AKP កំពង់ធំ ថ្ងៃទី០៧ ខែមេសា ឆ្នាំ២០២៥--

លោក សាយ គឹមឡម អភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុកស្ទោង បានមានប្រសាសន៍លើកទឹកចិត្តដល់កងកម្លាំងទាំងបី និងប្រជាការពារត្រូវរក្សាសន្តិសុខសណ្ដាប់ធ្នាប់សាធារណៈជូនបងប្អូនប្រជាពលរដ្ឋ្កក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឱ្យមានប្រសិទ្ធភាពខ្ពស់ ក្នុងឱកាសអញ្ជើញជួបសំណេះសំណាលសួរសុខទុក្ខកងកម្លាំងអធិការដ្ឋាននគរបាលស្រុកស្ទោង និងប្រជាការពារ នាព្រឹកថ្ងៃទី០៧ ខែមេសា ឆ្នាំ ២០២៥ នៅអធិការដ្ឋាននគរបាលស្រុកស្ទោង។

ទន្ទឹមនឹងនេះ លោក សាយ គឹមឡម បានណែនាំដល់អធិការដ្ឋាននគរបាលស្រុកស្ទោង និងប៉ុស្តិ៍នគរបាលរដ្ឋបាលត្រូវធ្វើផែនការសកម្មភាព និងបែងចែកតួនាទី/ភារកិច្ចកងកម្លាំងឱ្យបានត្រឹមត្រូវ ក្នុងការរក្សាសន្តិសុខសណ្តាប់ធ្នាប់ក្នុងឱកាសបុណ្យចូលឆ្នាំប្រពៃណីជាតិខ្មែរនៅតាមបណ្ដាវត្តអារាមនានាសំដៅធានាបាននូវសន្តិសុខសុវត្ថិភាពខ្ពស់ជូនពុកម៉ែបងប្អូនក្នុងមូលដ្ឋានបានកម្សាន្តសប្បាយសង្ក្រាន្តឆ្នាំថ្មីប្រកបដោយភាពជឿទុកចិត្តក្រោមម្លប់សុខសន្តិភាព និងបានណែនាំដល់លោកអធិការនគរបាលស្រុកស្ទោង ត្រូវចេះកៀរគរមូលធនពីសប្បុរសជនជិតឆ្ងាយ ជាពិសេសជាមួយព្រះគ្រូចៅអធិការនិងគណៈកម្មការវត្តនានាដើម្បីបានសម្ភារថវិកាសម្រាប់អភិវឌ្ឍអង្គភាពក៏ដូចជាឧបត្ថម្ភគាំទ្រដល់បងប្អូនប្រជាការពារដែលបានចូលរួមយ៉ាងសកម្មក្នុងការ រក្សាសន្តិសុខស្ដាប់ធ្នាប់ទូទៅក្នុងមូលដ្ឋានជាពិសេសនៅតាមបណ្ដាវត្តអារាមនៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខហើយត្រូវប្រើប្រាស់ធនធានទាំងនេះប្រកបដោយគណនេយ្យភាពនិងតម្លាភាពបំផុត។

ទន្ទឹមនឹងនេះ លោកអភិបាលស្រុកបានកោតសរសើរ និងថ្លែងអំណរគុណដល់បងប្អូនប្រជាការពារគ្រប់រូបជាពិសេសបងប្អូនប្រជាការពារជាស្ត្រីដែលបានខិតខំលះបង់ទាំងកម្លាំងកាយចិត្តពេលវេលាសព្វបែបយ៉ាងក្នុងការចូលរួមការពារសន្តិសុខទូទៅជូនប្រជាពលរដ្ឋក្នុងមូលដ្ឋានប្រកបដោយផ្លែផ្កាគួរឱ្យមោទកភាពក្រៃលែងទោះមិនមានប្រាក់កម្រៃក៏ដោយ។

សូមបញ្ជាក់ថានៅស្រុកស្ទោងមានប្រជាការពារសរុប១៣០៨នាក់ (ស្ត្រី១១នាក់) បែងចែកជា១២៧ក្រុម៕

ដោយ ស៊ុម វណ្ណា