AKP កណ្ដាល ថ្ងៃទី០៥ ខែមេសា ឆ្នាំ២០២៥ -- អង្គការសំអាតទន្លេ សមុទ្រ បានសហការជាមួយមន្ទីរបរិស្ថានខេត្តកណ្តាល រៀបចំកម្មវិធី “ទិវាអំពើល្អ Good Deeds Day” នៅសួនច្បារមាត់ទន្លេក្រុងតាខ្មៅ ក្រោមអធិបតីភាពលោក គ្រុយ ម៉ាឡែន អភិបាលរងខេត្តកណ្តាល នារសៀលថ្ងៃទី០៤ ខែមេសា ឆ្នាំ២០២៥។

មានប្រសាសន៍ក្នុងពិធីនេះ លោក គ្រុយ ម៉ាឡែន បានចូលរួមអបអរសាទរ ទិវាអំពើល្អ ឆ្នាំ២០២៤ (Good Deeds Day 202៥) និងកោតសរសើរដល់មន្ទីរបរិស្ថានខេត្តកណ្តាល អង្គការសំអាតទន្លេ សមុទ្រ និងភាគីពាក់ព័ន្ធនានា ដែលតែងតែចូលរួមយ៉ាងសស្រាក់សស្រាំជាមួយរដ្ឋបាលខេត្ត ក្នុងការថែរក្សាបរិស្ថាន។ អំពើល្អអាចធ្វើបានគ្រប់ពេលវេលា គ្រប់ទីកន្លែង នៅផ្ទះឬក្រៅផ្ទះ ឬនៅកន្លែងការងារ។ អំពើល្អនាំមកនូវសេចក្តីសប្បាយរីករាយ ជាអំពើបុណ្យ សុខភាពល្អ សុភមង្គល ភាពថ្លៃថ្នូរ សោភ័ណភាព ទឹកស្អាត ទាំងទន្លេ និងសមុទ្រ បឹងបួរមានអនាម័យ ត្រជាក់ត្រជុំ សម្បូរសប្បាយ ចរាចរណ៍ ទេសចរណ៍កើនឡើង និរន្តរភាពស្បៀងអាហារ សេដ្ឋកិច្ចរីកចម្រើន ប្រទេស និងពិភពលោកទាំងមូលមានសន្តិភាព។

លោក អភិបាលរងខេត្ត បន្តទៀតថា អំពើល្អផ្តើមពីចិត្តគំនិត ដោយមិនគិតអំពីភាពមាន ឬក្រ ពណ៌សម្បុរ ភេទ ក្មេង ឬចាស់ នោះឡើយ។ ដូច្នេះមនុស្សគ្រប់រូបអាចធ្វើអំពើល្អ និងបន្តពង្រីកអំពើល្អរបស់យើងឱ្យកាន់តែទូលំទូលាយទៅតាមលទ្ធភាព និងសមត្ថភាព៕

ដោយ ណយ នឿន (ប្រភព៖ រដ្ឋបាលខេត្តកណ្តាល)