AKP កំពង់ស្ពឺ ថ្ងៃទី០៦ ខែមេសា ឆ្នាំ២០២៥ -- ក្រោមយុទ្ធសាស្ត្រឈ្នះឈ្នះ អាជ្ញាធរខេត្តកំពង់ស្ពឺបានដោះស្រោយបញ្ចប់វិវាទដីធ្លីក្រៅប្រពន្ធ័តុលាការរវាងពលរដ្ឋ និងពលរដ្ឋដែលរស់នៅក្នុងភូមិក្រាំងស្នួល ឃុំព្នាយ ស្រុកសំរោងទង ដោយជោគជ័យ កាលពីថ្ងៃទី០៥ ខែមេសា ឆ្នាំ២០២៥។

លោក ជេត ដុំ នាយករងរដ្ឋបាល តំណាងឯកឧត្តមបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺបានលើកឡើងថា ពលរដ្ឋចំនួនពីរក្រុមដែលមសនវិវាទដីធ្លីនោះ គឺក្រុមមួយមានគ្នាចំនួន ៤៨គ្រួសារ ជាពលរដ្ឋដែលបានកាន់កាប់ និងអាស្រ័យផលលើដីប្រហែល ៨ហិកតាជុំវិញទំនប់ក្រាំងជ្រៃ និងប្រជាពលរដ្ឋមួយក្រុមទៀតចំនួន ១៥០គ្រួសារក្នុងភូមិក្រាំងស្នួល ឃុំព្នាយ ស្រុកសំរោងទង ខេត្តកំពង់ស្ពឺ។

នាយករងរដ្ឋបាលខេត្តកំពង់ស្ពឺ លោក ជេត ដុំ បានបញ្ជាក់ថា ភាគីទាំងបានស្រុះស្រួល និងទទួលយកការដោះស្រាយក្រោមយុទ្ធសាស្ត្រឈ្នះឈ្នះចំនួន ៣ចំណុច គឺ ១. តំណាងពលរដ្ឋ ៤៨គ្រួសារដែលជាអ្នកអាស្រ័យផល និងបានប្រើប្រាស់ដី ហើយបានលក់ដីនេះ ឯកភាពប្រគល់ថវិកាចំនួន ៥៤.០០០ដុល្លារអាម៉រិកដើម្បីប្រើប្រាស់ជាប្រយោជន៍រួម ដូចជាការចាក់ដី ជួសជុលផ្លូវ និងរោងបុណ្យភូមិដែលមានស្រាប់។ រដ្ឋបាលឃុំត្រូវបង្កើតគណៈកម្មការមួយដើម្បីប្រើប្រាស់ថវិកានេះឱ្យបានច្បាស់លាស់ ហើយការប្រមូលថវិកានេះនឹងត្រូវកាត់ចេញនៅពេលអ្នកទិញដីប្រគល់ប្រាក់គ្រប់ចំនួននៅរដ្ឋបាលឃុំ។

ចំណុចទី២ គឺភាគីតំណាង ១៥០គ្រួសារ ឯកភាពទទួលយកទាំងស្រុងដូចក្នុងខ្លឹមសារចំណុច១ ហើយត្រូវធានាថា ថវិកានេះនឹងប្រើប្រាស់ចំគោលដៅជាប្រយោជន៍រួម និងព្រមដកពាក្យបណ្តឹង និងមិនសើរើឡើងវិញឡើយ និងចំណុចទី៣ គឺភាគីអ្នកទិញដីត្រូវកាត់ដីចំនួន ៣៥.០០០ម៉ែត្រក្រឡាទៅមន្ទីរធនធានទឹក និងឧតុនិយមខេត្ត ដើម្បីចុះបញ្ជីជាដីរដ្ឋ និងជាទំនប់ទុកប្រើប្រាស់ជាប្រយោជន៍រួម។

លោក ជេត ដុំ បានថ្លែងបន្តទៀតថា ការដោះស្រាយ សម្របសម្រួលផ្សះផ្សាវិវាទរវាងប្រជាពលរដ្ឋ និងប្រជាពលរដ្ឋក្រៅប្រព័ន្ធតុលាការនាពេលនេះ គឺជាការបើកទំព័រថ្មីបន្ថែមទៀតនៃកិច្ចសហប្រតិបត្តិការយ៉ាងជិតស្និតរវាងវិស័យយុត្តិធម៌ និងរដ្ឋបាលថ្នាក់ក្រោមជាតិ ដើម្បីលើកកម្ពស់គុណភាព ប្រសិទ្ធភាព និងភាពឆាប់រហ័សនៃការដោះស្រាយវិវាទតាមការសម្របសម្រួលផ្សះផ្សាក្រៅប្រព័ន្ធតុលាការ៕

ដោយ: លឹម សាន្ត