AKP ភ្នំពេញ ថ្ងៃទី២៥ ខែមិថុនា ឆ្នាំ២០២៦--សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅថ្ងៃពុធ ទី២៦ខែមិថុនា ឆ្នាំ២០២៦ បានទទួលជួបសំណេះ សំណាលជាមួយក្រុមការងារស្ត្រីខេត្តតាកែវ ដែលបានអញ្ជើញមកទស្សនកិច្ចស្វែងយល់អំពីរដ្ឋសភា ដឹកនាំដោយលោកជំទាវ និន សាផុន តំណាង រាស្ត្រមណ្ឌលខេត្តតាកែវ និងជាប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគ មនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់នៃរដ្ឋសភា។

សម្តេចប្រធានរដ្ឋសភា បានសម្តែងក្តីសោមនស្សរីករាយយ៉ាងក្រៃលែង ដែលប្រតិភូស្ត្រីខេត្តតាកែវ បានអញ្ជើញមកសិក្សាស្វែងយល់អំពីរដ្ឋសភា និងបានឆ្លៀតឱកាសជួបសម្តែងការគួរសមជាមួយសម្តេចនៅក្នុងឱកាសនេះ។

សម្តេចបានវាយតម្លៃខ្ពស់ចំពោះការងាររបស់ក្រុមចលនាស្ត្រីខេត្តតាកែវ ដែលសម្រេចបានលទ្ធផលជាទីគាប់ចិត្តនៅ ក្នុងការបំពេញការងារ ទាំងការងាររដ្ឋបាលតាមស្ថាប័ន មន្ទីរ ក៏ដូចជាការចុះជួយពលរដ្ឋ ដោយបានផ្សារភ្ជាប់សុខទុក្ខជាមួយពលរដ្ឋជាប់ជាប្រចាំ ស្របតាមស្មារតីគោលការណ៍ដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែល សម្តេចទាំងទ្វេ ផ្តល់អាទិភាពខ្ពស់បំផុតចំពោះសុខទុក្ខ និងបញ្ហាជីវភាពពលរដ្ឋ។

នៅក្នុងឱកាសរីករាយ និងស្និទ្ធស្នាលជាទីបំផុតនេះ សម្តេចប្រធានរដ្ឋសភាបានចែករំលែកនូវសភាពការណ៍តំបន់ និងពិភពលោក និងសង្គមជាតិជាច្រើនជាមួយប្រតិភូស្ត្រីខេត្តតាកែវ ពិសេសបានជម្រាបពីការរីកចម្រើន និងការអភិវឌ្ឍរបស់ប្រទេសជាតិ ក្រោមការដឹក នាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីវ័យក្មេង ប្រកបដោយថាមវន្ត មានភាពវែងវៃ ម៉ឹងម៉ាត់ និងចក្ខុវិស័យវែងឆ្ងាយ ដឹកនាំប្រទេសជាតិ កសាងបាននូវភាពធន់ជាតិ ពង្រឹងនូវវប្បធម៌សាមគ្គីជាតិ យកឈ្នះបានឧបសគ្គនានាដែលកំពុងប្រឈម ទាំងបញ្ហាសកលដែលកំពុងមានភាពស្មុគស្មាញ និងជាពិសេសការឈ្លានពានរបស់ប្រទេសថៃ មកលើអធិបតេយ្យ និងបូរណភាពទឹកដីរបស់ជាតិយើង។

សម្តេចធិបតី បានប្រែក្លាយឧបសគ្គនៅក្នុងការកសាងភាពធនរបស់ជាតិទំាងវិស័យសេដ្ឋកិច្ចនិងយោធា។

