AKP ភ្នំពេញ ថ្ងៃទី១៧ ខែមីនា ឆ្នាំ២០២៥--

ឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាពបានថ្លែងថា ចំនួនកម្លាំងមួកខៀវរបស់កម្ពុជាចូលរួមក្នុងតំបន់បេសកកម្មអង្គការសហប្រជាជាតិចាប់ពីឆ្នាំ២០០៦ មកដល់បច្ចុប្បន្ន មានចំនួន ៩,៨២៤នាក់ (នារី ៨៥៧នាក់) ក្នុងប្រទេសចំនួន១០ មានស៊ូដង់ ស៊ូដង់ខាងត្បូង លីបង់ ឆាដ សាយប្រឹស ស៊ីរី ម៉ាលី អាហ្វ្រិកកណ្តាល យេមែន និងកុងហ្គោ លើជំនាញបោសសម្អាតមីន អាវុធហត្ថ ពេទ្យកំរិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្ដេក-បញ្ឈរ នាយទាហានសេនាធិការ និងសង្កេតការណ៍ ខណៈដែលបច្ចុប្បន្នកម្ពុជាមានកងកម្លាំងចំនួន៦២៧នាក់ (នារី ១៣០នាក់) កំពុងបំពេញបេសកកម្មនៅ ៥ប្រទេស រួមមាន ស៊ូដង់ខាងត្បូងលីបង់អាហ្វ្រិកកណ្តាល និងសាធារណរដ្ឋកុងហ្គោ ដែលរបាយការណ៍នេះត្រូវបានជម្រាបជូនក្រុមយោធាចារ្យបារាំង រួមមាន លោកព្រឹន្ទបាល Kazimierz GORNIAK និងលោកព្រឹន្ទបាល Sergiy DIDYK មកពីអង្គភាពទ័ពពិសេស( មួកបៃតង ) លើជំនាញកម្ទេចគ្រាប់ EOD នៃវរសេនាធំលេខ១ កងទ័ពបារាំង ក្នុងកិច្ចពិភាក្សាស្តីពីវគ្គហ្វឹកហ្វឺនកម្ទេចគ្រឿងផ្ទុះកម្រិត២ដល់សិក្ខាកាមទ័ពមួកខៀវកម្ពុជា ដើម្បីពង្រឹងសមត្ថភាពមុនបញ្ជូនចេញទៅចូលរួមបេសកកម្មអង្គការសហប្រជាជាតិ នាទីស្តីការមជ្ឈមណ្ឌលជាតិរក្សាសន្តិភាព នាព្រឹកថ្ងៃទី១៧ ខែមីនា ឆ្នាំ២០២៥។

ឯកឧត្តម ឧត្តមសេនីយ៍ទោ សែម រតនា បានថ្លែងអំណរគុណយ៉ាងជ្រាលជ្រៅចំពោះជំនួយឧបត្ថម្ភលើការហ្វឹកហ្វឺនពីសាធារណរដ្ឋបារាំងពីឆ្នាំ២០០៩ដល់បច្ចុប្បន្ន ដែលមានវគ្គហ្វឹកហ្វឺនក្នុងប្រទេសសរុបចំនួន ៧៦វគ្គ មានសិក្ខាកាមចំនួន ១,៨៦៥នាក់ រួមទាំងវគ្គហ្វឹកហ្វឺនលើជំនាញបោសសំអាតមីន កំទេចយុទ្ធភ័ណ្ឌមិនទាន់ផ្ទុះ  វគ្គនាយទាហានសេនាធិការ សង្កេតការណ៍យោធា វគ្គ GPS បំប៉នផ្នែក Computer សង្គ្រោះបឋម អាវុធហត្ថ ដឹកជញ្ជូនគ្រឿងផ្ទុះ បច្ចេកទេសសព្វាវុធ និងបំប៉នផ្នែកភាសាបារាំង។ល។ រួមទាំងវគ្គហ្វឹកហ្វឺននៅក្រៅប្រទេសមានសិក្ខាកាមចំនួន១០នាក់ លើជំនាញនាយទាហានសេនាធិការ វគ្គនាយទាហានជាន់ខ្ពស់ និងបំប៉នបន្ថែមផ្នែកភាសាបារាំង។ បន្ថែមពីលើនេះ ឯកឧត្តម ឧត្តមសេនីយ៍ទោ ក៏បានសំណូមពរដល់ភាគីបារាំងឱ្យបន្តជួយទាំងផ្នែកសម្ភារៈ បច្ចេកទេស និងការ ហ្វឹកហ្វឺនបន្ថែមទៀត។

ជាការឆ្លើយតប ក្រុមយោធាចារ្យបារាំងបានសម្តែងនូវការរីករាយចំពោះកិច្ចសហការជាមួយភាគីកម្ពុជា លើកិច្ចការបណ្តុះបណ្តាល និងហ្វឹកហ្វឺនដល់កងកម្លាំងសម្រាប់បេសកកម្មអង្គការសហប្រជាជាតិ ព្រមទាំងបានបញ្ជាក់ថា នឹងទទួលយកនូវរាល់សំណូមពររបស់ឯកឧត្តម ឧត្តមសេនីយ៍ទោ សែម រតនា ទៅជូនថ្នាក់លើពិនិត្យ និងសម្រេចផងដែរ៕

ដោយ៖ ចាន់ សុភឿន