AKP ព្រះសីហនុ ថ្ងៃទី០៥ ខែមេសា ឆ្នាំ២០២៥ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានលើកឡើងថា នៅក្នុងមួយរយៈនេះឃើញមានការអត្ថាធិប្បាយផ្សេងៗគ្នាអំពីទំនាក់ទំនងកម្ពុជា-ចិន ដែលគេបានអត្ថាធិប្បាយថា ទំនាក់ទំនងរបស់រាជរដ្ឋាភិបាលកម្ពុជាថ្មីជាមួយនឹងរដ្ឋាភិបាលចិន គឺមានការធ្លាក់ចុះជាគំហុក ដែលការអត្ថាធិប្បាយមួយនេះសម្តេចសូមមិនធ្វើការបកស្រាយទេ ព្រោះអ្វីដែលសំខាន់គឺសកម្មភាពជាក់ស្តែងវាបានបញ្ជាក់យ៉ាងសព្វគ្រប់ទៅហើយ បើគេនៅតែមិនយល់ទៀត សម្តេចក៏មិនដឹងជាត្រូវពន្យល់យ៉ាងម៉េចដែរនោះទេ។ ការលើកឡើងរបស់ប្រមុខរាជរដ្ឋាភិបាលកម្ពុជាដូចនេះធ្វើឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលទំនើបកម្មមូលដ្ឋានសមុទ្ររាម និងមជ្ឈមណ្ឌលភស្តុភារ និងហ្វឹក ហ្វឺនរួមគ្នាកម្ពុជា-ចិន ផែរាម ខេត្តព្រះសីហនុ នាព្រឹកថ្ងៃទី០៥ ខែមេសា ឆ្នាំ២០២៥។

សម្តេចធិបតីនាយករដ្ឋមន្ត្រី ហ៊ុន ម៉ាណែត បានថ្លែងថា សម្តេចសូមវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធជាប្រពៃណីរវាងកងទ័ព ក៏ដូចជាប្រជាជន និងប្រជាជន នៃប្រទេសទាំងពីរកម្ពុជា-ចិន។ សម្តេចធិបតីនាយករដ្ឋមន្រ្ដីក៏សូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនចិន ជាពិសេស កងទ័ពរំដោះប្រជាជនចិន ដែលតែងតែបានជួយឧបត្ថម្ភគាំទ្រ និងរួមចំណែកអភិវឌ្ឍន៍វិស័យការពារជាតិ កម្ពុជាជាបន្តបន្ទាប់ក្នុងនោះរួមមានការឧបត្ថម្ភគ្រឿងបំពាក់ជាសម្ភារបច្ចេកទេស និងការបណ្តុះបណ្តាលធនធានមនុស្សសម្រាប់កងទ័ពកម្ពុជា។ សម្ដេចធិបតិបានគូសបញ្ជាក់ផងដែរថា ការសម្រេចជាស្ថាពរនូវការធ្វើទំនើបកម្មនៅមូលដ្ឋានសមុទ្ររាម និងការកសាងមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិនផែរាម មិនត្រឹមតែបានឆ្លុះបញ្ចាំងពីកិច្ចសហប្រតិបត្តិការប្រកបដោយផ្លែផ្ការវាងកងទ័ព និងប្រជាជនទាំងពីរកម្ពុជា-ចិន ប៉ុណ្ណោះទេ គឺថែមទាំងបានលើកកម្ពស់នូវសមត្ថភាពការពារជាតិរបស់កម្ពុជាក៏ដូចជាការគិតគូរ ផលប្រយោជន៍ជាតិ ធានាសន្តិសុខជាតិ សុវត្ថិភាព សណ្តាប់ធ្នាប់សាធារណៈ ស្របតាមបាវចនានៃគោលដៅជាយុទ្ធសាស្ត្រលើវិស័យការពារជាតិរបស់ព្រះរាជាណាចក្រកម្ពុជាគឺ សន្តិសុខ ការអភិវឌ្ឍ និង កិច្ចសហប្រតិបត្តិការអន្តរជាតិ។

