AKP បន្ទាយមានជ័យ ថ្ងៃទី២០ខែឧសភា ឆ្នាំ២០២៦–មុខមាត់ថ្មីនៃទីរួមខេត្តបន្ទាយមានជ័យកាន់តែខិតជិតមកដល់ហើយ ដោយអាជ្ញាធរខេត្តបាននិងកំពុងជំរុញយ៉ាងសកម្មលើគម្រោងកែលម្អសោភ័ណភាព និងហេដ្ឋារចនាសម្ព័ន្ធក្នុងក្រុងសិរីសោភ័ណ តាមរយៈការត្រៀមរៀបចំក្រាលការ៉ូឡាធ្វើជាផ្លូវដើរ  ចំនួន ៦ខ្សែធំៗ ដើម្បីប្រែក្លាយទីក្រុងមួយនេះឱ្យមានភាពស្រស់ស្អាត របៀបរៀបរយ និងមានបរិស្ថានបៃតងគួរឱ្យចង់រស់នៅ។

កាលពីថ្ងៃទី១៩ ខែឧសភា ឆ្នាំ២០២៦ នេះ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញដឹកនាំកិច្ចប្រជុំយ៉ាងសំខាន់មួយ ដើម្បីពិភាក្សា និងត្រៀមរៀបចំគម្រោងកែលម្អក្រុងសិរីសោភ័ណនេះ។ កិច្ចប្រជុំនេះត្រូវបានរៀបចំឡើងនៅសាលប្រជុំ «ក» សាលាខេត្តបន្ទាយមានជ័យ ដោយមានការអញ្ជើញចូលរួមពី លោក ឈឿន ក្រៃយ៉ុង អភិបាលរងខេត្ត លោក ណង វុទ្ធី នាយករដ្ឋបាលខេត្ត លោក សុក ចាន់ថា ប្រធានមន្ទីរសាធារណការ និងដឹកជញ្ជូនខេត្ត លោក ស្រេង សុផល អភិបាលក្រុងសិរីសោភ័ណ ព្រមទាំងមន្ត្រីជំនាញថ្នាក់ខេត្ត-ក្រុង និងចៅសង្កាត់ទាំង ៤ នៅក្នុងក្រុង។

ដើម្បីធានាឱ្យគម្រោងដ៏មានសារៈសំខាន់នេះទទួលបានជោគជ័យ និងអាចចាប់ផ្តើមអនុវត្តទៅតាមផែនការដែលបានគ្រោងទុកនៅឆ្នាំ២០២៧ ខាងមុខ ឯកឧត្តម អ៊ុំ រាត្រី អភិបាលខេត្ត បានដាក់បទបញ្ជា និងណែនាំយ៉ាងម៉ឺងម៉ាត់ដល់អាជ្ញាធរក្រុងសិរីសោភ័ណ ក៏ដូចជាចៅសង្កាត់ពាក់ព័ន្ធទាំង ៤ ត្រូវរួមសហការគ្នាបង្កើតក្រុមការងារចុះសិក្សាវាយតម្លៃឱ្យបានល្អិតល្អន់បំផុត។

 «យើងត្រូវសិក្សាឱ្យបានច្បាស់លាស់ពីផលប៉ះពាល់នៃការអភិវឌ្ឍគម្រោង ដើម្បីងាយស្រួលក្នុងការសម្របសម្រួលដោះស្រាយសុំការយោគយល់។ ជាមួយគ្នានេះ ខ្ញុំសូមអំពាវនាវដល់បងប្អូនប្រជាពលរដ្ឋទាំងអស់ មេត្តាចូលរួមសហការជាមួយអាជ្ញាធរ ដើម្បីរួមគ្នាកែលម្អសោភ័ណភាពក្រុងរបស់យើងឱ្យកាន់តែមានភាពស្រស់ស្អាត ស្អាតស្អំ និងមានភាពបៃតង»។ នេះជាប្រសាសន៍ទិសដៅរបស់ ឯកឧត្តម អ៊ុំ រាត្រី។

យោងតាមរបាយការណ៍បច្ចេកទេស គម្រោងកែលម្អសោភ័ណភាពនេះនឹងត្រូវរៀបចំក្រាលការ៉ូឡាធ្វើជាផ្លូវដើរយ៉ាងមានរបៀបរៀបរយ ដែលលាតសន្ធឹងលើខ្សែផ្លូវសំខាន់ៗចំនួន ៦ខ្សែ ក្នុងក្រុងសិរីសោភ័ណ រួមមាន

|ខ្សែផ្លូវទី១  ពីភ្លើងស្តុបសួនម្ទេសក្រហម ដល់ ផ្លូវកែងជាប់សាលាក្រុង ប្រវែងសរុប  ២,៣៥៣ ម៉ែត្រ។ខ្សែទី២   ពីផ្លូវកែងជាប់សាលាក្រុង ដល់ ផ្លូវបេតុងជាប់របងសាលារៀនពង្រ ប្រវែង ១,៣៥៦ ម៉ែត្រ។ខ្សែទី៣ ពីស្ពានទី២ (ផ្លូវជាតិលេខ៦) ដល់ ស្ពានទឹកថ្លា ប្រវែង ៨,២៥០ ម៉ែត្រ ខ្សែទី៤ពីរង្វង់មូលដៃ៣២ (ផ្លូវជាតិលេខ៥) ដល់ រង្វង់មូលស្រីគ្រប់ល័ក្ខ ប្រវែង៧៨៨ ម៉ែត្រ។ខ្សែទី៥ ពីរង្វង់មូលស្រីគ្រប់ល័ក្ខ (ផ្លូវជាតិលេខ៥) ដល់ ផ្លូវរទេះភ្លើង ប្រវែង៦២៤ ម៉ែត្រនិងខ្សែទី

| ៦ ពីរង្វង់មូលស្រីគ្រប់ល័ក្ខ (ផ្លូវជាតិលេខ៦) ដល់ ផ្លូវខាងមុខសណ្ឋាគារណាសាប្រវែង៩៤១ ម៉ែត្រ។

តាមរយៈការវិនិយោគលើហេដ្ឋារចនាសម្ព័ន្ធថ្មើរជើងនេះ ក្រុងសិរីសោភ័ណមិនត្រឹមតែមានសោភ័ណភាពស្រស់ស្អាតប៉ុណ្ណោះទេ ប៉ុន្តែថែមទាំងជួយបង្កើនសុវត្ថិភាពដល់ប្រជាពលរដ្ឋក្នុងការធ្វើដំណើរថ្មើរជើង ហាត់ប្រាណ និងលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់ ឱ្យកាន់តែប្រសើរឡើងថែមមួយកម្រិតទៀតផងដែរ នៅពេលដែលគម្រោងនេះលេចរូបរាងឡើងនាឆ្នាំ២០២៧ ខាងមុខ៕

ដោយ៖ ឈុន សារ៉ាត