‎AKP កំពង់ស្ពឺ ថ្ងៃទី២៩ ខែមេសា ឆ្នាំ២០២៦--ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងជាប្រធានគណៈបញ្ជាការឯកភាពរដ្ឋបាលខេត្តបានអញ្ជើញជាអធិបតីដ៏ខ្ពង់ខ្ពស់ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត ដើម្បីពិភាក្សា និងដាក់ចេញនូវទិសដៅការងារសំខាន់ៗ ក្នុងកិច្ចការពារសន្តិសុខ សុវត្ថិភាព និងរបៀបរៀបរយសាធារណៈជូនបងប្អូនប្រជាពលរដ្ឋ។ កិច្ចប្រជុំនេះមានការអញ្ជើញចូលរួមពីសំណាក់ លោកអភិបាលរងខេត្ត ថ្នាក់ដឹកនាំមន្ទីរ អង្គភាពជុំវិញខេត្ត កងកម្លាំងទាំង៣ និងមន្ត្រីរាជការគ្រប់លំដាប់ថ្នាក់ជាច្រើនរូបទៀត។
‎
‎ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត បានកោតសរសើរដល់កងកម្លាំងប្រដាប់អាវុធ និងអាជ្ញាធរគ្រប់លំដាប់ថ្នាក់ ដែលបានលះបង់កម្លាំងកាយចិត្តក្នុងការរក្សាសុខសុវត្ថិភាពជូនប្រជាពលរដ្ឋ ជាពិសេសក្នុងព្រឹត្តិការណ៍ធំៗនាពេលកន្លងទៅ។ បន្ថែមពីនេះ ឯកឧត្តមបណ្ឌិត បានដាក់បទបញ្ជាយ៉ាងម៉ឺងម៉ាត់ដល់សមាជិកអង្គប្រជុំនូវចំណុចសំខាន់ៗដល់លោកអភិបាលក្រុង/ស្រុក មេឃុំ/ចៅសង្កាត់ មេប៉ុស្តិ៍ និងអធិការ ត្រូវយកចិត្តទុកដាក់ខ្ពស់ក្នុងការផ្សព្វផ្សាយអំពីច្បាប់ និងល្បិចកលនៃការឆបោកតាមប្រព័ន្ធបច្ចេកវិទ្យាអនឡាញ  ដល់បងប្អូនប្រជាពលរដ្ឋ ដើម្បីបង្កើនការប្រុងប្រយ័ត្ន កុំឱ្យធ្លាក់ក្នុងឧបាយកលជនខិលខូច។ គណៈបញ្ជាការឯកភាពក្រុង/ស្រុក ត្រូវចុះផ្ទាល់ និងជម្រាបជូនដល់មេភូមិ ដើម្បីបន្តផ្សព្វផ្សាយព័ត៌មាន និងសេចក្តីណែនាំនានារបស់រដ្ឋបាលខេត្ត ឱ្យទៅដល់ខ្នងផ្ទះប្រជាពលរដ្ឋបានជ្រួតជ្រាបជាប្រចាំ។ 

កងកម្លាំងមានសមត្ថកិច្ចត្រូវចុះពិនិត្យតាមរោងចក្រ សហគ្រាស តំបន់សេដ្ឋកិច្ចពិសេស និងសួនឧស្សាហកម្មនានា ដើម្បីផ្សព្វផ្សាយពាក់ព័ន្ធនឹងល្បែងស៊ីសងតាមប្រព័ន្ធបច្ចេកវិទ្យាអនឡាញខុសច្បាប់ ដល់កម្មករ កម្មការិនី និងអ្នករស់នៅតំបន់នោះឱ្យបានច្បាស់លាស់។  ត្រូវបន្តអនុវត្តវិធានការយ៉ាងម៉ឺងម៉ាត់បំផុតក្នុងការបង្ក្រាបក្មេងទំនើងដែលបង្កអសន្តិសុខក្នុងសង្គម ទោះក្នុងរូបភាពណាក៏ដោយ ដើម្បីធានាបាននូវសេចក្តីសុខសាន្ត និងសុវត្ថិភាពពេញលេញជូនប្រជាពលរដ្ឋក្នុងខេត្តកំពង់ស្ពឺទាំងមូល។
‎
‎សកម្មភាពនេះ បានបង្ហាញឱ្យឃើញពីការយកចិត្តទុកដាក់ខ្ពស់របស់រដ្ឋបាលខេត្តកំពង់ស្ពឺ ក្រោមការដឹកនាំរបស់ ឯកឧត្តមបណ្ឌិត ជាម ច័ន្ទសោភ័ណ ក្នុងការថែរក្សាសុខសន្តិភាព និងស្ថិរភាពសង្គម ដែលជាគ្រឹះដ៏សំខាន់សម្រាប់ការអភិវឌ្ឍន៍សេដ្ឋកិច្ច និងជីវភាពរស់នៅរបស់ប្រជាពលរដ្ឋក្នុងខេត្តទាំងមូលឱ្យកាន់តែរីកចម្រើនជាលំដាប់ ឯកឧត្តម បានជម្រុញឱ្យគណៈបញ្ជាការឯកភាពរដ្ឋបាលក្រុង-ស្រុក ត្រូវបង្កើនការសហការគ្នាឱ្យកាន់តែជិតស្និទ្ធ ដើម្បីធានាឱ្យបាននូវ "សន្តិសុខ និងការអភិវឌ្ឍន៍" ជូនដល់បងប្អូនប្រជាពលរដ្ឋទូទាំងខេត្តកំពង់ស្ពឺទាំងមូលផងដែរ៕ 

ដោយ ម៉ែន ប៊ុនធីម