AKP កំពង់ស្ពឺ ថ្ងៃទី២៤ ខែតុលា ឆ្នាំ២០២៦--សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងគូសបញ្ជាក់ថា កម្ពុជាបានប្រែប្រួលមុខមាត់យ៉ាងស្ទុះលោតផ្លោះ ដោយបានផ្លាស់ប្តូរពីប្រទេសដែលធ្លាប់តែទទួលកងកម្លាំងរក្សាសន្តិភាព មកជាប្រទេសដែលបានបញ្ជូនកងកម្លាំងរបស់ខ្លួនទៅចូលរួមបេសកកម្មរក្សាសន្តិភាព និងបានក្លាយជាប្រទេសនាំមុខមួយក្នុងការបោសសំអាតមីន និងយុទ្ធភណ្ឌមិនទាន់ផ្ទុះ ក្រោមឆត្រអង្គការសហប្រជាជាតិ (UN)។
ការថ្លែងរបស់សម្តេចធិបតី ធ្វើឡើងនាព្រឹកថ្ងៃទី២៤ ខែតុលា ឆ្នាំ២០២៦នេះ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីរម្លឹកខួប២០ឆ្នាំ នៃការបញ្ជូនកងកម្លាំងនៃកងយោធពលខេមរភូមិន្ទ ចូលរួមបំពេញបេសកកម្មរក្សាសន្តិភាពអង្គការសហប្រជាជាតិ និងសម្ពោធដាក់ឱ្យប្រើប្រាស់ជាផ្លូវការសមិទ្ធផលនានានៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ស្ថិតក្នុងស្រុកភ្នំស្រួច ខេត្តកំពង់ស្ពឺ។
សម្តេចធិបតីនាយករដ្ឋមន្ត្រី បានសម្តែងនូវការកោតសរសើរ និងវាយតម្លៃខ្ពស់ចំពោះវីរភាព ក្លាហាន និងលះបង់ខ្ពស់របស់កងកម្លាំងរក្សាសន្តិភាពកម្ពុជាទាំងអស់ Defence Forces ដែលបានខិតខំប្រឹងប្រែងបំពេញភារកិច្ចលើឆាកអន្តរជាតិ ប្រកបដោយអត្តសញ្ញាណ វិន័យ និងសេចក្តីថ្លៃថ្នូរ ធ្វើឱ្យឈ្មោះរបស់ព្រះរាជាណាចក្រកម្ពុជា លេចត្រដែតនៅលើឆាកអន្តរជាតិ។
សម្តេចធិបតី បានបន្ថែមថា បទពិសោធន៍ និងជំនាញច្បាស់លាស់ក្នុងការបោសសំអាតមីន និងគ្រាប់យុទ្ធភណ្ឌមិនទាន់ផ្ទុះ ដែលកម្ពុជាទទួលបានពីអតីតកាលនៃការបញ្ចប់សង្គ្រាម បានប្រែផ្លាស់ទៅជាដើមទុន និងជាការចូលរួមចំណែកយ៉ាងសំខាន់ ក្នុងការជួយសង្គ្រោះជីវិតមនុស្ស និងកសាងសន្តិភាពនៅក្នុងបណ្តាប្រទេសនានាជុំវិញពិភពលោក ដែលកំពុងរងគ្រោះដោយសារជម្លោះ។
គួរបញ្ជាក់ថា រយៈពេល ២០ឆ្នាំកន្លងមកនេះ (២០០៦-២០២៦) កម្ពុជាបានបញ្ជូនកងកម្លាំងរក្សាសន្តិភាពរាប់ពាន់នាក់ ទៅចូលរួមបេសកកម្មមនុស្សធម៌ និងរក្សាសន្តិភាពរបស់អង្គការសហប្រជាជាតិ ក្នុងបណ្តាប្រទេសជាច្រើននៅអាហ្វ្រិក និងមជ្ឈិមបូព៌ា ដែលស្តែងឱ្យឃើញយ៉ាងច្បាស់ពីឆន្ទៈ និងការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការរួមចំណែកថែរក្សាសន្តិភាព និងស្ថិរភាពពិភពលោក៕

ដោយ៖ គង់ សិរីរ័ត្ន, រូបថត៖ គល់ រ៉េននី