សម្តេចប្រធានរដ្ឋសភា បានសង្កត់ធ្ងន់ថា ទោះបីស្ថិតនៅក្នុងកាលៈទេសៈដ៏លំបាកនេះយ៉ាងណាក្តី សេដ្ឋកិច្ចកម្ពុជាមានភាពធន់ និងរឹងមាំ កំពុងឈានឆ្ពោះទៅការសម្រេចបាននូវគោលដៅអភិវឌ្ឍន៍នៅឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងជាប្រទេសមានចំណូលខ្ពស់នៅឆ្នាំ២០៥០។
សម្តេចប្រធានរដ្ឋសភាបានគូសបញ្ជាក់ថា ចំណែកស្ត្រីនៅកម្ពុជាត្រូវបានលើកកម្ពស់តាំងពីក្រោយថ្ងៃរំដោះឆ្នាំ១៩៧៩ មកម្លេះ។

សម្តេចតេជោ ហ៊ុន សែន ដែលជាបិតាយេនឌ័រនៅកម្ពុជា បានចាត់ទុកស្ត្រីជាតួអង្គសំខាន់មិនអាចរំលងបានឡើយ។ ស្ត្រីជាឆ្អឹងខ្នងសេដ្ឋកិច្ច ហើយថា ជួយស្ត្រីដូចជាជួយខ្លួនឯង។ ការលើកកម្ពស់សមភាពយេនឌ័រ ត្រូវបានផ្តល់អាទិភាពនៅក្នុងនីតិកាលទី៧នេះ។ សម្តេចធិបតី ហ៊ុន ម៉ាណែត បានលើកឡើងថា ពិភព លោកនឹងកាន់តែមានសុវត្ថិភាព ស្រស់ បំព្រង និងកក់ក្តៅជាងមុន ប្រសិនបើមានស្ត្រីក្លាយជាអ្នកដឹកនាំកាន់តែច្រើន។

នៅក្នុងឱកាសដ៏មានតម្លៃនេះ សម្តេចរដ្ឋសភាធិបតី បានគូសបញ្ជាក់ថា៖ «យើងត្រូវរក្សាឱ្យបានដាច់ខាតនូវសាមគ្គីភាពផ្ទៃក្នុង។ កម្លាំងសាមគ្គីភាពរបស់យើង គឺជាខឿនការពារជាតិដ៏រឹងមាំបំផុត "មានសាមគ្គីរស់ បែកបាក់សាមគ្គីស្លាប់"»។ សម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត បាននិងកំពុងយកចិត្តទុកដាក់ទប់ទល់ជាមួយសត្រូវឈ្លានពានតាមរយៈសមរភូមិការទូត យោធា គ្រប់រូបភាពតាមផ្លូវច្បាប់ នយោបាយ និងសាធារណមតិនានាជុំវិញពិភពលោក ដើម្បីការពារយុត្តិធម៌ជូនប្រជាជាតិយើង។ បេសកកម្មការទូតរបស់កម្ពុជាកំពុងមានប្រៀបលើពួកឈ្លានពាន។ ដូច្នេះកម្ពុជាប្រកាន់ជំហររឹងមាំក្នុងការដោះស្រាយបញ្ហាដោយសន្តិវិធី និងផ្អែកលើច្បាប់អន្តរជាតិ។

ដោយសារតួនាទីស្ត្រីសំខាន់នៅក្នុងសង្គម សម្តេចរដ្ឋសភាធិបតី ប្រធានរដ្ឋសភា សំណូមពរដល់ប្រតិភូស្ត្រីខេត្តតាកែវ ត្រូវបន្តពង្រឹងសកម្មភាពមនុស្សធម៌ក្នុងការជួយសង្គម ផ្សារភ្ជាប់សុខទុក្ខជាប់ជានិច្ចជាមួយពលរដ្ឋ ចូលរួមដោះស្រាយរាល់សំណូមពរ របស់ប្រជាពលរដ្ឋ ពិសេសបន្តយកចិត្តទុកដាក់ចំពោះគ្រួសារវីរយុទ្ធជនពលី និងគ្រួសារវីរយុទ្ធជនដែលកំពុងបំពេញបេសកកម្មដ៏ថ្លៃថ្លាក្នុងសមរភូមិជួរមុខ ក្នុងកិច្ចការពារបូរណភាពទឹកដី និងពលរដ្ឋភៀសសឹក ជាដើម៕

ដោយ៖ ប៊ុនរិទ្ធ