពិធីស្រង់ព្រះនៅតាមវត្ដអារាម ឬអ្នកខ្លះទៀតនិមន្ដព្រះសង្ឃប័ង្សូល ឬស្រោចទឹកប្រោះព្រំ ហើយកន្លែងខ្លះទៀតរៀបចំជាពាងទឹក ឬធុងទឹកអញ្ជើញឪពុកម្ដាយ ជីដូនជីតាស្រោចទឹកជូនពរជ័យដល់កូនចៅ និងក្រុមគ្រួសារ ដើម្បីសុំឱ្យមានសេចក្ដីសុខសេចក្ដីចម្រើន សិរីសួស្ដី សុភមង្គលក្នុងឆ្នាំថ្មី។

ដោយឡែក ការស្រោចទឹក ប្រោះព្រំសុំឱ្យមានសិរីសួស្ដី សេចក្ដីសុខសេចក្ដីចម្រើនក្នុងឱកាសបុណ្យចូលឆ្នាំនេះជាជំនឿ ឬទម្លាប់ របស់ប្រជាពលរដ្ឋនៅ ឃុំសំរោង ស្រុកសូទ្រនិគម ខេត្តសៀមរាប ឱ្យតែដល់បុណ្យចូលឆ្នាំថ្មីប្រពៃណីជាតិខ្មែរ គឺប្រជាពលរដ្ឋក្នុងឃុំសំរោងទាំងមូល តែងតែនិមន្តព្រះសង្ឃស្រោចទឹក នៅតាមផ្ទះនីមួយៗព្រមគ្នាតែម្តង ដើម្បីឱ្យគ្រោះចង្រៃហូរទៅតាមទឹកនិងសុំសេចក្តីសុខ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ​ដែលប្រារព្ធធ្វើឡើងនៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥។

លោកយាយ ភី រស់នៅភូមិស្ទឹង ឃុំសំរោង ស្រុកសូទ្រនិគម ខេត្តសៀមរាបបានឱ្យដឹងថា ព្រះសង្ឃនិមន្តមកសូត្រមន្តស្រោចទឹកដល់ប្រជាពលរដ្ឋនៅតាមបណ្តាភូមិនេះ គឺជាជំនឿមួយ ដែលប្រជាពលរដ្ឋនៅក្នុងឃុំនេះ បានអនុវត្តន៍តាំងពីចាស់ៗជំនាន់មុនមក។ ដោយអ្នកភូមិមានជំនឿថា ការនិមន្តព្រះសង្ឃឱ្យមកស្រោចទឹកនេះ ជាការរំដោះគ្រោះ និងរឿងអាក្រក់ៗ ដែលកំពុងកើតមានឱ្យហូរទៅតាមទឹក និងសុំសេចក្តីសុខសប្បាយសម្រាប់ក្រុមគ្រួសារ ក្នុងឆ្នាំថ្មីដែលបានឈានចូលមកដល់។ លោកយាយបាននិយាយបន្តថា កាលពីមុនការនិមន្តព្រះសង្ឃស្រោចទឹកនេះ ធ្វើតែនៅក្នុងភូមិចំណុះជើងវត្តប៉ុណ្ណោះ ប៉ុន្តែនៅរយៈពេល៣ឆ្នាំចុងក្រោយនេះ ដោយមានការគោរព មានជំនឿ និងមានការសំណូម និងនិមន្តពីពុទ្ធបរិស័ទផងនោះ ព្រះតេជគុណ ថង ចន្ថា ព្រះចៅអធិការវត្តសំរោង បានដឹកនាំព្រះសង្ឃបន្តនិមន្តស្រោចទឹកប្រោះព្រំឱ្យប្រជាពលរដ្ឋរហូតទៅដល់៥ឃុំ គឺឃុំសំរោង ឃុំពពេល ឃុំចាន់ស ឃុំដំដែក និងឃុំតាយ៉ែក ស្ថិតនៅក្នុងស្រុកសូទ្រនិគម ហើយឃើញថា ប្រជាពលរដ្ឋទាំងចាស់ ទាំងក្មេងមានការចូលរួមយ៉ាងច្រើន។ លោកយាយ ភី បានអះអាងដែរថា៖ «ឱ្យតែវេលាមុនបុណ្យចូលឆ្នាំនេះ បើមិនបាននិមន្តព្រះសង្ឃឱ្យមកស្រោចទឹកទេ គឺប្រជាពលរដ្ឋនៅមិនសុខ មិនអស់ចិត្ត មិនស្រឡះក្នុងខ្លួន ដែលនេះហើយ គឺជាជំនឿ និងការគោរព»។

