AKP ព្រះសីហនុ ថ្ងៃទី០៥ ខែ មេសា ឆ្នាំ ២០២៥ -- អ្នកសារព័ត៌មានកម្ពុជាដែលមានចំនួនយ៉ាងហោចណាស់៤ស្ថាប័ន ដែលក្នុងនោះ រៀបចំ និងដឹកនាំដោយសារព័ត៌មាន People's Daily របស់ចិន បានធ្វើដំណើររួមគ្នា ដើម្បីទស្សនកិច្ចនៅក្នុងរាជធានីភ្នំពេញ ខេត្តព្រះសីហនុ ខេត្តស្ទឹងត្រែង និងខេត្ដសៀមរាប ដើម្បីទស្សនាដោយទិដ្ឋភាពផ្ទាល់នៃការរួមចំណែករបស់ប្រទេសចិនចំពោះការការវិនិយោគ និងក៏ដូចជាសមិទ្ធផលនានាសម្រេចបាន ដែលបានចូលរួមអភិវឌ្ឍន៍ប្រទេសកម្ពុជានាកន្លងមក។

ក្នុងដំណើរទស្សនកិច្ចចាប់ពីថ្ងៃទី០៤ ដល់ថ្ងៃទី០៧ ខែ មេសា ឆ្នាំ ២០២៥ អ្នកសារព័ត៌មាននៃប្រទេសទាំងពីរ នឹងត្រូវបានជួបសម្ភាសន៍ផ្ទាល់ជាមួយវិស័យសុខាភិបាលរបស់ចិនកំពុងប្រតិបត្តិការនៅក្នុងប្រទេសកម្ពុជា វិស័យឧស្សាហកម្ម វិស័យអប់រំ និងរួមទាំងវារីអគ្គិសនីជាដើម។
ក្រុមអ្នកសារព័ត៌មាននៃប្រទេសទាំងពីរ កម្ពុជា-ចិន កាលពីថ្ងៃទី០៤ ខែមេសា ឆ្នាំ២០២៥ បាន ចាប់ផ្តើមទស្សនកិច្ចនៅរាជធានីភ្នំពេញ និងខេត្តព្រះសីហនុ ដោយដំបូងឡើយបានជួបសម្ភាសន៍នៅមន្ទីរពេទ្យមិត្តភាពកម្ពុជា-ចិន ព្រះកុសុមៈ ជាកន្លែងដែលបណ្តាញសារព័ត៌មានប្រទេសទាំងពីរ បានស្វែងយល់ពីវិស័យសុខាភិបាលរបស់ចិនក្នុងនេះក្រុមវេជ្ជបណ្ឌិតបែបឱសថបុរាណចិន និងកិច្ចសហប្រតិបត្តិការវេជ្ជសាស្ត្រទំនើបដែលកំពុងបើកបម្រើនៅមន្ទីរពេទ្យមួយកន្លែងនេះ។

ជាមួយគ្នានេះ នៅឯអគារគ្លីនិកឱសថបុរាណចិនក្នុងមន្ទីរពេទ្យដែលសាងសង់ឡើងដោយជំនួយពីប្រទេសចិនមួយនេះ អ្នកយកព័ត៌មានបានសម្ភាសន៍លោកវេជ្ជបណ្ឌិត Chen Honglin ប្រធានក្រុមជំនួយវេជ្ជសាស្រ្តបុរាណចិនទី ៣ ប្រចាំនៅកម្ពុជា រួមជាមួយសហការីកម្ពុជា លោកវេជ្ជបណ្ឌិត កឿង រស្មី មកពីនាយកដ្ឋានឱសថបុរាណចិន។

