AKP ភ្នំពេញ ថ្ងៃទី២៩ ខែមេសា ឆ្នាំ២០២៦--ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ និងគណ:ប្រតិភូបានអញ្ជើញចូលរួមក្នុងព្រឹត្តិការណ៍ពិព័រណ៌ផលិតផលបច្ចេកវិទ្យាបម្រើឱ្យការងារសន្តិសុខសាធារណ:ឆ្នាំ២០២៦ ក្រោមប្រធានបទ៖ "ផ្តល់សន្ទុះដល់នវានុវត្តន៍នៅថ្ងៃនេះ យើងនឹងកាន់តែមានសុវត្ថិភាពនៅថ្ងៃស្អែក" ដែលរៀបចំដោយក្រសួងមហាផ្ទៃសិង្ហបុរី សហការជាមួយស្ថាប័នបច្ចេកវិទ្យា និងវិទ្យាសាស្រ្តសឹង្ហបុរី និងស្ថាប័នអន្តរជាតិ Milipol រយ:ពេល ៣ថ្ងៃ ចាប់ពីថ្ងៃទី២៨ ដល់ ៣០ ខែមេសា ឆ្នាំ២០២៦ នៅប្រទេសសិង្ហបុរី។

ឯកឧត្តម K Shanmugam ទេសរដ្ឋមន្រ្តី ទទួលបន្ទុកកិច្ចការសន្តិសុខជាតិ និងជារដ្ឋមន្រ្តីក្រសួងមហាផ្ទៃសឹង្ហបុរីបានថ្លែងសុន្ទរកថា បើកព្រឹត្តិការណ៍នេះ ដោយមានវត្តមានចូលរួមតំណាងមកពីស្ថាប័នពាក់ព័ន្ធប្រហែល ១៥.០០០នាក់ មកពី ៨៩ប្រទេស ក្នុងនោះមានប្រតិភូ ៣.០០០នាក់ រួមមានមន្ត្រីរដ្ឋាភិបាល មកពី ៨៩ប្រទេស តំណាងក្រុមហ៊ុនដាក់តាំងបង្ហាញផលិតផលបច្ចេកវិទ្យាជាង ២៦០ក្រុមហ៊ុន ស្តង់តាំងបង្ហាញផលិតផលបច្ចេកវិទ្យាតំណាងប្រទេសចំនួន៥ រួមមាន សិង្ហបុរី បារាំង ចិន អ៊ីតាលី និងសហរដ្ឋអាមេរិក ។

ព្រឹត្តិការណ៍នេះ រៀបចំឡើងក្នុងគោលបំណងដើម្បីផ្សារភ្ជាប់ការកសាងទំនាក់ទំនងទៅវិញទៅមកក្នុងចំណោមអ្នកចូលរួម និងដើម្បីតាំងបង្ហាញវឌ្ឍនភាពបច្ចេកវិទ្យាបញ្ញាសិប្បនិម្មិត (AI) ដែលកំពុងតែធ្វើឱ្យមានការផ្លាស់ប្តូរនៅក្នុងវិស័យសន្តិសុខសាធារណ:៕

ដោយ ចាន់ សុភឿន (ប្រភព៖ ក្រសួងមហាផ្ទៃ)