ជាមួយគ្នានេះ សម្តេចធិបតីនាយករដ្ឋមន្ត្រីកម្ពុជាក៏បានគូសបញ្ជាក់ទៀតថា កងទ័ពមិនត្រឹមតែជាស្នូលក្នុងកិច្ចការពារបូរណ ភាពទឹកដីប៉ុណ្ណោះទេ គឺថែមទាំងជាកម្លាំងដ៏សំខាន់មួយក្នុងការរួមចំណែកដល់ការអភិវឌ្ឍប្រទេសជាតិ ក៏ដូចជាការរក្សាសន្តិភាព សន្តិសុខក្នុងតំបន់ និងអន្តរជាតិផងដែរ ដោយកន្លងមកកងទ័ពរបស់យើងបាន បង្កើនសមត្ថភាពលើជំនាញវិស្វកម្ម ការបោសសំអាតមីន ការជួយសង្គ្រោះគ្រោះមហន្តរាយ។ល។ ជាមួយនឹងលទ្ធផលជាផ្លែផ្កាគួរឱ្យកត់សម្គាល់ ហើយសមិទ្ធផលថ្ងៃនេះក៏នឹងចូលរួមចំណែកក្នុងការបង្កើន សមត្ថភាពកងទ័ពជើងទឹកមួយកម្រិតទៀតក្នុងការថែរក្សាសន្តិសុខលំហសមុទ្រ និងកិច្ចការពារធនធានធម្មជាតិរបស់ម្ពុជា ធ្វើកិច្ចសហប្រតិបត្តិការលំហាត់សមុទ្ររួមជាមួយបណ្តាប្រទេសជាមិត្ត និងចូលរួមពង្រឹងកិច្ចសហការទប់ស្កាត់រាល់បទល្មើសដែលកើតឡើងក្នុងដែនសមុទ្រ ព្រមទាំងវិភាគទានដល់ការ រក្សាសន្តិសុខដែនសមុទ្រនៅក្នុងតំបន់ រួមមាន ការប្រយុទ្ធប្រឆាំងអំពើភេរវកម្ម ចោរសមុទ្រ ការរត់ពន្ធ គ្រឿងញៀនខុសច្បាប់ ការរត់ពន្ធអាវុធ ការជួញដូរមនុស្សខុសច្បាប់ និងការទប់ស្កាត់ឧក្រឹដ្ឋកម្មឆ្លងដែន ជាដើម។

សម្ដេចធិបតី ហ៊ុន ម៉ាណែត បានលើកឡើងពីកិច្ចសហប្រតិបត្តិការ និងការគាំទ្រពីបណ្តាប្រទេសជាមិត្តទាំងអស់ពិតជាបានជួយឱ្យកម្ពុជាមានប្រព័ន្ធហ្វឹកហ្វឺនកាន់តែមានប្រសើរឡើងជាលំដាប់ ខណៈដែលសង្គ្រាមបច្ចេកវិទ្យាបាន និងកំពុង វិវឌ្ឍន៍ប្រកបដោយភាពពិបាកប៉ាន់ស្មាន ហើយថា ការបណ្តុះបណ្តាលយោធិនអាជីព និងការហ្វឹកហ្វឺនជំនាញឯកទេស ចាំបាច់ត្រូវតែពង្រឹងដើម្បីត្រៀមខ្លួនឆ្លើយតបទៅនឹងការវិវឌ្ឍន៍រីកចម្រើននៃបច្ចេកវីទ្យា និងវិទ្យាសាស្ត្រទំនើប។ សម្ដេចធិបតីនាយករដ្ឋមន្រ្ដីបានចាត់ទុកថា ដូច្នេះកិច្ចការចាំបាច់ដែលត្រូវធ្វើបន្ទាប់ពីយើងសម្រេចបាននូវសមិទ្ធផលនៅផែរាមនេះ គឺការបន្តការហ្វឹកហ្វឺនបង្កើនសមត្ថភាពជំនាញ ក៏ដូចជាអាជីពរបស់កងទ័ពឱ្យកាន់តែប្រសើរឡើងថែមទៀត៕

ដោយ៖ ចាន់ សុភឿន