លោកវេជ្ជបណ្ឌិត Chen Honglin បានប្រាប់បណ្តញសារព័ត៌មានថា "ដោយផ្អែកលើក្រុមគ្រូពេទ្យឱសថបុរាណចិន វគ្គទីមួយ និងទីពីរ យើងបានផ្សព្វផ្សាយជាបន្តបន្ទាប់នូវបច្ចេកទេសវេជ្ជសាស្ត្របុរាណចិន នៃការម៉ាស្សា និងការចាក់ម្ជុលវិទ្យាសាស្ត្រ"។ លោកវេជ្ជបណ្ឌិតបានបញ្ជាក់ថាឱសថបុរាណចិនគឺជាវិធីសាស្រ្តបែបបុរាណដែលព្យាបាលបែបដ៏យូរលង់ប្រកបដោយប្រសិទ្ធភាព និងជំនឿជឿជាក់បែបវេជ្ជសាស្រ្តសម័យថ្មីផងដែរ។ លោកវេជ្ជបណ្ឌិតបន្ដថា ពលរដ្ឋកម្ពុជាជាច្រើនបានស្គាល់ ហើយចូលមកព្យាបាលជាមួយតម្លៃទាបដែលសក្តិសមនឹងពលរដ្ឋក្រីក្រ ជីវភាពមធ្យមជាដើម ហើយការព្យាបាលមានផ្នែកចាក់ម្ជុលវិទ្យាសាស្រ្តផ្នែកប្រព័ន្ធរំលាយអាហារ ផ្នែកជំងឺទូទៅ ផ្នែកប្រព័ន្ធសរសៃឈាមបេះដូង ផ្នែកឆ្អឹង ផ្នែកជំងឺទឹកនោមផ្អែមជាដើម។

បើតាមលោកវេជ្ជបណ្ឌិត កឿង  រស្មី បានគូសបញ្ជាក់ថា “ចាប់តាំងពីបង្កើតឡើងកាលពីបីឆ្នាំមុន គ្លីនិកវេជ្ជសាស្ត្របុរាណចិនបានព្យាបាលមនុស្សប្រមាណ ៣០ ម៉ឺននាក់ ជាពិសេសប្រជាជនកម្ពុជា និងជនជាតិចិន»។

គួរបញ្ចាក់ថា មន្ទីរពេទ្យមិត្តភាពកម្ពុជា-ចិន ព្រះកុសុមៈ បានដំណើរការសាងសង់ដោយ China State Construction Engineering Corporation Ltd. ដោយមានជំនួយឥតសំណងពីរដ្ឋាភិបាលចិនក្នុងឆ្នាំ ២០២២ មន្ទីរពេទ្យ ១១ ជាន់ មានដំបូលឧទ្ធម្ភាគចក្រ គ្រែ ៤០០ និងសម្ភារ បរិក្ខារពេទ្យទំនើបទាន់សម័យ និងមាននាយកដ្ឋានផ្សេងៗ រួមទាំងការវះកាត់ សេវាអ្នកជំងឺក្រៅ ការថែទាំសង្គ្រោះបន្ទាន់ បច្ចេកវិជ្ជាវេជ្ជសាស្ត្រ បន្ទប់អ្នកជំងឺក្នុង និងភស្តុភារ ខេត្ត។

ជាមួយដំណើរទស្សនកិច្ចនៅរាជធានីភ្នំពេញ អ្នកសារព័ត៌មាននៃប្រទេសទាំងពីរ ក៏បានធ្វើដំណើរទស្សនកិច្ចផងដែរដើម្បីសិក្សាស្វែងយល់ និងធ្វើបទសម្ភាសន៍ជាមួយអ្នកគ្រប់គ្រងនៅតំបន់សេដ្ឋកិច្ចពិសេសក្រុងព្រះសហនុដែលត្រូវបានបង្កើតរួមគ្នារវាងក្រុមហ៊ុនចិន និងកម្ពុជា។ ក្រៅពីនេះក៏បានទស្សនកិច្ច និងជួបសម្ភាសន៍ជាមួយវិទ្យាស្ថានធុរកិច្ចនិងបច្ចេកវិទ្យាកម្ពុជាផងដែរ។

បន្ទាប់មក នៅថ្ងៃទី០៥ ខែមេសា ឆ្នាំ ២០២៥នេះដែរ បណ្តាញសារព័ត៌មាននៃប្រទេសទាំងកម្ពុជា-ចិន នឹងបន្តដំណើរទស្សនកិច្ចខេត្តចំនួនពីរទៀតគឺខេត្តស្ទឹងត្រែង និងខេត្ដសៀមរាប។ក្នុងដំណើរទស្សនកិច្ចនេះបានផ្តោតសំខាន់ទៅលើសមិទ្ធផលលើការវិនិយោគ និងការសម្រេចបាននូវទំនាក់ទំនងល្អរវាងប្រទេសទាំងពីរ នាកន្លងមក៕

ដោយ៖ ដេប៉ូ