លោក ជា ប៉ុន នាយកសាលាអនុវិទ្យាល័យពពេល ក៏បានឱ្យដឹងដែរថា ពិធីនេះតែងតែធ្វើជារៀងរាល់ឆ្នាំ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ហើយមូលហេតុដែលប្រជាពលរដ្ឋនៅក្នុងឃុំសំរោងនេះ តែងតែជឿ គោរព និងធ្វើពិធីនេះ គឺដោយសារតែពួកគាត់ធ្វើទៅតែងតែជួបនូវសេចក្តីសុខចម្រើន។លោកបានលើកឡើងថា ដោយនៅក្នុងពិធីនេះ មិនត្រឹមតែស្រោចទឹកឱ្យតែមនុស្សប៉ុណ្ណោះទេ សូម្បីតែសម្ភារប្រើប្រាស់ដូចជា ម៉ូតូ ឡាន ក៏បានឱ្យព្រះសង្ឃប្រោះព្រំឱ្យដែរ ដើម្បីឱ្យពេលធ្វើដំណើរទៅណាជួបតែសុវត្ថិភាព។ លោក ជា ប៉ុន ក៏ចង់ឱ្យកូនចៅជំនាន់បន្តធ្វើពិធីនេះបន្តទៅមុខទៀត ព្រោះវាជាជំនឿ ឬទម្លាប់ ដែលបានធ្វើឱ្យអ្នកភូមិបានសេចក្តីសុខ។ 

ពាក់ព័ន្ធនឹងការរៀបចំពិធីស្រោចទឹកប្រោះព្រំនេះដែរ ព្រះតេជគុណ ជឿត គឹមអាង ព្រះគ្រូសូត្រស្តាំវត្តសំរោង មានសង្ឃដីកាឱ្យដឹងថា  ជារៀងរាល់ឆ្នាំព្រះសង្ឃគង់នៅវត្តសំរាង តែងតែបាននិមន្តទៅស្រោចទឹកឱ្យពុទ្ធបរិស័ទទាំង៧ ដោយធ្វើឡើងរយៈពេល៧ថ្ងៃ ប៉ុន្តែសម្រាប់ឆ្នាំនេះ គឺធ្វើឡើងចំនួន៥ឃុំ ចាប់ពីថ្ងៃទី០១ ខែមេសា រហូតទៅដល់ថ្ងៃស្រង់ព្រះ ដែលធ្វើឡើងនៅថ្ងៃទី៣ នៃពិធីបុណ្យចូលឆ្នាំដែលត្រូវនឹងថ្ងៃឡើងស័ក ជាថ្ងៃចុងក្រោយ នៃពិធីបុណ្យចូលឆ្នាំថ្មីប្រពៃណីខ្មែរ។ ព្រះតេជគុណបានឱ្យដឹងទៀតថា  ក្នុង១ថ្ងៃ ព្រះសង្ឃនិមន្តទៅស្រោចទឹកប្រោះព្រំឱ្យប្រជាពលរដ្ឋជាច្រើននាក់ ហើយនៅតាមភូមិនីមួយៗព្រះសង្ឃនិមន្តចាប់ពីម៉ោង២រសៀលទៅ ហើយប្រជាពលរដ្ឋបានដងទឹកដាក់ផ្ការៀបចំរួចជាស្រេចរង់ចាំព្រះសង្ឃនិមន្តទៅដល់នៅតាមផ្ទះរៀងៗខ្លួន។

សូមបញ្ជាក់ផងដែរថា ប្រជាជនខ្មែរ មានជំនឿតៗគ្នាមកយូរហើយថា ស្រង់ព្រះទាំងព្រះបដិមាថ្ម និង ព្រះរស់ សុទ្ធតែទទួលបានមកវិញនូវសេចក្ដីសុខចម្រើន ត្រជាក់ត្រជុំ។ ទឹកតំណាងភាពត្រជាក់ ម្ល៉េះហើយនៅពេលស្រោចស្រពលើរាងកាយជនណាម្នាក់ហើយ នឹងបានត្រជាក់។ ទាំងអ្នកស្រោចស្រពគេ និងគេស្រោចឱ្យសុទ្ធតែសប្បាយចិត្តដោយជឿជាក់ថានឹងទទួលបាននូវបុណ្យកុសលល្អទៅថ្ងៃខាងមុខនិងជាតិក្រោយ។ ដូចនេះហើយបានជាប្រជាពលរដ្ឋនៅតំបន់ឃុំសំរោង ស្រុកសូទ្រនិគម ខេត្តសៀមរាបគោរព និងបន្តនិមន្តព្រះសង្ឃស្រោចទឹក នៅតាមផ្ទះនីមួយៗព្រមគ្នា នឹងបានក្លាយជាប្រពៃណី និងទម្លាប់របស់អ្នកភូមិរហូតមក។ 

ជាមួយគ្នានេះ តាមបែបជំនឿក្នុងសង្គមខ្មែរយើង ប្រជាពលរដ្ឋក៏អាចអញ្ជើញទៅវត្តអារាម និមន្តព្រះសង្ឃស្រោចទឹកលើករាសី សុំសេចក្ដីសុខសេចក្ដីចម្រើន និងមានសិរីសួស្ដីសុភមង្គលផងដែរ។ ទន្ទឹមនេះ គ្រូខ្មែរបុរាណ ក៏មានប្រើប្រាស់ការស្រោចទឹករំដោះគ្រោះដល់អ្នកមានជំនឿ ឬទៅរកការព្យាបាល ឬទស្សន៍ទាយជាហូរហែ។ ដោយឡែក នៅក្នុងគ្រួសារខ្មែរយើង ឪពុកម្ដាយជាច្រើន ក៏ធ្លាប់បានរៀបចំធ្វើពិធីស្រោចទឹកឱ្យពរជ័យដល់កូនៗបានដូចគ្នា ជាពិសេសនៅក្នុងឱកាសបុណ្យទានផ្សេងៗ៕

ដោយ៖ ឃុត សៅ