AKP បន្ទាយមានជ័យ ថ្ងៃទី០៦ ខែមេសា ឆ្នាំ២០២៥ -- ក្នុងបរិយាកាសសប្បាយរីករាយត្រៀមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ វិទ្យាល័យ ហ៊ុន សែន ខ្លាកូន ស្ថិតក្នុងភូមិខ្លាកូន សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានរៀបចំពិព័រណ៍ស្នាដៃសិស្ស ការប្រឡងសំណេរដណ្ដើមរង្វាន់ និងកម្មវិធីផ្សេងៗទៀតយ៉ាងអឹកធឹកដែលមានរយៈពេលពីរថ្ងៃ គឺថ្ងៃទី៥ និងទី៦ ខែមេសា ឆ្នាំ២០២៥ នេះ។

ព្រឹត្តិការណ៍ដ៏មានអត្ថន័យនោះ បានបើកជាផ្លូវការក្រោមអធិបតីភាពរបស់លោក យឹម សំណាង អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់របស់ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ។

ក្នុងឱកាសដ៏សំខាន់នោះ លោក យឹម សំណាង ត្រូវបានអមដំណើរដោយលោក ស្រេង សុផល អភិបាលក្រុងសិរីសោភ័ណ លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្ត លោក សុខ ចំណាន នាយកវិទ្យាល័យ ហ៊ុន សែន ខ្លាកូន ព្រមទាំងក្រុមយុវជនសហភាពសហព័ន្ធយុវជនកម្ពុជា និងលោកគ្រូ អ្នកគ្រូជាច្រើនរូប ដែលបានចូលរួមអបអរសាទរយ៉ាងច្រើនកុះករ។

ក្នុងឱកាសនោះ លោក យឹម សំណាង ក្នុងនាមជាតំណាងដ៏ខ្ពង់ខ្ពស់របស់ឯកឧត្តម អ៊ុំ រាត្រី បានសម្ដែងនូវសេចក្តីសោមនស្សរីករាយ និងកោតសរសើរយ៉ាងខ្លាំងចំពោះគណៈគ្រប់គ្រង គ្រូបង្រៀន និងសិស្សានុសិស្សនៃវិទ្យាល័យ ហ៊ុន សែន ខ្លាកូន ដែលបានខិតខំប្រឹងប្រែងរៀបចំកម្មវិធីដ៏មានសារៈសំខាន់នេះឡើង។ លោកបានគូសបញ្ជាក់ថា ពិព័រណ៍ស្នាដៃសិស្ស និងការប្រឡងសំណេរនេះ មិនត្រឹមតែជាឱកាសសម្រាប់សិស្សានុសិស្សបង្ហាញពីសមត្ថភាពទេ ប៉ុន្តែថែមទាំងជាការលើកទឹកចិត្តដល់ការច្នៃប្រឌិត និងការស្រឡាញ់ចូលចិត្តលើការសិក្សារបស់ពួកគេផងដែរ។

លោកអភិបាលរងខេត្តបន្ទាយមានជ័យបានបន្ថែមទៀតថា ស្នាដៃដែលបានដាក់បង្ហាញនៅក្នុងពិព័រណ៍នេះ ពិតជាឆ្លុះបញ្ចាំងពីទេពកោសល្យ និងការខិតខំប្រឹងប្រែងរបស់សិស្សានុសិស្ស ក្រោមការណែនាំដ៏យកចិត្តទុកដាក់ពីលោកគ្រូ អ្នកគ្រូ។ លោកក៏បានលើកទឹកចិត្តឱ្យសិស្សានុសិស្សបន្តខិតខំសិក្សារៀនសូត្រ ពង្រឹងសមត្ថភាពខ្លួនឯង ដើម្បីក្លាយជាធនធានមនុស្សដ៏សំខាន់សម្រាប់អភិវឌ្ឍន៍ប្រទេសជាតិនាពេលអនាគត។

ក្នុងឱកាសនោះដែរ លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ បានថ្លែងនូវការកោតសរសើរចំពោះវិទ្យាល័យ ហ៊ុន សែន ខ្លាកូន ដែលតែងតែសកម្មក្នុងការរៀបចំកម្មវិធីផ្សេងៗ ដើម្បីលើកកម្ពស់គុណភាពនៃការអប់រំ។ លោកបានបញ្ជាក់ថា មន្ទីរនឹងបន្តគាំទ្រ និងសហការជាមួយគ្រប់គ្រឹះស្ថានសិក្សាទាំងអស់ក្នុងខេត្តដើម្បីបណ្តុះបណ្តាលធនធានមនុស្សឱ្យកាន់តែមានគុណភាព និងសមត្ថភាពខ្ពស់។

