AKP កំពង់ស្ពឺ ថ្ងៃទី៥ ខែមេសា ឆ្នាំ២០២៥ -- ឯកឧត្តម តូច ចាន់នី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងលោក ជាវ វិជ្ជាក់ អភិបាលរងខេត្តកំពង់ស្ពឺ បានអញ្ចើញជាអធិបតីភាពក្នុងពិធីសម្ពោធដាក់ឱ្យប្រើប្រាស់ជាផ្លូវការអាគារស្នាក់នៅកុមាររបស់អង្គការបេសកកម្មនៃក្តីស្រឡាញ់ ស្ថិតក្នុងភូមិត្រពាំងមាន ឃុំស្នំក្រពើ ស្រុកគងពិសី ខេត្តកំពង់ស្ពឺ  កាលពីថ្ងៃទី៤ ខែមេសាឆ្នាំ២០២៥ ដោយមានការអញ្ជើញចូលរួមពីសំណាក់ តំណាងស្រុក តំណាងមន្ទីរជំនាញពាក់ព័ន្ធ អង្គការដៃគូ និងអ្នកចូលរួមឧបត្ថម្ភជាច្រើនរូបទៀតផងដែរ។

ឯកឧត្តម តូច ចាន់នី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា ការដាក់សម្ពោធឱ្យប្រើប្រាស់ជាផ្លូវការនូវអាគារស្នាក់នៅរបស់អង្គការបេសកកម្មនៃក្តីស្រឡាញ់នេះ គឺការចូលរួមចំណែកក្នុងការអភិវឌ្ឍសេដ្ឋកិច្ចប្រជាពលរដ្ឋកម្ពុជា និងពង្រឹងវិស័យអប់រំនៅទីជនបទដាច់ស្រយ៉ាល ជាពិសេស គឺបានចូលរួមចំណែកផ្តល់ចំណេះដឹងដល់កុមារឱ្យមានសមត្ថភាពរឹងមាំ ឈានឆ្ពោះទៅចាប់យកជំនាញវិជ្ជាជីវៈប្រចាំជីវិត ស្របតាមចំណង់ចំណូលចិត្តរបស់ខ្លួន សម្រាប់លើកកម្ពស់ជីវភាព និងការចូលរួមក្នុងសកម្មភាពអភិវឌ្ឍន៍សង្គមជាតិឱ្យកាន់តែសកម្ម និងមាននិរន្តរភាព ព្រមទាំងឆ្លើយតបទៅនឹងគោលនយោបាយបញ្ចកោណរបស់រាជរដ្ឋាភិបាលអាណត្តិទី៧ ក្រោមការដឹកនាំប្រកបដោយគតិបណ្ឌិតរបស់ ឮសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

សូមបញ្ជាក់ថា អង្គការបេសកកម្មនៃក្តីស្រឡាញ់ជាអង្គការមិនស្វែងរកប្រាក់ចំនេញ បង្កើតនៅឆ្នាំ២០១៤។ អង្គការនេះបានសាងសង់អាគារសិក្សាសាលាអន្តរជាតិសេចក្តីសង្ឃឹមតែមួយ និងហេដ្ឋារចនាសម្ព័ន្ធជាច្រើន ហើយបច្ចុប្បន្នមានកុមារស្នាក់នៅ និងរៀនសូត្រប្រមាណ ៣៥០នាក់៕

ដោយ: លឹម សាន្ត