AKP ព្រះសីហនុ ថ្ងៃទី០៦ ខែមេសា ឆ្នាំ២០២៥ -- លោកជំទាវ សេង សុមេត្តា ប្រធានក្រុមការងាររាជរដ្ឋាភិបាលចុះមូលដ្ឋានក្រុងព្រះសីហនុ និងក្រុងកោះរ៉ុង ជារដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ និងឯកឧត្តម ម៉ាង ស៊ីណេត អភិបាលនៃគណ:អភិបាលខេត្តព្រះសីហនុ បានដឹកនាំមន្ត្រីរាជការ និងកងកម្លាំងប្រដាប់អាវុធចូលរួមក្នុងព្រឹត្តិការណ៍ "សង្ក្រានអ្នកកោះ ដើម្បីទេសចរណ៍កោះរ៉ុង" នារសៀលថ្ងៃសៅរ៍ ទី០៥ ខែមេសា ឆ្នាំ២០២៥ នៅឆ្នេរឡងសិត (ឆ្នេរកោះរ៉ុង) ស្ថិតនៅភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ។

ឯកឧត្តម ម៉ាង ស៊ីណេត អភិបាលខេត្តព្រះសីហនុ ក៏បានធ្វើការសំណេះសំណាលជាមួយប្រជាពលរដ្ឋអ្នកកោះ ក៏ដូចជាភ្ញៀវទេសចរជាតិ អន្តរជាតិដែលបានមកចូលរួមលេងកម្សាន្តសង្ក្រានអ្នកកោះនាឱកាសនោះផងដែរ ដើម្បីទេសចរណ៍កោះរ៉ុងមានភាពទាក់ទាញ និងប្រកបដោយភាពរីករាយបន្ថែមទៀតសម្រាប់ភ្ញៀវទេសចរជាតិ អន្តរជាតិ ដែលបានអញ្ជើញមកលេងតំបន់កោះក្នុងខេត្តព្រះសីហនុ ព្រោះឆ្នាំនេះ ក៏ដូចឆ្នាំមុនៗដែរ ដែលរដ្ឋបាលក្រុងកោះរ៉ុង ជាពិសេសរដ្ឋបាលខេត្តព្រះសីហនុ បានយកចិត្តទុកដាក់រៀបចំសង្ក្រាន្តនៅគ្រប់ក្រុង ស្រុក និងទីតាំងតំបន់កម្សាន្តនានាតាមតំបន់ឆ្នេរ និងរូបសំណាកព្រះថោងនាងនាគ ដែលមានទីឆ្លាធំទូលាយ ដើម្បីបង្កើតជាល្បែងប្រជាប្រិយ និងរាំលេងកម្សាន្តក្នុងរដូវចូលឆ្នាំខ្មែរប្រកបដោយភាពសប្បាយរីករាយក្រោមម្លប់សន្តិភាព ជាពិសេសបង្ហាញពីវប្បធម៌ អរិយ្យធម៌ និងទំនៀមទំលាប់ប្រពៃណីខ្មែរយើង។

ឯកឧត្តម អភិបាលខេត្តព្រះសីហនុ ក៏បានលើកទឹកចិត្តឱ្យប្រជាពលរដ្ឋគោរពស្រឡាញ់វប្បធម៌ ប្រពៃណី ព្រះពុទ្ធសាសនា ពិសេសក្នុងឱកាសពិធីបុណ្យចូលឆ្នាំថ្មីខាងមុខនេះ ទើបរដ្ឋបាលក្រុង និងខេត្តសម្រេចរៀបចំសង្ក្រាន្តនៅតាមតំបន់ទេសចរណ៍ ទីវត្តអារាមនានាក្នុងខេត្តព្រះសីហនុ ជាពិសេសសម្រាប់ថ្ងៃនេះ យើងបានរៀបចំសង្ក្រានអ្នកកោះនៅលើឆ្នេរខ្សាច់តំបន់ដីកោះ ក្នុងក្រុងកោះរ៉ុង នៃខេត្តព្រះសីហនុ ដោយមានការរៀបចំតុបតែងលម្អសង្ក្រាន្ត និងការរៀបចំសម្អាតអនាម័យ បរិស្ថាននៅតាមឆ្នេររបស់យើងសម្រាប់អបអរសាទរសង្ក្រាន្តឆ្នាំថ្មីប្រពៃណីជាតិខ្មែរ សម្រាប់អ្នកកោះដែលបានប្រព្រិត្តទៅចាប់ពីថ្ងៃទី០៥ ខែមេសា ២០២៥ ព្រោះពិធីបុណ្យចូលឆ្នាំថ្មីប្រពៃណីខ្មែរប្រព្រឹត្តទៅចាប់ពីថ្ងៃទី១៤-១៦ ខែមេសា ឆ្នាំ២០២៥។

ឯកឧត្តម អភិបាលខេត្តព្រះសីហនុ មានប្រសាសន៍លើកឡើងថា ក្រោមម្លប់សន្តិភាព និងស្របតាមកម្មវិធីគោលនយោបាយជាតិលើកកម្ពស់ជីវភាពរបស់ប្រជាជន និងគោលនយោបាយភូមិ ឃុំ សង្កាត់មានសុវត្ថិភាពសម្រាប់រដូវកាលបុណ្យចូលឆ្នាំថ្មីនេះផងដែរ យើងក៏បានត្រៀមរក្សាការពារសន្តិសុខ សុវត្ថិភាពឱ្យបានកាន់តែល្អជូនបងប្អូនប្រជាពលរដ្ឋនៅទីប្រជុំជន នៅតាមទីវត្តអារាម ជាពិសេសការរៀបចំសង្ក្រាន្តនៅតាមតំបន់ទេសចរណ៍មួយចំនួនទៀតសម្រាប់បងប្អូនប្រជាពលរដ្ឋបានចូលរួមលេងកម្សាន្តសប្បាយឱ្យបានគ្រប់គ្នាៗ។

ឯកឧត្តម អភិបាលខេត្តព្រះសីហនុ ក៏បានធ្វើការអំពាវនាវ និងសំណូមពរដល់បងប្អូនប្រជាពលរដ្ឋធ្វើដំណើរបើកបរដោយមានការប្រុងប្រយ័ត្ន គោរពច្បាប់ចរាចរណ៍ ដើម្បីសុខសុវត្ថិភាពក្នុងឱកាសពិធីបុណ្យចូលឆ្នាំថ្មីប្រពៃណីជាតិខាងមុខនេះ និងសូមទទួលបានសិរីសួស្ដីឆ្នាំថ្មី ជ័យមង្គលគ្រប់ក្រុមគ្រួសារ ។

ក្នុងឱកាសនោះ ក៏មានការសម្តែងសិល្ប: ដូចជារបាំឆៃយ៉ាំ របាំជូនពរ របាំគ្រុឌ រាំវង់ សារ៉ាវ៉ាន់ ឡាំលាវ និងមានលេងល្បែងប្រជាប្រិយ៍ជាច្រើនផ្សេងទៀតដូចជា វាយក្អម និងលោតបាវជាដើម៕

ដោយ: ងូ សុមុនី