ទន្ទឹមនោះដែរ លោក សុខ ចំណាន នាយកវិទ្យាល័យ  ហ៊ុន សែន ខ្លាកូន បានធ្វើរបាយការណ៍ស្តីពីសកម្មភាពសិក្សា និងសមិទ្ធផលនានាដែលសាលាសម្រេចបានក្នុងរយៈពេលកន្លងមក។ លោកបានលើកឡើងថា ពិព័រណ៍ស្នាដៃសិស្សនាឆ្នាំនេះ មានស្តង់ចំនួន៣៥ ដែលបង្ហាញពីស្នាដៃចម្រុះរបស់សិស្សានុសិស្សគ្រប់កម្រិតថ្នាក់លើមុខវិជ្ជាផ្សេងៗគ្នា។ លើសពីនេះ លោកនាយកសាលាបានបញ្ជាក់ថា ការប្រឡងសំណេរដណ្ដើមរង្វាន់ក៏ទទួលបានការចាប់អារម្មណ៍យ៉ាងខ្លាំងពីសិស្សានុសិស្ស ដែលជាឱកាសដ៏ល្អមួយសម្រាប់ពួកគេបង្ហាញសមត្ថភាពផងដែរ។

លោក សុខ ចំណាន ក៏បានថ្លែងអំណរគុណយ៉ាងជ្រាលជ្រៅចំពោះវត្តមានរបស់លោក យឹម សំណាង និងថ្នាក់ដឹកនាំខេត្ត ព្រមទាំងមន្ទីរអប់រំ យុវជន និងកីឡាខេត្ត ដែលតែងតែផ្តល់ការគាំទ្រ និងលើកទឹកចិត្តដល់សាលា។ លោកបានប្តេជ្ញាចិត្តថានឹងបន្តដឹកនាំសាលាឱ្យកាន់តែរីកចម្រើន និងបណ្តុះបណ្តាលសិស្សានុសិស្សឱ្យក្លាយជាពលរដ្ឋល្អ និងមានចំណេះដឹងពិតប្រាកដ។

ពិធីបើកពិព័រណ៍ស្នាដៃសិស្ស និងការប្រឡងសំណេរនៅវិទ្យាល័យ ហ៊ុន សែន ខ្លាកូន នេះបានប្រព្រឹត្តទៅក្នុងបរិយាកាសសប្បាយរីករាយ និងពោរពេញដោយភាពកក់ក្តៅ។ សិស្សានុសិស្សបានបង្ហាញនូវស្នាដៃដ៏ប៉ិនប្រសប់របស់ខ្លួនយ៉ាងមោទនភាព ខណៈដែលភ្ញៀវកិត្តិយស និងអ្នកចូលរួមបានទស្សនា និងកោតសរសើរចំពោះទេពកោសល្យរបស់ពួកគេ។ កម្មវិធីនេះមានការរៀបចំស្តង់លក់ផលិតផលសិស្ស អាហារ និងភេសជ្ជៈជាច្រើនមុខ ដែលបានបង្កើនភាពសប្បាយរីករាយ និងភាពរស់រវើកដល់កម្មវិធីទាំងមូល។

នេះជាវឌ្ឍនភាពថ្មីមួយគួរជាទីមោទនៈដែលវិទ្យាល័យខ្លាកូនបានរៀបចំពិធីតាំងពិពណ៌ស្នាដៃសិស្ស បន្ទាប់ពីវិទ្យាល័យនេះទទួលបានពានរង្វាន់សាលារៀនគំរូសម្ដេចមហាបវរធិបតីឆ្នាំ ២០២៣-២០២៤។ ក្រៅពីតាំងបង្ហាញពិពណ៌ស្នាដៃសិស្សក្នុងកម្មវិធីនោះក៏មានការលេងល្បែងរបាំប្រជាប្រិយខ្មែរ និងប្រកួតកកីឡាក្បាច់គុនបូរាណខ្មែរដើម្បីអភិរក្ស និងអភិវឌ្ឍន៍ស្នាដៃសិល្បៈរបស់ដូនតាអបអរសាទរបុណ្យចូលឆ្នាំថ្មីផងដែរ។

ព្រឹត្តិការណ៍ដ៏មានអត្ថន័យនេះ បានប្រព្រឹត្តទៅក្រោមភាពសប្បាយរីករាយ និងការចងចាំដ៏ល្អប្រសើរ ដែលបានបន្សល់ទុកនូវស្នាមញញឹម និងកម្លាំងចិត្តថ្មីៗ ដល់សិស្សានុសិស្ស គ្រូបង្រៀន និងអ្នកចូលរួមទាំងអស់ ក្នុងការបន្តកិច្ចខិតខំប្រឹងប្រែងឆ្ពោះទៅកាន់ភាពជោគជ័យក្នុងឆ្នាំសិក្សាថ្មី និងត្រៀមខ្លួនអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងចូលមកដល់ក្នុងពេលឆាប់ៗខាងមុខនេះ៕

ដោយ: ឈុន សារ៉ាត